A Real Academia Galega celebrou este martes unha xornada de homenaxe a Nélida Piñón, académica de honra e unha das grandes autoras brasileiras do século XX, con raíces en Cotobade, finada hai dous anos. “En Nélida Piñon a escritura vence a morte”, salientou a académica Marilar Aleixandre, coordinadora do encontro, no que tamén participaron Karla da Silva, compañeira de Nélida, e Antonio Maura, estudoso da súa obra.
Manuel Rivas gaña o Premio Nacional das Letras que concede o Ministerio de Cultura. O xurado destaca a "extraordinaria calidade narrativa" do autor nunha "traxectoria versátil e coherente construída coa sensibilidade e defensa da memoria histórica, a responsabilidade social e a lingua galega". "Poucos autores, partindo dun compromiso firme coa súa lingua, conseguiron alcanzar tal recoñecemento a nivel mundial", agregan. O pasado setembro en Praza.gal conversamos con Manuel Rivas ao fío da súa última novela, Tras do ceo. [Imaxe: CC BY-NC-SA Praza.gal]
Yolanda Díaz recoñece que Sumar chegou “tarde” no caso Errejón, asegura que a única maneira de amañalo é “facéndoo moito mellor” e incide en que non tivo coñecemento dos feitos ata a noite do pasado martes. “Se chego a sabelo antes tería actuado coa mesma contundencia”, afirmou
“Estase creando unha nova cultura política que xa non tolera a impunidade. O feminismo e as mulleres cambiaron este país a mellor”. Estas foron as reflexións iniciais da vicepresidenta segunda do Goberno de España e líder de Sumar, que animou a todas as mulleres a denunciar as violencias machistas. “Cando falamos de que o persoal é político referímonos a isto: exemplaridade na vida pública e tamén na privada”, sentenciou este luns desde o Congreso para engadir que “hai que rematar coa cultura da impunidade”.
O persoal mobilizado dos medios públicos galegos cumpre dez días de folga que volveron notarse na interrupción da emisión na TVG e nunha concentración en Vigo, onde ademais de reclamar o freo da externalización da produción denunciaron o "desmantelamento" das delegacións territoriais "que impide a axeitada cobertura informativa" de todo o país. A eurodeputada do BNG, Ana Miranda, acompañou os traballadores e traballadores na concentración ás portas da central da CRTVG en San Marcos e animounos a volver intentar que a súa loita chegue a Bruxelas.
O BNG pide ampliar a moratoria de plantación de eucaliptos que remata dentro dun ano e a conselleira de Medio Ambiente di que "é demasiado cedo" para decidilo. A moratoria -implantada en 2021 pero limitada a zonas nas que aínda non había eucaliptos, non para replantalos- remata a finais de 2025 e a Xunta asegura que daquela "tomarase a determinación necesaria".
Morre Ana Messuti (Bos Aires, 1946), unha das avogadas na querela arxentina contra os crimes do franquismo iniciada en 2010. Doutora en Dereito e ex-funcionaria da ONU, Messuti recibiu hai uns meses unha homenaxe pública en Madrid. Nesta entrevista con Praza.gal reclamaba que "non se pode seguir enarborando a Transición para frear a querela contra os crimes do franquismo" e concluía: "mentres haxa quen pida xustiza, isto non vai rematar"
Esta noite cambia a hora. Ás 3 volverán ser as 2 para entrar no horario de inverno, de xeito que amencerá unha hora antes e tamén se porá o sol unha hora máis cedo. Este luns, por exemplo, o sol sairá en Galicia ás 8:03 e desaparecerá por completo ás 18:32.
Israel bombardea Irán. O ataque israelí desta madrugada estivo centrado en obxectivos militares, evitando instalacións petrolíferas, como solicitaba EUA e moitos dos mísiles foron interceptados polas defensas antiaéreas. O goberno iraniano promete unha “reacción proporcional”.
BNG e PSdeG pedirán que comparezan a parella de Ayuso e o cuñado de Feijóo na investigación do Parlamento sobre os contratos da Xunta, pero o PP pode vetalos. A axencia Europa Press conta na súa web que a oposición formalizará o vindeiro luns as súas peticións de comparecencias. O presidente Rueda xa avanzou que acudirá se é citado, pero a maioría absoluta do PP controlará as comparecencias, o funcionamento e as conclusións da comisón. Na foto, Rueda e Ayuso este venres nunha homenaxe no Porriño ao arquitecto Antonio Palacios, nunha imaxe da Deputación de Pontevedra.
Na novena xornada de folga do persoal da CRTVG, na que de novo se "paralizou" a emisión de O Termómetro -o programa matinal encargado a unha produtora externa-, a xornalista Tereixa Navaza achegouse á concentración convocada ás portas da sede da radiotelevisión pública para "trasladarlles folgos e louvar a dignidade desta loita en defensa dos medios públicos".
