Fálase

Santiago celebra este xoves a recepción oficial e inicio da exposición das esculturas do Mestre Mateo recuperadas tras 70 anos de espolio dos Franco. O acto organizado polo Concello no Museo do Pobo Galego, que acolle as pezas dende a pasada semana, poderá seguirse ao vivo a través desta ligazón. Nel están previstas intervencións da alcaldesa, Goretti Sanmartín, e representantes dos dous gobernos municipais previos, o encabezado por Martiño Noreiga, que iniciou o preito para recuperar as estatuas, e o liderado por Xosé Sánchez Bugallo, que o continuou. [Imaxe: © Concello de Santiago]

• AMPLIAMOS 👉 Santiago celebra o "triunfo colectivo" da recuperación das esculturas do Mestre Mateo
• As esculturas do Mestre Mateo, na casa tras 70 anos de espolio franquista e oito de litixio

CIG-Ensino e STEG péchanse na Consellería de Educación "ata ter data de reunión co conselleiro" en vésperas da nova folga de profesorado, que ambas organizacións impulsan para os vindeiros días 16 e 17. O peche dunha quincena de delegados e delegadas en San Caetano prodúcese, explican, "despois de coñecerse polos medios de comunicación que se está negociando o adianto da baixada de ratios e da redución horaria en Secundaria" deixando "á marxe ao sindicato maioritario", a CIG-Ensino. "Permaneceremos aquí até ter unha data de reunión e mantemos as folgas da vindeira semana que coincidirán coa aprobación dos orzamentos da Xunta para 2026", sinala Laura Arroxo, secretaria nacional da CIG-Ensino. [Imaxes: CIG-Ensino] 

• CIG e STEG propoñen un "decembro negro" e de loito polo ensino público
• HEMEROTECA | O profesorado leva á rúa as súas demandas nunha folga que a Xunta reduce ao mínimo

Clun e Leite Celta únense para crear un gran grupo lácteo, cun volume de negocio de 600 millóns, 1.400 produtores e 800 empregados. Corporación Rural Láctea (CoRural), que agarda polo visto e prace de Competencia, terá a súa sede social en Santiago, segundo anunciaron hoxe ambas empresas. 

O Goberno de España envía ás Cortes a lei para asumir ata 83.252 millóns de euros da débeda das autonomías "que queiran", 4.010 deles de Galicia. O presidente da Xunta, en liña coa dirección do PP, vén reiterando o seu rexeitamento a esta medida, que descualifica como un "mal negocio" que Galicia "non necesita" e "non soluciona nada", cre Alfonso Rueda. Tanto o BNG coma o PSdeG instan o Goberno galego a aceptar a medida e os soberanistas subliñan que esa condonación é parte do acordo que Bloque e PSOE asinaron para a investidura de Pedro Sánchez. [Imaxe: Pool Moncloa / José Manuel Álvarez]

• HEMEROTECA | Rueda alega que Galicia "non necesita" que o Estado lle pague 1 de cada 3 euros da débeda
• HEMEROTECA | O Goberno de España ofrece asumir un terzo da débeda galega e Rueda retruca que "non soluciona nada"
• HEMEROTECA | O PP forza que o Parlamento esixa fondos para escolas infantís ao Estado tras devolverlle 22 millóns
• HEMEROTECA | Feijóo garante que Rueda non negociará o financiamento de Galicia de xeito bilateral co Estado

Liberado nos Ancares o voite negro rescatado no recinto feiral do San Froilán de Lugo o pasado outubro. Tras case dous meses no Centro de Recuperación de Fauna Silvestre do Veral, onde chegou "nun estado moi feble debido á baixa temperatura corporal e a unha lixeira deshidratación", explica a Consellería de Medio Ambiente, "deu rapidamente mostras de recuperación". Ten arredor dun ano de vida e pesa uns catro quilos e medio. "Para a súa liberación tivéronse en conta tanto as medidas hixiénico-sanitarias para evitar a introdución de enfermidades ou patóxenos no medio natural como as condicións ambientais", agrega Medio Ambiente sobre este exemplar xuvenil dunha especie "pouco habitual en Galicia". [Imaxe: CC BY-SA Xunta]

Ditada a sentenza do fiscal xeral do Estado: o Supremo condena a Álvaro García Ortiz baseándose na nota de prensa que non viu ilícita ao admitir o caso a trámite, informa infoLibre. Os cinco maxistrados conservadores da Sala ven probado que o xa ex-titular da fiscalía xeral filtrou un correo con datos do caso do noivo de Díaz Ayuso mentres que as dúas maxistradas consideradas da órbita progresista consideran, nun voto particular, que non existen probas ao respecto.

• 📄 DOCUMENTO | Consulta a sentenza íntegra
• HEMEROTECA | O Supremo inhabilita o fiscal xeral
• HEMEROTECA | Centos de persoas mobilízanse na Coruña e Santiago contra a condena ao fiscal xeral
• HEMEROTECA | As raíces galegas no aborrecemento ao fiscal xeral polo PP
• OPINIÓN | Dous galegos perante o Tribunal Supremo (e un destino)

Activada a alerta laranxa por vento no oeste e suroeste da Coruña. A Xunta vén de activar para este martes a alerta laranxa por vento no oeste e suroeste da provincia da Coruña. Ademais, mantense o nivel de aviso laranxa por temporal costeiro no litoral das provincias da Coruña e de Lugo. Segundo a Axencia Estatal de Meteoroloxía (Aemet), a alerta laranxa por vento activarase desde últimas horas do día de hoxe e agárdanse refachos de vento de ata 100 quilómetros por hora. A Xunta informa de que se suspende a actividade no exterior nos centros educativos e a actividade deportiva federada e do programa Xogade no exterior

Sirât, de Oliver Laxe, candidata a mellor filme estranxeiro e mellor banda sonora nos Globos de Ouro. A cinta do director galego competirá no apartado de mellor película de fala non inglesa c'O axente secreto ou A voz de Hind. 

• Oliver Laxe, de Cannes aos Ancares: "Confío no poder das imaxes"
• Oliver Laxe: "O cinema segue sendo un espazo onde experimentar cousas fortes que xa non experimentamos na vida"

Unha persoa falecida e seis feridas tras un incendio na súa vivenda en Palas de Rei. O sinistro tivo lugar na Graña (San Xiao do Camiño) por un lume que queimou o soportal da casa e os adornos de Nadal, segundo informa o 112. 

Máis dunha ducia de corredores completan a maratón entre Melide e Santiago contra a reapertura da mina de Touro e contra a instalación de Altri en Palas. 14 corredores de montaña percorreron os 51 quilómetros entre as dúas localidades para amosar o rexeitamento a estes dous proxectos, nunha marcha organizada polas plataformas Ulloa Viva e contra a Mina Touro-O Pino, que definen as dúas iniciativas empresariais como "os perigos ambientais máis importantes de Galicia".