Fálase

Compostela acolle este domingo unha manifestación conxunta de apoio a Palestina. “Enchamos as rúas de Compostela de solidariedade coas nosas irmás palestinas, libanesas, iranianas... con todas aquelas que resisten e combaten o colonialismo e o terrorismo do estado sionista”, defenden dese a Marcha Mundial das Mulleres. 

Máis de 190 entidades galegas asinan a convocatoria da Coordenadora Galega de Solidariedade coa Palestina para participar na manifestación deste domingo en Compostela. No aniversario da invasión sionista da Faixa de Gaza, denuncian “o xenocidio e a ocupación da Palestina”. A marcha sairá ás 12 horas da Alameda compostelá. 

•  ENTREVISTA | Susana Mangana: "A provocación a Irán serve a Netanyahu, que estaba a perder a batalla do relato e agora vólvese colocar no papel de vítima"
• Gaza, dez meses despois: o xenocidio segue sen que ninguén deteña a Israel
• ENTREVISTA | Bichara Khader: "O espertar da sociedade, tamén da galega, é útil para o pobo palestino"
• HEMEROTECA | Hamás ou o búmerang da historia: como Israel contribuíu á súa fundación

O subdelegado do Goberno ve “indicios preocupantes” de crime machista na morte dunha muller este sábado en Moaña. O condutor do coche sinistrado no Paseo de Domaio, en Moaña (Pontevedra), "acelerou notablemente" antes de que o vehículo se precipitase ao mar (de onde foi rescatado o cadáver da muller que o acompañaba), segundo sinalaron algunhas testemuñas, informa Europa Press Galicia. O subdelegado do Goberno na provincia, Abel Losada, recoñeceu que, neste suceso, ocorrido sobre as 5,00 horas deste sábado, "hai indicios preocupantes", xa que o condutor ten antecedentes por violencia de xénero, aínda que apelou á prudencia mentres se desenvolve a investigación da Garda Civil.

A veciñanza volve pedir o acceso libre á illa de Toralla. Asociacións veciñais e ecoloxistas concentráronse este sábado na praia do Vao (Vigo) para reclamar a entrada libre á illa e a senda peonil litoral aprobada en 2008.A asociación Veciñal de Coruxo, a Asociación Veciñal de San Miguel de Oia, a Plataforma pola Defensa da ría Vigo-Cíes, Amigas da Terra, Ecoloxistas en Acción e Greenpeace despregaron un pancarta xigante co lema de “Únete a reconquista de Toralla”. 

• REPORTAXE | Cara á reconquista de Toralla: “Vivo aquí porque non entran os okupas”

Lara Méndez recibe o primeiro premio ‘Mulleres da Galeguidade’ na celebración do San Froilán de Barcelona. A parlamentaria socialista foi este venres a Pregoeira de Honra do San Froilán de NouBarris, conmemoración que organizan as asociacións Amigos de San Froilán e Xuntanza de Catalunya.

• Seis cousas que debe saber se vai polo San Froilán a Lugo

O Tribunal de Xustiza da UE anula de vez os acordos de pesca e agricultura con Marrocos por asinárense sen consentimento do Sáhara Occidental. Estes pactos de 2019, subliña o TXUE en liña co xa ditaminado polo Tribunal Xeral da UE en 2021, "aos que o pobo saharauí non prestou o seu consentimento, celebráronse vulnerando os principios de autodeterminación". O acordo pesqueiro expirou en 2023. Na imaxe, a gran sala do tribunal [©TXUE]

• HEMEROTECA | Denuncian que o acordo pesqueiro UE-Marrocos esquece o pobo saharauí
• HEMEROTECA | O abandono histórico do Sáhara rexórdelle a España en Ceuta mentres Marrocos volve utilizar persoas migrantes como reféns

A escritora palestina Shahd Wadi será a Escritora galega universal en 2025 para a Asociación de escritoras e escritores en lingua galega. O consello directivo da AELG xustifica a escolla "desde o profundo respecto e afecto á súa persoa e a valoración da alta calidade da súa obra, así como por defender a dignidade nacional de Palestina e os dereitos individuais e colectivos da súa poboación, nomeadamente desde perspectivas feministas". 

Shahd Wadi [na imaxe, ©TBA] é autora do libro Corpos na trouxa: histórias-artísticas-de-vida de mulheres palestinianas no exílio (2017), onde investiga as narrativas artísticas no contexto da ocupación israelita da Palestina e considera as artes un testemuño de vidas, tamén da súa. 

A portavoz nacional do BNG, Ana Pontón, e a eurodeputada Ana Miranda asisten ao acto de investidura da nova presidenta de México, Claudia Sheinbaum. "Un momento emocionante poder compartir con miles e miles de mexicanas este día histórico no que, por primeira vez, teñen a unha muller presidenta que no seu discurso demostrou ademais que ten un proxecto para seguir transformando México, onde a igualdade é unha peza fundamental", sinalou Pontón. Na súa visita estreitaron lazos coa comunidade galega en México, con distintas reunións con empresarios e galegos e galegas residentes na capital, e intensificaron os contactos políticos da formación nacionalista a nivel internacional, con diferentes encontros como os que mantiveron co presidente do Senado, Gerardo Fernández Noroña, ou a nova ministra da Muller, Citalli Hernández.

Persoal das fundacións públicas de investigación biomédica (INIBIC, FIDIS e Fundación Biomédica Galicia Sur) e da Fundación pública de medicina xenómica concéntrase en Vigo [na imaxe CC-BY-SA CIG], na Coruña e Santiago para reclamar o inicio das negociacións para un novo convenio único que regule as súas condicións laborais, agora que dependen do Sergas. 

As e os profesionais responsables de toda a investigación que se realiza no eido da sanidade pública galega manteñen "unha diferenza importante" nas retribucións a respecto do resto do persoal do Sergas: "Non teñen dereito á carreira profesional e se lles nega o dereito ao cobro de trienios, como ao resto do persoal público", apunta dende a CIG Miguel Tizón.

• HEMEROTECA | O gasto en investigación aumenta en Galicia por debaixo da media española e afástase da converxencia cos datos estatais
• HEMEROTECA | Ángel Carracedo: "Cando empecei, a carreira universitaria estaba moi ligada á investigación e había máis posibilidades, agora está moi limitado"

O Goberno Vasco declara no municipio de Errenteria a súa primeira zona tensionada no mercado de alugueiro, o que permite empregar os mecanismos da lei estatal de vivenda para limitar prezos dos arrendamentos e prorrogar contratos. Tras Catalunya, Euskadi é a segunda autonomía en activar esta figura, á que a Xunta se opón en Galicia, e avanza que "ten en marcha" esta mesma declaración para outras tres localidades. O anuncio foi realizado polo conselleiro de Vivenda do Goberno Vasco, Denis Itxaso (PSE) e a alcaldesa de Errenteria, Aizpea Otaegi (EH Bildu), na imaxe, do Goberno Vasco.

• DATOS | País de propietarios, rendismo popular e alugueiro disparado á espera dos gobernos
• HEMEROTECA | Fronte da Xunta coas inmobiliarias contra os concellos que buscan limitar os alugueiros ao abeiro da lei estatal
• HEMEROTECA | A dirección central do PP sentencia que a Xunta non aplique os límites ao alugueiro que piden A Coruña e Santiago

O Estado de Israel declara persona non grata e prohíbelle á entrada ao secretario xeral da ONU, António Guterres, a quen dá en acusar de "apoiar a terroristas". Xustifican a decisión polas primeiras consideracións de Guterres tras o lanzamento de mísiles de Irán a territorio israelí, paralelas á invasión do Líbano por parte do Estado hebreo. Nese comunicado, o secretario xeral da ONU condenou a "escalada" do "conflito de Oriente Medio" e chamou por un alto o fogo". A finais de 2023 Israel xa acusara a Guterres de ser "un perigo para a paz mundial" por reclamar un alto o fogo en Gaza. [Imaxe: ©UN]

• HEMEROTECA | Israel acusa o secretario xeral da ONU de ser "un perigo para a paz mundial" por pedir un alto o fogo