Fálase

O incendio forestal de Herbón, en Padrón, xa queimou unhas 100 hectáreas. Comezou na tarde deste venres, marcada polas altas temperaturas, e segundo Medio Rural a primeiras horas desta mañá continuaba activo, pero cunha "evolución favorable". A Consellería non informa de máis focos, o que non implica necesariamente que non existan, senón que -caso de existiren- non cumpren os criterios da súa política informativa por non superaren as 20 hectáreas ou non atinxir a espazos habitados ou protexidos. Nas imaxes, vistas do incendio ao longo da tarde do venres [CC BY-NC-SA Praza.gal]

• HEMEROTECA | Todos os incendios de 2025 en Galicia: liberamos os datos

As temperaturas superaron este venres os 38 graos en Ourense e os 37 en puntos do sur de Pontevedra, como Salvaterra do Miño ou Ponteareas. En Santiago os termómetros superaron os 35 graos, en Vigo os 34 e mesmo na Coruña pasaron dos 30. Para este sábado espéranse valores semellantes na maior parte do país, con alerta amarela por calor no Sur de Lugo, Valdeorras, Baixo Miño e o val do Miño en Ourense.

• O risco da calor para a saúde pon máis de 80 concellos en alerta

O xuíz Calama da Audiencia Nacional cita tamén a Zapatero como investigado por delito fiscal e contrabando tras recibir unha taxación das xoias que a Garda Civil incautou no seu despacho por non estar a súa orixe "xustificada nestes momentos", segundo un auto que avanza infoLibre. Faino abrindo unha peza separada pola que lle tomará declaración o mesmo día no que estaba citado polo caso Plus Ultra cando, di, pode "disipar a indiciaria ilicitude da posesión" das xoias "xa sexa acreditando a súa lícita adquisición ou correcta importación". [Imaxe: © Senado]

• HEMEROTECA | Os retos do caso contra Zapatero: probar xestións coa SEPI, Facenda ou o Goberno para Plus Ultra
• HEMEROTECA | O xuíz acusa a Zapatero de ser xefe na sombra dunha rede empresarial corrupta

O Concello de Cedeira fará filla predilecta e dedicará unha praza a Nisa López Amado, unha das fundadoras das Madres de la plaza de Mayo e natural da vila, desde onde emigrou á Arxentina. 

O pleno municipal votou de maneira unánime a moción presentada polo goberno de coalición de PSdeG e BNG para honrar a quen foi represaliada polo franquismo. Emigrada xa en Bos Aires, a ditadura militar secuestrou a seu fillo e a súa nora, que nunca máis apareceron. 

O 96,25% do alumnado aproba a selectividade en Galicia. Segundo os datos ofrecidos pola CIUG, superaron a PAU (Proba de Acceso á Universidade) 11.102 dos 11.534 estudantes que participaron na fase xeral, superando a porcentaxe de aprobados do pasado ano (95,58%) e mais a de hai dous (96,02%). 

• A Xunta aproveita os erros na selectividade para acelerar o plan de control da comisión que a organiza
• As universidades ratifican que a Xunta ignora hai dous anos o seu plan para "minimizar erros" na selectividade
• A Xunta cre "testemuñal" o seu papel na CIUG, onde a representa o cuestionado xefe da Inspección

Xoel López comporá o novo himno do Deportivo e anuncia un tema "coral" e con "moitas colaboracións" vencelladas á música tradicional e á cultura popular. 

A obra, enmarcada nos actos do 120º aniversario do club, pretende "representar a identidade do Deportivo desde unha ollada contemporánea, respectando profundamente a historia, os símbolos e os valores que o acompañarone a súa afección ao longo de xeracións", segundo indica a entidade. 

Un buque portavehículos de SAIC chegará en xullo ao porto exterior de Ferrol para testar o peirao de cara á futura planta que o grupo chinés prevé en Caneliñas. O Anji Forever, da súa filial loxística, ten 228 metros de eslora e 38 de manga e porta bandeira de Liberia e navega nesta altura polo perto do estreito de Malaca, en Malaisia. Foto: MG. 

• Transición verde e 'made in Europe': a UE define o peso da industria galega na planta de MG
• ✍️ SAIC en Ferrol: Galicia na nova xeografía industrial de China. Por Xulio Ríos

A Torre de Xesús da Sagrada Familia de Barcelona ilumínase por primeira vez tras a bendición do papa León XIV na misa solemne celebrada no centenario da morte do seu autor, Antoni Gaudí. As obras deste elemento central da basílica catalá culminaron o pasado febreiro e nelas foi clave a pedra fornecida pola empresa lucense PCM Granitos. O evento deste mércores, presidido polo pontífice, estivo acompañado dun maxestoso espectáculo de música, luz e son que finalizou cunha composición da figura do arquitecto a contemplar a obra mediante drons. Nesta ligazón pódese recuperar a gravación íntegra da celebración.

Desaloxado o campamento de dependentas do téxtil ante a sede da patronal galega en Santiago. O persoal, que trasladou a acampada reivindicativa desde A Coruña, reclama un acordo galego que blinde os convenios provinciais ante os "recortes de dereitos" do convenio estatal de ARTE. O presidente da patronal, Juan Vieites, criticou as protestas por "exceder os límites, tanto na Coruña como en Compostela". Foto: CC-BY-NC-SA CIG. 

• Dependentas trasladan a acampada por un acordo galego para o téxtil ás portas da patronal

O popular Fernández Mañueco, reelixido presidente de Castilla y León á fronte dun bipartito con Vox. O pacto, na liña dos xa asinados pola formación de Feijóo noutros territorios, outorga a Vox unha vicepresidencia e tres consellerías e contempla diversas promesas contra as persoas migrantes como a discriminación no acceso a servizos públicos, entre outras. [Imaxe: © Cortes de Castilla y León]

• HEMEROTECA | Os 'contratos' de Feijóo: da "austeridade" ás teimas da internacional reaccionaria
• HEMEROTECA | Máis dereitas en Castela e León tras 40 anos fronte a un estable PSOE