Fálase

José Tomé fai efectiva a súa dimisión como presidente da Deputación de Lugo coa preceptiva comunicación do cesamento ao pleno. Tras esa sesión extraordinaria, a institución lucense celebra outra ordinaria xa dirixida polo nacionalista Efrén Castro como presidente en funcións, cargo que exercerá ata que, o 14 de xaneiro, sexa elixida a nova presidencia. Na súa despedida do posto Tomé, que continúa como deputado, reiterou que as acusacións de acoso sexual responden a "unha campaña" con intencións políticas "supraprovinciais" na que todos os feitos que lle atribúen son "falsos". Na imaxe, inicio do pleno con Tomé xa no escano de deputado e non de presidente.

• A permanencia de Tomé faino imprescindible na Deputación de Lugo e clave cara a 2027
• Tomé dimite como presidente da Deputación e secretario provincial do PSdeG pero segue como alcalde
• Varias mulleres denuncian no PSOE acoso sexual de José Tomé, que o nega

Unha comisión de festas de Carnota recada fondos en solidariedade coa da localidade leonesa de Villamanín, logo de que vendesen participacións de máis que impiden o cobro de catro millóns de euros do Gordo da Lotaría de Nadal. 

A Xunta volve conxelar as peaxes das autoestrada AG-55 A Coruña-Carballo e AG-57 Vigo-Val Miñor. Tras asumir con fondos públicos a suba das peaxes prevista para 2023 e 2024 e incrementalas un 1,7% para os usuarios neste 2025, o Goberno galego volve asumir a suba en 2026.

José Ramón Lete cesa como secretario xeral para o Deporte da Xunta tras 16 anos no cargo en tres etapas distintas. O novo responsable de Deporte será Roberto García Fernández. O Consello da Xunta tamén remudou varios altos cargos das consellería de Presidencia, Medio Rural e Mar. 

• AMPLIAMOS 👉 Remuda na cúpula de Medio Rural no peor ano de incendios

O crego de Xestoso dedica a súa homilía no Día dos Inocentes ao "xenocidio infantil" en Gaza. "A afirmación de que, se nacese hoxe, Xesús sería asasinado por ser palestino non é unha provocación teolóxica, senón unha interpelación ética. Xesús naceu pobre, nunha terra ocupada, e foi perseguido desde o berce. Lembralo sen mirar o que ocorre hoxe con outros nenos pobres e perseguidos é baleirar o Evanxeo de sentido", explica Luís Rodríguez Patiño. A lembranza "da matanza dos Santos Inocentes, o episodio bíblico no que o rei Herodes ordenou asasinar nenos indefensos por medo a perder o seu poder", evoca, "debería obrigarnos a preguntarnos que vidas consideramos dignas de ser choradas e cales aceptamos como danos colaterais. O silencio ante a morte dos inocentes nunca foi neutral: sempre favoreceu o verdugo". Rodríguez Patiño , que pronunciou esta homilía en Xestoso (Monfero) e Cambás (Aranga), exerce tamén en Momán (Xermade) e Labrada (Guitiriz).

• 'Xenocidio', palabra galega do ano con Gaza na mente
• HEMEROTECA | Cidades e vilas berran na rúa para "non deixar de falar de Palestina ata que sexa libre"

As asociacións Compostela por Palestina e Galiza por Palestina, xunto a outros colectivos composteláns, convocan unha acción simbólica na Praza do Obradoiro o domingo 28, ás 20 horas, para manifestar o rexeitamento á ocupación de Palestina e ao xenocidio que sofre o seu pobo. "Temos que gardar silencio cando as crianzas dormen, non cando están a matalas", subliñan os organizadores, que insisten en que "as nenas e nenos palestinos teñan a oportunidade de vivir unha infancia segura e digna". Dende a organización recomendan levar candeas. 

• 'Xenocidio', palabra galega do ano con Gaza na mente
• ENTREVISTA | Kamal Aljafari: "Que é o cinema sen memoria? E a memoria sen Palestina? Manteño esperanza porque creo na humanidade"
• HEMEROTECA | Cidades e vilas berran na rúa para "non deixar de falar de Palestina ata que sexa libre"

A Fundación Castelao clausura o Ano Castelao o domingo 28 cunha cerimonia musical no Panteón de Galegas e Galegos ilustres, na igrexa de San Domingos de Bonaval, en Santiago de Compostela. O violinista Anxo Gómez Piñeiro, acompañado pola pianista Haruna Takebe, interpretarán pezas clásicas de Bach e Beethoven, así como obras de Pablo de Sarasate e Manuel Quiroga, e mais a Foliada de Negreira, peza tradicional adorada por Alfonso Daniel Rodríguez Castelao. O acto será aberto ao público e comezará ás 12 do mediodía. 

Xenocidio, palabra do ano 2025. A votación organizada pola Real Academia Galega e o Portal das Palabras da Fundación Barrié levou algo máis do 40% dos case 7.200 votos rexistrados. O segundo termo máis votado entre os finalistas foi Foliada, con case o 20%; no terceiro posto ficou lume. Máis info, hoxe en Praza.gal.

• AMPLIAMOS 👉 'Xenocidio', palabra galega do ano con Gaza na mente
• HEMEROTECA | O Diario de Sesións do Parlamento silencia o "xenocidio" en Gaza
• HEMEROTECA | Cidades e vilas berran na rúa para "non deixar de falar de Palestina ata que sexa libre" 
• HEMEROTECA | "A sociedade civil organizada é unha arma de construción masiva, podemos cambiar as cousas"

Varios concellos galegos amenceron con temperaturas baixo cero, fortes xeadas e con neve en cotas arredor dos 500 metros. Meteogalicia elevou a alerta amarela por frío na montaña e no sur da provincia de Ourense. Na foto da DGT, o alto do Fiouco a primeiras horas da mañá. 

As mensaxes de WhatsApp evidencian que Feijóo nunca estivo informado "en tempo real" na xornada das riadas de València, como asegurou canda Mazón dous días despois. O ex-presidente e actual líder estatal do PP achegou á xuíza que investiga o caso as mensaxes que recibiu do ex-titular da Generalitat, Carlos Mazón, que a instrutora lle reclamou en calidade de testemuña. Está a contalo infoLibre. Na imaxe, Feijóo antes de lanzar esa afirmación ante os medios, o 31 de outubro de 2024.

• HEMEROTECA (2024) | Devolverlle o do Prestige á esquerda
• HEMEROTECA (2024) | Politizar
• HEMEROTECA (2024) | As riadas máis mortais de Europa neste século superan xa as 200 vítimas en València