Fálase

Inaugurada a instalación ribeirense dende a que Ana Peleteiro preparará os vindeiros campionatos mundiais de pista cuberta e ao aire libre e mais o seguinte europeo indoor. O alcalde de Ribeira, Luís Pérez Barral, e o conselleiro da Presidencia, Diego Calvo, abriron hoxe oficialmente o módulo de atletismo cuberto do complexo deportivo da Fieiteira, onde adestrarán deportistas "como a nosa deportista olímpica Ana Peleteiro, a lle quen quero agradecer a súa aposta por Ribeira pero tamén contribuirá a que o clubs como os de Atletismo ou Taekwondo Natural Sport poidan desenvolver as súas actividades nun espazo axeitado", destaca o rexedor sobre a instalación, cofinanciada por ambas institucións. Na imaxe [©Concello de Ribeira], Peleteiro saúda a deportistas de Ribeira xunto ao alcalde e o secretario xeral para o Deporte.

Marilar Aleixandre recolle o premio Porteiro Garea da USC polo seu labor a prol do galego na universidade: "Escribir en galego vivindo en Galicia é un acto político de resistencia e tamén un acto de amor", reivindica a escritora e profesora ad Honorem da institución académica compostelá. [Imaxe: ©Santi Alvite / USC]

• HEMEROTECA | 'As malas mulleres' de Marilar Aleixandre gañan un Premio Nacional de Narrativa ata agora inzado de homes
• HEMEROTECA | Marilar Aleixandre ingresa na RAG cun chamado a "termar da paisaxe"
• HEMEROTECA | "É moi importante que haxa máis mulleres nas institucións, mais tamén que haxa mulleres feministas"

Persoal da CRTVG convoca catro xornadas de folga "contra a externalización da programación" e advirte cun paro indefinido. O Comité Intercentros anuncia que as asembleas de profesionais veñen de dar o seu visto e prace ao calendario de mobilizacións "contra o desmantelamento", principiando polos paros convocados para os días 7, 9, 11 e 14 de outubro de 11:30 a 13:00, cadrando coa emisión do novo programa O Termómetro, coproducido por empresas privadas e substituto da produción propia A Revista. 

• AMPLIAMOS 👉 "Máxima tensión" nunha CRTVG con persoal a camiñar cara á folga indefinida
• Galicia non terá a autoridade audiovisual independente que esixe a UE
• Concurso público para dirixir a CRTVG: en marcha a lei popular por uns medios públicos "ao servizo do pobo"
• A nova lei galega de medios públicos xa figura entre os riscos para a liberdade de prensa en Europa

O PP consegue a alcaldía de Mondariz tras a dimisión do goberno local liderado por Alternativa por Mondariz (AxM). O grupo popular quedara segundo nas pasadas eleccións, mentres que AxM logrou a maioría con cinco escanos, pero acusou dificultades para aprobar uns orzamentos. Pablo Barcia (PP) foi escollido como rexedor no pleno deste xoves [na imaxe CC-BY-SA PPdeG Pontevedra].

Javier Gómez Noya anuncia a súa retirada do tríatlon profesional tras 26 anos e un amplísimo palmarés. O ferrolán logrou fitos como cinco campionatos do mundo en distancia olímpica, unha medalla de prata nos Xogos Olímpicos de 2012 ou tres campionatos do Ironman.

• HEMEROTECA | Gómez Noya engade outro galardón a unha carreira de lenda
• HEMEROTECA | "Éxitos como o de Gómez Noya axudan a cambiar a mentalidade dos galegos"
• HEMEROTECA | Gómez Noya entra no Olimpo cunha medalla de prata

A xuíza de Angrois amplía o prazo para recorrer a sentenza que condenou ao mesmo nivel o maquinista e un cargo de Adif. A sentenza foi feita pública o 26 de xullo e varias partes pediron aclaracións e despois ampliación do prazo para recorrer. Agora a maxistrada fixa un prazo de 30 días que só comezará a contar cando todas as partes reciban as aclaracións solicitadas, o que o xulgado comunicará ao resto de partes implicadas. 

• HEMEROTECA | Condenada a verdade oficial do accidente de Angrois

Feijóo suxire "traballar nove horas e media catro días á semana" como fórmula para rebaixar a xornada laboral, no canto de minguar o total de horas co mesmo salario. O ex-presidente da Xunta e actual líder do PP mantén, nunha entrevista en Telecinco, que en calquera caso "o primeiro é recuperar a produtividade da economía española" e "o segundo", lograr unha "rebaixa" de baixas laborais.

• HEMEROTECA | Non só tentar conciliar: o "dereito ao tempo" entra na axenda das eleccións europeas
• HEMEROTECA | Galicia bate marcas en excedencias para coidar crianzas malia a alta demanda e gratuidade nas escolas infantís
• HEMEROTECA | O traballo na hostalaría segue por riba das 40 horas semanais malia unha década de diminución

Tres navieiras de Cíes serán sancionadas por non aclarar a Competencia por que os seus prezos son similares. Tras seren denunciadas varias empresas en 2016 por fixar os mesmos prezos, Competencia perdooulles unha multa a cambio do seu compromiso de mellorar os seus procedementos comerciais, pero agora tras constatar o incumprimento de tres delas (Naviera Mar de Ons, Naviera Illa de Ons e Naviera de las Rías Gallegas) e ábrelles un expediente sancionador por unha infracción moi grave. 

• HEMEROTECA (9/4/2024) | Navieiras de Cíes aínda incumpren condicións impostas por Competencia tras seren denunciadas en 2016
• HEMEROTECA (11/8/2017) | Sospeitas sobre a venda de billetes irregulares acrecentan o conflito pola masificación das Cíes

Concerto solidario AMAL X GAZA para apoiar a Axencia das Nacións Unidas para os Refuxiados de Palestina en Oriente Próximo (UNRWA). Será o xoves 17 de outubro, ás 20.30h, na Sala Capitol de Santiago, no marco da programación da XXII Semana de Cinema Euroárabe Amal. Contará coas actuacións das Tanxugueiras, Boyanka Kostova, García MC e Ataque Escampe. A poeta Lúa Mosquetera será a encargada de abrir o acto e o cómico Pablo Meixe actuará como mestre de cerimonias. 

A venda de entradas xa está activa no sitio web da Sala Capitol, na tenda A Reixa de Compostela e no despacho de billetes da Capitol o propio día 17 a partir das 19.30h.

A Executiva Nacional do BNG "non avala" a moción de censura asinada en Muxía pola edil do Bloque xunto ao PP e Independentes por Muxía contra o actual alcalde do PSdeG e inicia un expediente contra a concelleira. Ao tempo, o Bloque "critica e rexeita a actitude do actual rexedor, despótica e pouco democrática, contribuíndo a xerar un clima de crispación do que é o único responsable e que en nada beneficia a boa gobernanza do concello" e lamenta que a dirección do PSdeG non "adopte ningunha medida" fronte a esas "actitudes de desprezo coas forzas da oposición".