Fálase

O BNG proponse unha "ofensiva competencial" que teña como "primeiro reto acadar todas as transferencias pendentes no Estatuto de 1981, as aprobadas polo Parlamento galego e as que xa teñen as outras dúas nacións históricas". No marco dunha xornada coa Fundación Galiza Sempre sobre "un novo status político" para o país, Ana Pontón sitala como "tarefa de país imprescindible" o "avance en autogoberno real" mentres o PP, lamenta, "tras non lograr máis ca unha competencia en 17 anos", agora "dá un paso máis boicoteando o autogoberno" en traspasos coma o da AP-9.

• AP-9, e agora que? Unha incerta negociación cun ollo na UE
• HEMEROTECA | As competencias pendentes de Galicia: o traspaso da xestión do litoral abre a porta a novas transferencias
• HEMEROTECA | Galicia obtén 17 anos despois a primeira competencia dende a fin do Goberno de PSdeG e BNG

Feijóo reafírmase nas súas posturas da última semana sobre as baixas laborais, o voto exterior ou a consideración legal dos "concibidos non nacidos": "Se hai críticas dáme igual porque estou aquí para dar debates valentes", gabouse no congreso das Nuevas Generaciones do partido.

• O PP simula redescubrir o voto exterior que sempre buscou para lanzalo contra Sánchez
• A Xunta merca nova sede en Bos Aires por 1,4 millóns en plena cruzada do PP polo voto exterior
• A Xunta computa hai quince anos o "concibido non nacido" para axudas públicas
• A axenda patronal contra as baixas esténdese en Galicia mentres Feijóo a promete para España

O Concello de Vigo prohibe a pantalla xigante que a deputación de Pontevedra instalara na praza da Estrela para ver o España-Bélxica do Mundial. A entidade provincial acusa o alcalde Abel Caballero de "sectarismo". O Concello asegura que o espectáculo "carece de autorización municipal e non se poderá levar a cabo mentres non dean cumprimento aos requisitos previstos na lexislación vixente".

A Xunta declara a caducidade definitiva do proxecto de Altri para instalarse en Palas de Rei. A conselleira de Economía, María Jesús Lorenzana, confirma que as alegacións presentadas pola compañía non foron "consideradas suficientes para continuar co expediente" e por iso "vimos de resolver de xeito definitivo e firme o arquivo", contra o que a empresa xa non ten marxe administrativa alén dun último recurso de reposición, a partir do cal para tentar reverter a decisión tería que acudir aos tribunais. [Imaxe: Praza.gal]

• AMPLIAMOS 👉 Altri non: o arquivo do plan para instalarse en Palas vira definitivo
• Altri alega contra o arquivo do seu proxecto porque a subestación eléctrica "non é imprescindible"
• HEMEROTECA | Altri e Pemex: o fracaso dos dous grandes proxectos industriais apadriñados por Feijóo
• HEMEROTECA | Finalmente, Altri non

O Adif remata o arranxo da conexión eléctrica no Irixo cuxa avaría causou importantes demoras en todos os trens que empregan a liña de alta velocidade Ourense-Santiago dende o mércores. A incidencia na catenaria está "solucionada" e a circulación "tende a normalizarse", indica o Administrador de Infraestruturas Ferroviarias. Na imaxe, trens AVE e Alvia na estación de Ourense [CC BY-NC-SA Praza.gal]

• Unha avaría eléctrica que estragou un tren, orixe das demoras ferroviarias que Adif prevé ata o venres

Cando menos 11 persoas morren nun incendio forestal en Andalucía. Segundo informa o Goberno andaluz, as vítimas foron achadas no interior dos seus vehículos na contorna do lume, que atinxe a Los Gallardos, en Almería. [Imaxe: Junta de Andalucía]

O PP aproba no Senado modificacións na lei do traspaso da AP-9, que volve ao Congreso, onde será aprobada definitivamente co texto pactado por PSOE, BNG e Sumar. Os populares aseguran que as súas mudanzas "recuperan a proposta orixinal do acordo unánime do Parlamento" para evitar que a Xunta asuma riscos económicos. O PSOE defende o texto que acabará saíndo adiante e advirte de que "o que non poden soportar" no PP é que, coa lei do traspaso "finaliza o relato avariado e trampulleiro" co que "levan 25 anos enganando". O BNG, pola súa banda, mantén que o texto que será aprobado definitivamente na Cámara Baixa dá supón "plenas competencias e blindaxe económica para a Xunta". Na imaxe, José Manuel Barreiro (PP), César Mogo (PSOE) e Carme da Silva (BNG), durante o debate no Senado [PP/PSOE/BNG]

• Rueda reduce a "estafa" o traspaso aprobado da AP-9, Pontón e Besteiro veno ás ordes de Madrid
• AP-9, e agora que? Unha incerta negociación cun ollo na UE
• O Congreso aproba o traspaso da AP-9, que chega máis lonxe ca nunca malia o "non" de PP e Vox

O Ministerio de Traballo suspende a tramitación do convenio estatal do téxtil asinado pola patronal ARTE e CCOO e rexeitado masivamente en Galicia. Require a correción de numerosos artigos por non axustarse á lexislación, segundo advirten UGT e mais a CIG, sindicatos que se opuxeron frontalmente ao acordo e convocaron varias folgas e mobilizacións no sector. 

• Asinado o convenio téxtil estatal que varias autonomías esquivan cun acordo que non chega en Galicia

Os trens circulan por vía única entre Ourense e O Irixo por mor dos traballos do Adif para arranxar a avaría na infraestrutura eléctrica á altura da vila ourensá que causou este mércores importantes atrasos. Renfe informa que por mor destes labores estima "demoras de 20 minutos" en todas as liñas ao pasaren por ese punto. Na imaxe, de arquivo, trens Alvia e AVE na estación de Ourense [CC BY-NC-SA Praza.gal]

• AMPLIAMOS 👉 Unha avaría eléctrica que estragou un tren, orixe das demoras ferroviarias que Adif prevé ata o venres

Directivos de SAIC, recibidos en Monte Pío polo presidente da Xunta tras a chegada do primeiro buque portavehículos da empresa automobilística chinesa ao porto exterior de Ferrol. Tras esta reunión co vicepresidente de SAIC, Wu Bing, e co 'número dous' da súa división de vehículos de pasaxeiros, Shi Lei, este xoves as instalacións portuarias acollen un acto oficial para solemnizar este envío, considerado o paso inaugural da instalación da compañía en Galicia. 

• 📺+INFO 👉 A Xunta recibe a SAIC ofrecendo "todo o posible" para que transforme "o futuro industrial de Galicia"
• As cifras de SAIC en Ferrol: 1.500 empregos na construción e 2.000 en funcionamento, dende o 2031
• SAIC en Galicia: entre a teima polos prazos e o receo a un cambio na Moncloa
• "A presión social, sindical ou da Xunta é clave para que SAIC achegue máis valor engadido a Galicia"