Fálase

Macron cita este luns en París os mandatarios de oito Estados europeos, entre eles Pedro Sánchez, e a cúpula da UE para abordaren os plans de Donald Trump e Vladimir Putin sobre Ucraína. Ao encontro asistirán, ademais do presidente francés e o xefe do Executivo español, o alemán Olaf Scholz, o británico Keir Starmer, a italiana Giorgia Meloni, o polaco Donald Tusk, o neerlandés Dick Schoof  e a danesa Mette Frederiksen, ademais da presidenta da Comisión Europea, Ursula von der Leyen e o presidente do Consello Europeo, António Costa. Na imaxe, Macron con Sánchez e Costa, nunha xuntanza en Bruxelas en 2022 [© Pool Moncloa/Diego del Monte]

• En infoLibre | Sánchez ve en Trump o revulsivo que estaba buscando para recuperar terreo fronte ao PP e Vox
• HEMEROTECA | "As fracturas na UE veranse agravadas con Trump, dando pulo ao populismo ultraconservador"

Queremos Galego concéntrase na Praza do Obradoiro unha semana antes da manifestación convocada baixo o lema Lingua vital xa! para o vindeiro domingo, 23 de febreiro, coincidindo co Día de Rosalía de Castro. [📸 Óscar Antón Pérez García]

• +INFO👉🏻 Son Goku inspira a Queremos Galego: á rúa o 23F por unha "lingua vital"

A Consellería do Mar e a Universidade de Santiago de Compostela van analizar o impacto que tería unha redución da presión impositiva sobre as preferencias das persoas no consumo de peixe e marisco. Asinan un convenio financiado en parte polo Fondo Europeo Marítimo, de Pesca e de Acuicultura para a creación dun modelo que permita mellorar as análises e medición de impactos asociados a cambios nos impostos, como pode ser o IVE, ou nas preferencias dos consumidores. Un estudo e que serviría de base á modelización dunha campaña de promoción do consumo de peixe que estimule a demanda. [📸 CC-BY-SA USC]

• De 700 toneladas ao ano de berberecho a 20: a crise marisqueira na ría de Arousa non cesa
• As mariscadoras vense "abandonadas" pola Xunta e reclaman axudas pero non "propaganda"

Veciñanza de Ribeira mobilízase coa Plataforma en defensa da sanidade pública da comarca da Barbanza para reclamar a cobertura "inmediata e permanente" das dúas prazas de Medicina de Familia vacantes no centro de saúde de Aguiño. Este sábado saíron á rúa para solicitar á Consellería de Sanidade, como veñen facendo cada semana dende hai meses, "máis profesionais, máis medios e máis compromiso coa atención primaria", e que cesen o "desleixo" e os "recortes". "Non queremos máis solucións temporais", aseguran no manifesto que leron esta tarde.

O PPdeG celebra o primeiro aniversario da vitoria electoral do 18F. "É un orgullo suceder o primeiro presidente elixido democraticamente", asegurou Alfonso Rueda en referencia a Xerardo Fernández Albor. O presidente da Xunta e do PPdeG reivindicou a "memoria inmensa" de Manuel Fraga e desfíxose en loas para Alberto Núñez Feijóo.

"Rueda foi a persoa axeitada no momento axeitado", recoñeceu Feijóo, mentres que o presidente da Xunta celebrou como o actual líder do PP estatal "deixou feita a súa sucesión" en Galicia. "Os presidentes do PP contamos as maiorías de catro en catro en Galicia, acompañarémoste nas seguintes", incidiu Feijóo nun discurso en castelán no que tamén fixo apreciacións como que "os galegos sempre din o que queren, non din depende, din PPdeG e maioría absoluta".

• O PPdeG non se pronuncia sobre a concesión que pide a parella de Feijóo a Costas "como unha cidadá máis"
• O PP secunda a Vox con dous votos galegos para pedir que a lingua galega non sexa oficial na UE 
• Xunta e Parlamento adían desde hai anos dous recoñecementos públicos a Rajoy e Feijóo

"Este País non lle vai perdoar a Rueda a súa deslealdade con Galiza e coa xente: Altri vai ser a tumba do PP", afirmou a portavoz nacional do BNG, Ana Pontón, no Parlamento Aberto organizado polo Bloque este sábado, un foro con expertos e representantes de colectivos afectados. Pontón advertiu que a súa formación non vai permitir "que nos colen como industrialización o que é destrución, contaminación e máis eucaliptización", en referencia ao proxecto de macrocelulosa que Altri pretende instalar na Ulloa "en alianza coa Xunta". 

• Rueda acusa a Pontón de coaccionar funcionarios contra Altri, "franquismo industrial" para o BNG
• O BNG procura os "papeis ocultos" do pacto da Xunta con Altri e o PP amosa un comunicado da empresa

Tres anos do afundimento do Villa de Pitanxo en augas de Terranova. Familiares e achegados das 21 persoas falecidas nesta traxedia, que está a ser xulgada, convocaron un acto de homenaxe en Marín ao que asistiu o delegado do Goberno en Galicia, Pedro Blanco, así como outras autoridades como o secretario xeral do PSdeG, José Ramón Gómez Besteiro, quen manifestou a súa "esperanza" de que "se esclarezan os feitos e se depuren responsabilidades" para que "se faga xustiza". Unha delegación do BNG encabezada pola eurodeputada Ana Miranda reclamou no acto "que a investigación non se demore máis". "Non pode ser que tres anos despois a Comisión de investigación de Accidentes Marítimos siga demorando este informe", manifestou Miranda. 

• HEMEROTECA | Da CIAF en Angrois á CIAIM no Pitanxo: as investigacións técnicas 'independentes' de accidentes aínda non o son tanto
• HEMEROTECA | Trinta anos no mar de Terranova: "Non podemos ir a porto faga o tempo que faga; é moi malo cando máis peixe hai"

O Sindicato Labrego Galego denuncia que Cobre San Rafael formulou unha reclamación ante a Valedora do Pobo en contra da aprobación parcial de acceso á información relativa ao expediente de declaración como Proxecto Industrial Estratéxico do plan para a reapertura da mina de Touro-O Pino, emitido pola Secretaría Xeral de Industria e Desenvolvemento Enerxético en decembro. "Estamos ante unha empresa que pretende campar ás súas anchas, tanto que non está disposta a permitir que a Administración pública faga nin unha mínima acción que poida prexudicar os seus intereses, nin sequera nalgo tan básico como respectar a lexislación de acceso á información pública", critica Margarida Prieto do SLG. [📸 Terreos da antiga explotación mineira en Touro © Adega]

• HEMEROTECA | A Xunta impulsa o novo proxecto da mina de Touro tres anos despois de frear o orixinal polo seu impacto
• HEMEROTECA | Punto e final ao megaproxecto mineiro en Touro tras catro anos de loita social
• HEMEROTECA | A Xunta certifica que todos os ríos na contorna da mina de Touro están xa contaminados

A Xunta informa de que está a realizar un seguimento das praias na comarca do Barbanza "para comprobar o seu estado ante a aparición puntual de 'pellets' nalgunhas delas". A Consellería de Medio Ambiente e Cambio Climático constatou a "presenza testemuñal" destes granulados plásticos nalgúns areais ao tempo que, asegura nun comunicado, procedeu a retiralos mentres continúa a "avaliar a situación" e "calibrar de xeito global" as dimensións deste episodio. [📸 Restos de 'pellets' no Parque Natural de Corrubedo en xaneiro de 2024 CC-BY-SA Greenpeace Galicia] 

• HEMEROTECA | O Estado pasa as facturas da recolleita dos 'pellets' ao armador do Toconao
• HEMEROTECA | A Xunta ataca o Estado e presume de medios na busca de 'pellets' tras usar só o 40% dos que divulgou
• HEMEROTECA | O pobo vence a "inacción": así se recollen os 'pellets' en Muros

A CIG presenta unha denuncia na Fiscalía pola falta de medidas de seguridade no Hospital da Coruña e pide que se investigue se houbo un delito penal por parte da Xerencia da área sanitaria da Coruña-Cee ao "non implementar medidas preventivas", tendo en conta a agresión rexistrada o pasado 3 de febreiro no servizo de urxencias do CHUAC. A central sindical solicita que, de ser o caso, a Fiscalía inicie as actuacións legais oportunas.

• O apuñalamento dun enfermeiro no CHUAC abre o debate sobre a seguridade do persoal sanitario