Monbus suspende dende mañá, 14 de xullo, o desconto adicional do 45% nos seus traxectos de concesións da Xunta onde compite co tren, que sumado á subvención pública do 50% derivaba en viaxes con custo reducido ao 95%. A principal concesionaria do sector en Galicia alega "falta de persoal de condución e outros problemas como a suba de custos xeral". "A necesidade de manter o equilibrio económico dos contratos e unha mínima rendibilidade económica obriga agora a frear a campaña", afirman nun comunicado.
Fálase
José Manuel Baltar preside por derradeira vez o pleno da Deputación de Ourense. Foi este mércores, na sesión extraordinaria para aprobar actas pendentes, que durou apenas un minuto. O vindeiro pleno será o do vindeiro día 17, para constituír a nova corporación e no que previsiblemente será elixido como presidente Luis Menor, alcalde popular do Pereiro de Aguiar, cos votos do PP e de Democracia Ourensana. [Imaxe: © Deputación de Ourense]
- Baltar reaparece para advertir de que "non marcha" tras afirmar Rueda que tamén deixará o liderado do PP de Ourense
- O acordo PP-PSdeG e a promesa de Rueda que romperon os populares para volver pactar con Jácome
- A dinastía Baltar declina e inxecta na dereita galega doses de incerteza descoñecidas dende Fraga
A lucense Adiaratou Iglesias, medalla de ouro nos 200 metros lisos no campionato do mundo de atletismo paralímpico que se está a celebrar en París. A atleta do Lucus Caixa Rural xa lograra a prata nos 100 metros lisos e ten asegurada a praza nos Xogos Paralímpicos, que tamén se celebran na capital francesa o vindeiro ano. Imaxe: [© International federation of Paralympic athletics]
O Parlamento Europeo aproba a proposición de lei de restauración da natureza malia ao voto en contra do PP e da extrema dereita. O texto, co deputado socialista César Luena como relator, saíu adiante con 336 votos a prol, 300 en contra e 13 abstencións. Entre as medidas contempladas na norma figura que o 20% das áreas terrestres e marítimas da Unión Europea conten con políticas de recuperación de aquí a 2030 e outras accións para combater a crise climática. Na imaxe, un intre da sesión plenaria en Estrasburgo [© Parlamento Europeo]
23X | Feijóo defende que en Galicia "nunca dedicou un minuto de campaña electoral" a explicar que non é "un mentireiro" porque "eu non minto". "Non minto no goberno, nin nun mitin, nin no partido nin en ningures", afirmou o ex-presidente e candidato do PP durante un mitin en Murcia acompañado de José María Aznar. [Imaxe: © PP]
O Supremo rebaixa a condena a Francisco Fernández Liñares, ex-presidente da Confederación Hidrográfica do Miño-Sil, por suborno e prevaricación. O que tamén fora edil socialista en Lugo foi condenado pola Audiencia Lucense en 2021 a 5 anos de cadea e 20 de inhabilitación e agora o alto tribunal estima que houbo "falta de motivación" nas condenas impostas e agrega que non ve "razóns concretas" que "xustifiquen exacerbar" as penas alén dos mínimos previstos, polo que as deixa en 4 anos e medio de prisión e 8 e medio de inhabilitación. Si ratifica que Liñares adxudicou obras da CHMS "a empresarios cos que se puxera de acordo a a cambio de diñeiro ou prestacións de traballo nas súas propiedades". Na imaxe, Liñares tomando posesión como presidente da CHMS en 2009.
Centos de traballadores de ambulancias marchan por Santiago para reclamar un "convenio digno". CIG, CCOO, UGT e USO reclaman melloras nos salarios ligadas ao IPC e acusa a patronal de "paralizar" as negociacións. Foto: CCOO Galicia.
IPC | A inflación segue a conterse e o incremento interanual dos prezos en xuño en Galicia foi do 1,5% interanual, catro décimas menos que a media estatal e 1,3 puntos menos que en maio. O prezo dos alimentos, non obstante, está un 9,7% por riba do de hai un ano e na media estatal, un 10,2%.
- AMPLIAMOS 👉 A inflación en Galicia é case dez puntos menor á de hai un ano malia que o prezo dos alimentos segue a subir
- HEMEROTECA | Os salarios galegos apuntan a un aumento por riba da inflación tras dous anos de perda de poder adquisitivo
- HEMEROTECA | A inflación en Galicia situouse en maio no seu nivel máis baixo desde hai dous anos
Italia e os afeccionados do Inter renden a última homenaxe a Luís Suárez, mito galego do fútbol mundial, falecido o pasado domingo. O funeral polo coruñés tivo lugar na na parroquia de San Giuseppe Calasanzio, no barrio de San Siro, ao pé do estadio onde máis triunfou. Foto: imaxe da retransmisión ao vivo do funeral por parte do diario Corriere della Sera.
O Consello de Ministros aproba retirar a medalla do mérito ao traballo a Franco e outros oito dirixentes da ditadura, entre eles o ministro Fernández Ladreda, que foi tamén director da fábrica de armas da Coruña tras o golpe de 1936. A retirada próducese ao abeiro da Lei de Memoria Democrática e a vicepresidenta e ministra de Traballo, Yolanda Díaz, subliña que o "único traballo" destas persoas foi "violar os dereitos humanos e pisar a democracia". O PP inclúe no seu programa das eleccións do 23X a promesa de derrogar a lei de memoria democrática, que tamén implica a fin doutras honras coma o condado de Fenosa ou o señorío de Meirás. [Imaxe: © Pool Moncloa / Borja Puig de la Bellacasa]