O independente Javier Sar, novo alcalde de Muxía ao ser aprobada a moción de censura contra o xa ex-rexedor do PSdeG, Iago Toba, que gobernaba en minoría con 5 concelleiros. A remuda na alcaldía foi posible cos votos a prol de PP (3 edís), IxMuxía (2) e da concelleira do BNG, á que a súa formación abriu expediente por apoiar a censura. O novo goberno presidido por Sar será de coalición entre IxMuxía e o PP. Imaxe do sinal institucional do Concello de Muxía.
Confirmado como un caso de violencia machista o asasinato dunha muller de 41 anos en Domaio (Moaña) o pasado sábado. A Delegación do Goberno de España contra a Violencia de Xénero vén de ratificalo mentres o home, que xa tiña antecedentes por violencia de xénero, vén de pasar este luns a disposición xudicial. Organizacións feministas convocan mobilizacións para este serán; na imaxe, recompilación das convocatorias elaborada pola Marcha Mundial das Mulleres. Trátase do terceiro asasinato machista no que vai de ano en Galicia tras os acontecidos en Ribeira e A Coruña.
Os coches oficiais gasolina e diésel que vai mercar Presidencia serán da marca Škoda. A consellería que dirixe Diego Calvo está na recta final da adxudicación do contrato ao que só concorreu un concesionario, o compostelán Bonaval Móvil, que ofreceu o modelo Superb L&K 2,0 TSI DSG 7 para o coche de gasolina e o Superb L&K 2,0 TDI 142 kW DSG 7 para os tres diésel, en ambos casos da marca checa, por un custo total de 197.496 euros. Na imaxe, o modelo de coche de gasolina que se dispón a adquirir a Xunta, polo que abonará 50.499 euros. [© Škoda]
Varias persoas detidas en Santiago tras a manifestación a favor de Palestina. Os feitos tiveron lugar este domingo cando algúns dos participantes na marcha foron recriminarlle colaboración con Israel a un local de comida rápida da rúa Senra. Ante esta acción interveu a Policía Nacional, que detivo varias persoas e cargou contra varios manifestantes.
Milleiros de persoas claman en Compostela pola fin do masacre do pobo palestino. A chuvia non foi quen de disuadir a solidariedade do pobo galego co sufrimento palestino. Miles de persoas clamaron esta mañá en Compostela pola fin do masacre que está a perpetrar Israel. [Foto: Mar de Lumes]
Detido o condutor de Moaña polo homicidio, no ámbito da violencia de xénero, da muller que ía con el. A Garda Civil detivo o home de 47 anos de idade, veciño de Moaña, que conducía o vehículo que se precipitou ao mar á primeira hora da mañá do sábado desde o paseo de Domaio, como presunto autor dun delito de homicidio pola morte da muller que ía con el no coche. O home xa tiña antecedentes por violencia de xénero. A corporación municipal de Moaña convocou unha concentración para este domingo pola tarde como sinal de rexeitamento e condena “a tan terrible acto”.
Compostela acolle este domingo unha manifestación conxunta de apoio a Palestina. “Enchamos as rúas de Compostela de solidariedade coas nosas irmás palestinas, libanesas, iranianas... con todas aquelas que resisten e combaten o colonialismo e o terrorismo do estado sionista”, defenden dese a Marcha Mundial das Mulleres.
Máis de 190 entidades galegas asinan a convocatoria da Coordenadora Galega de Solidariedade coa Palestina para participar na manifestación deste domingo en Compostela. No aniversario da invasión sionista da Faixa de Gaza, denuncian “o xenocidio e a ocupación da Palestina”. A marcha sairá ás 12 horas da Alameda compostelá.
O subdelegado do Goberno ve “indicios preocupantes” de crime machista na morte dunha muller este sábado en Moaña. O condutor do coche sinistrado no Paseo de Domaio, en Moaña (Pontevedra), "acelerou notablemente" antes de que o vehículo se precipitase ao mar (de onde foi rescatado o cadáver da muller que o acompañaba), segundo sinalaron algunhas testemuñas, informa Europa Press Galicia. O subdelegado do Goberno na provincia, Abel Losada, recoñeceu que, neste suceso, ocorrido sobre as 5,00 horas deste sábado, "hai indicios preocupantes", xa que o condutor ten antecedentes por violencia de xénero, aínda que apelou á prudencia mentres se desenvolve a investigación da Garda Civil.
A veciñanza volve pedir o acceso libre á illa de Toralla. Asociacións veciñais e ecoloxistas concentráronse este sábado na praia do Vao (Vigo) para reclamar a entrada libre á illa e a senda peonil litoral aprobada en 2008.A asociación Veciñal de Coruxo, a Asociación Veciñal de San Miguel de Oia, a Plataforma pola Defensa da ría Vigo-Cíes, Amigas da Terra, Ecoloxistas en Acción e Greenpeace despregaron un pancarta xigante co lema de “Únete a reconquista de Toralla”.
Lara Méndez recibe o primeiro premio ‘Mulleres da Galeguidade’ na celebración do San Froilán de Barcelona. A parlamentaria socialista foi este venres a Pregoeira de Honra do San Froilán de NouBarris, conmemoración que organizan as asociacións Amigos de San Froilán e Xuntanza de Catalunya.
