O PP presenta outra moción de censura, desta vez en Manzaneda, apoiado en dous tránsfugas do PSdeG. Será a oitava alcaldía que os populares gañen neste mandato apoiados en edís tránsfugas ou de partidos independentes. Amable Fernández (na foto) perderá o bastón de mando en favor de Pedro Yáñez.
Remata o prazo para remitir propostas cidadás ao novo Plan Xeral de Normalización da Lingua Galega. A Secretaría Xeral da Lingua indica que recibiu unhas 300 achegas a través desta caixa de correo en internet pechada este 15 de outubro. Súmanse ás "máis de mil" recompiladas polos grupos que están a traballar na "actualización" do plan. Indica o secretario xeral, Valentín García, que o proceso encara xa "a súa última fase" e contra finais de ano "está prevista a redacción definitiva do texto por parte da comisión técnica na que quedarán reflectidas as medidas de promoción e impulso do uso do galego nos distintos sectores e ámbitos".
O Goberno de España entrega a Anxo Quintana a Medalla á Promoción dos Valores da Igualdade. O ex-vicepresidente da Xunta e antigo líder do BNG é unha das 94 persoas ás que o Ministerio de Igualdade outorgou esta distinción pola súa contribución, como membros das Cortes, á aprobación da Lei Integral contra a Violencia de Xénero, de cuxa entrada en vigor se fixeron recentemente vinte anos. Quintana, daquela senador en representación do Parlamento, agradeceu o recoñecemento durante o acto de entrega, celebrado na Subdelegación gobernamental en Ourense, e subliñou que daquela "pensabamos que aquilo era un primeiro paso importante", se ben "resulta preocupante que a día de hoxe esteamos inmersos nunha batalla por conservar os dereitos das mulleres e os principios de igualdade". [Imaxe: © Goberno de España]
O Goberno de España lamenta a ausencia da Xunta na Convención para un Pacto de Estado Fronte á Emerxencia Climática que está a celebrar en Ponferrada. O delegado gobernamental en Galicia, Pedro Blanco, ve "difícil de entender que cando Galicia sofre peores vagas de lume, calor e secas, a Xunta non estea á altura e non participe" pero, ao mesmo tempo, "reclame máis recursos". Que o Executivo galego non asista, lamenta Blanco, evidencia que "están máis pendentes de seguir as directrices do PP" que de combater a crise climática. O encontro, no que este martes interveu Pedro Sánchez, aborda o primeiro informe estatal de riscos climáticos, que inclúe alertas sobre ameazas ao subministro de auga, enerxía e alimentos. Na imaxe, a ministra para a Transición Ecolóxica, Sara Aagesen, inaugurando o encontro. [© La Térmica Cultural]
Feijóo reclama "elevar o nivel de esixencia lingüística e cultural" para acceder á nacionalidade española. O ex-presidente e actual líder do PP presenta o seu novo programa en materia migratoria e asegura entre apelacións á "orde" ter intención de "devolver á nacionalidade o seu sentido máis elevado" para que sexa "un mérito" e "un premio ao esforzo" e non "unha simple xestión". Porque "a nacionalidade española non se regala, merécese", sostén Feijóo en plena pugna demoscópica con Vox. [Imaxe: © PP]
O Son do Camiño e Alfonso Rueda anuncian a actuación de Katy Perry. A organización do festival e o presidente da Xunta difunden simultaneamente a presenza da cantante estadounidense no evento patrocinado polo Goberno galego, que se celebra do 18 ao 20 de xuño do ano que vén en Santiago.
Trump e os líderes de Exipto, Catar e Turquía asinan un acordo entre Israel e Hamás para a fin dos ataques en Gaza. A sinatura tivo lugar ante unha trintena de xefes de goberno, entre eles Pedro Sánchez.
Varios incendios na fin de semana queimaron xa máis dun cento de hectáreas en Galicia. O de Duio, en Fisterrra, quedou extinguido tras arrasar arredor de 25, mentres que outros dous na Gudiña e Rodeiro, xa controlados segundo informa a Xunta, calcinaron 60 e 29 respectivamente. Servizos de extinción informaron tamén de fogos en Muíños, Celanova ou Vilardevós nos últimos días. Fotos: @Lumesgal.
O PP volve gobernar Ribeira tras saír adiante a moción de censura contra o ata agora alcalde, Luís Pérez Barral (BNG), cos votos a prol dos populares e 3 dos 5 edís do Partido Barbanza Independiente (PBBI), integrante do goberno municipal canda ao Bloque e o PSdeG dende 2023. Na imaxe a nova alcaldesa, María Sampedro, tras ser investida no cargo despois dun tenso e concorrido pleno municipal. Foto: PP A Coruña.
O PSOE supera o PP por 15 puntos de diferenza no último barómetro do CIS, que segue a elevar a estimación de voto de VOX, a só dous puntos da formación liderada por Núñez Feijóo, que baixa case cinco puntos no último mes. A enquisa do instituto público realizouse do 1 ao 7 de outubro, en pleno debate sobre o dereito ao aborto e nun contexto de protestas ante o xenocidio israelí en Gaza.
