Fálase

"Compromiso político" de Inés Rey e Alfonso Rueda para pactaren a ordenación e usos futuros dos terreos portuarios da Coruña. Nunha xuntanza en San Caetano, a alcaldesa coruñesa e o presidente da Xunta anunciaron o que denominan unha "nova etapa de colaboración para avanzar na apertura do porto á cidade" que pasa por dar por "superados" os convenios de 2004. Esa nova xeira, din, comezará a concretarse este mesmo mes de maio nunha xuntanza de todas as Administracións implicadas (Xunta, Estado e Concello). [Imaxe: David Cabezón / Xunta]

• HEMEROTECA | O Concello da Coruña rexeita agora a compra dos terreos dos peiraos xa que o Porto pode pagar por si mesmo a súa débeda 
• HEMEROTECA | 20 anos despois do Prestige, o tráfico de petroleiros comeza a abandonar o porto interior da Coruña
• HEMEROTECA | A Coruña volve pasear polos seus peiraos: uso público para terreos públicos á espera dunha solución para San Diego
• HEMEROTECA | O Estado rexeita de vez condonar a débeda do Porto da Coruña nun cumio que enterra os convenios de 2004

Concello de Santiago e Ministerio de Economía acordan un cambio de usos nos antigos terreos do colexio Peleteiro, en pleno Ensanche da cidade, para "priorizar o seu uso residencial", segundo confirman ambas institucións tras un encontro entre ambas encabezado pola alcaldesa, Goretti Sanmartín, e mais o ministro, Carlos Cuerpo. As mudanzas na operación, pendente dende hai varios mandatos na capital galega, "pasarían por reducir o uso comercial e demais usos terciarios e incrementar o uso residencial, incluíndo vivenda protexida", sinala o Goberno local. 

O acordo co Ministerio é preciso porque o futuro dos terreos depende da Sareb, o banco malo, que ata agora contemplaba para a parcela, entre outros aspectos, un centro comercial e apartamentos turísticos. Sanmartín vén fixando o desbloqueo desta operación como "un dos obxectivos do mandato". Imaxes do encontro divulgadas polo Ministerio de Economía.

106 persoas presentan a súa candidatura para dirixir a Axencia Española de Supervisión de Inteligencia Artificial (AESIA), cuxa sede estará na Coruña. Un grupo de persoas expertas conformado por Jordi Torres, experto en arquitecturas de computación de alto rendemento; Claudio Feijóo, especialista en economía dixital; Nuria Oliver, investigadora en modelos computacionais de comportamento humano; e mais o filosofo político Daniel Innerarity formularán á Secretaría de Estado de Dixitalización e Intelixencia Artificial as súas avaliacións para o nomeamento, que se concretará durante o mes de maio. O resto do persoal da AESIA será seleccionado durante o mes de xuño. Na imaxe, o edificio da Terraza, que acollerá a sede da AESIA.

• O galego procura a súa normalización na Intelixencia Artificial da man dunha "histórica" lei europea
• HEMEROTECA | A Coruña consegue para Galicia a sede da Axencia estatal de Intelixencia artificial

"E o mar", a nova homenaxe d'A Banda da Loba a Luísa Villalta. Con este poema feito canción queren reivindicar a cara máis social da autora destacada no Día das Letras, "que formou parte do movemento Nunca Máis ou escribiu posicionándose do lado do pobo palestino nesta guerra que semella non ter fin". No videoclip unha muller que viviu de nena a catástrofe do Prestige volve ás praias, esta vez para recoller 'pellets'.

Pontón anima á participación na mobilización convocada por Queremos Galego para o Día das Letras. Nun encontro co presidente d'A Mesa pola Normalización Lingüística, Marcos Maceira, a portavoz nacional do BNG chamou á mobilización "fronte ás políticas desgaleguizadoras do PP" para reclamar medidas como a derrogación do "decreto da vergoña" aínda vixente ou o cumprimento íntegro do Plan Xeral de Normalización da Lingua Galega, aprobado por unanimidade hai agora vinte anos.

• Queremos Galego chama a manifestarse o 17 de maio para reclamar a aplicación do Plan de Normalización aprobado hai 20 anos

Feijóo anuncia que a semana que vén irá ver unha tourada a praza de Las Ventas (Madrid) para "defender a liberdade cultural". O ex-presidente da Xunta e actual líder do PP indica a través das redes sociais que non é "un gran entendido no mundo dos touros" pero ten " claro" que a "defensa da cultura non depender do gusto de ningún gobernante", di tras a supresión dun premio de tauromaquia polo Ministerio de Cultura. Durante a súa etapa como presidente, Feijóo asistiu en varias ocasións ás touradas na praza de Pontevedra, algunha delas acompañado polo actual presidente, Alfonso Rueda. Na imaxe, unha tourada na Coruña antes da súa desaparición por falta de subvencións públicas.

• HEMEROTECA | "As touradas son unha actividade anacrónica que mancha a imaxe de Pontevedra"
• HEMEROTECA | A Xunta evita prohibir as catro touradas que quedan en Galicia

Os Premios Feroz 2025 e 2026 entregaranse en Pontevedra. O alcalde da cidade, Miguel Anxo Fernández Lores, vén de anuncialo xunto a María Guerra, presidenta da Asociación de Informadores Cinematográficos de España, organizadora dos galardóns, nos que compiten películas, series e obras audiovisuais de non ficción. É "un gran día para Pontevedra e Galicia", celebra o rexedor, que concreta que a entrega do ano vindeiro se celebrará o 25 de xaneiro nunha gala coa asistencia de máis de mil persoas. 

• AMPLIAMOS 👉 Pontevedra vestirase de gala para acoller os Premios Feroz en 2025 e 2026

Feijóo liga "inmigración ilegal" con ocupación de vivendas na recta final da campaña electoral catalá, na que o PP aspira a superar a Vox: "Ocupan os nosos domicilios e nós non podemos entrar nas nosas propiedades", afirmou nun mitin. O ex-presidente da Xunta e actual líder do PP é propietario de tres vivendas, segundo a declaración de bens que presentou no Congreso. [Imaxe: © PP]

• HEMEROTECA | O regreso de Puigdemont e catro claves máis sobre a batalla do 12M
• HEMEROTECA | A Xunta de Feijóo reduciu a cero a nova vivenda pública de alugueiro malia aos milleiros de peticións pendentes

O BNG lanza a candidatura de Ana Miranda ás europeas co reto de lograren escano propio para toda a lexislatura. O escano do Bloque "foi o escano do pobo galego e así o vai seguir sendo a partir do 9 de xuño con máis forza", defende Ana Pontón. O vindeiro domingo, a formación soberanista dá a saída simbólica á carreira electoral do 9X cun encontro nacional en Vigo.

• Europeas 9X: xa están aquí (e poden pactar entre eles)
• Unanimidade no BNG para que Ana Miranda repita candidatura ás europeas
• O BNG recunca na coalición Agora Repúblicas para as eleccións europeas xunto a ERC, Bildu e Ara Més

O Colexio Profesional de Xornalistas de Galicia e o Club de Prensa de Ferrol retiran o nome de José Couso do Premio Internacional de Liberdade de Prensa que organizan, atendendo á petición expresa da familia Couso Permuy, segundo publican nun comunicado. O Premio Internacional de Liberdade de Prensa –recolle dito comunicado– ten o obxectivo de recoñecer e difundir o traballo dunha persoa viva ou organización existente destacada na defensa da liberdade de prensa ou cunha salientable traxectoria profesional, libre e independente. As galardoadas nesta última edición [Na imaxe CC-BY-SA CPXG] foron as xornalistas iranianas Nilufar Hamedi e Elahe Mohammadi, coñecidas por informar do caso de Mahsa Amini. 

• As iranianas Nilufar Hamedi e Elahe Mohammadi, condenadas a prisión polas súas informacións, gañan o Premio Couso