Fálase

"Este País non lle vai perdoar a Rueda a súa deslealdade con Galiza e coa xente: Altri vai ser a tumba do PP", afirmou a portavoz nacional do BNG, Ana Pontón, no Parlamento Aberto organizado polo Bloque este sábado, un foro con expertos e representantes de colectivos afectados. Pontón advertiu que a súa formación non vai permitir "que nos colen como industrialización o que é destrución, contaminación e máis eucaliptización", en referencia ao proxecto de macrocelulosa que Altri pretende instalar na Ulloa "en alianza coa Xunta". 

• Rueda acusa a Pontón de coaccionar funcionarios contra Altri, "franquismo industrial" para o BNG
• O BNG procura os "papeis ocultos" do pacto da Xunta con Altri e o PP amosa un comunicado da empresa

Tres anos do afundimento do Villa de Pitanxo en augas de Terranova. Familiares e achegados das 21 persoas falecidas nesta traxedia, que está a ser xulgada, convocaron un acto de homenaxe en Marín ao que asistiu o delegado do Goberno en Galicia, Pedro Blanco, así como outras autoridades como o secretario xeral do PSdeG, José Ramón Gómez Besteiro, quen manifestou a súa "esperanza" de que "se esclarezan os feitos e se depuren responsabilidades" para que "se faga xustiza". Unha delegación do BNG encabezada pola eurodeputada Ana Miranda reclamou no acto "que a investigación non se demore máis". "Non pode ser que tres anos despois a Comisión de investigación de Accidentes Marítimos siga demorando este informe", manifestou Miranda. 

• HEMEROTECA | Da CIAF en Angrois á CIAIM no Pitanxo: as investigacións técnicas 'independentes' de accidentes aínda non o son tanto
• HEMEROTECA | Trinta anos no mar de Terranova: "Non podemos ir a porto faga o tempo que faga; é moi malo cando máis peixe hai"

O Sindicato Labrego Galego denuncia que Cobre San Rafael formulou unha reclamación ante a Valedora do Pobo en contra da aprobación parcial de acceso á información relativa ao expediente de declaración como Proxecto Industrial Estratéxico do plan para a reapertura da mina de Touro-O Pino, emitido pola Secretaría Xeral de Industria e Desenvolvemento Enerxético en decembro. "Estamos ante unha empresa que pretende campar ás súas anchas, tanto que non está disposta a permitir que a Administración pública faga nin unha mínima acción que poida prexudicar os seus intereses, nin sequera nalgo tan básico como respectar a lexislación de acceso á información pública", critica Margarida Prieto do SLG. [📸 Terreos da antiga explotación mineira en Touro © Adega]

• HEMEROTECA | A Xunta impulsa o novo proxecto da mina de Touro tres anos despois de frear o orixinal polo seu impacto
• HEMEROTECA | Punto e final ao megaproxecto mineiro en Touro tras catro anos de loita social
• HEMEROTECA | A Xunta certifica que todos os ríos na contorna da mina de Touro están xa contaminados

A Xunta informa de que está a realizar un seguimento das praias na comarca do Barbanza "para comprobar o seu estado ante a aparición puntual de 'pellets' nalgunhas delas". A Consellería de Medio Ambiente e Cambio Climático constatou a "presenza testemuñal" destes granulados plásticos nalgúns areais ao tempo que, asegura nun comunicado, procedeu a retiralos mentres continúa a "avaliar a situación" e "calibrar de xeito global" as dimensións deste episodio. [📸 Restos de 'pellets' no Parque Natural de Corrubedo en xaneiro de 2024 CC-BY-SA Greenpeace Galicia] 

• HEMEROTECA | O Estado pasa as facturas da recolleita dos 'pellets' ao armador do Toconao
• HEMEROTECA | A Xunta ataca o Estado e presume de medios na busca de 'pellets' tras usar só o 40% dos que divulgou
• HEMEROTECA | O pobo vence a "inacción": así se recollen os 'pellets' en Muros

A CIG presenta unha denuncia na Fiscalía pola falta de medidas de seguridade no Hospital da Coruña e pide que se investigue se houbo un delito penal por parte da Xerencia da área sanitaria da Coruña-Cee ao "non implementar medidas preventivas", tendo en conta a agresión rexistrada o pasado 3 de febreiro no servizo de urxencias do CHUAC. A central sindical solicita que, de ser o caso, a Fiscalía inicie as actuacións legais oportunas.

• O apuñalamento dun enfermeiro no CHUAC abre o debate sobre a seguridade do persoal sanitario

O Goberno de España insta a Feijóo a "preocuparse menos do acceso privado do seu chalé á praia" e "aplicar a Lei de Vivenda" nas autonomías do PP como Galicia "para que baixen os alugueiros". O ministro para a Transformación Dixital, Óscar López, pronunciouse deste xeito na Coruña sobre a concesión solicitada pola parella do ex-presidente e actual líder do PP ata 2037 para o acceso á praia do seu chalé en Moaña, que Costas quere recuperar para uso público. López viaxou á cidade co gallo do inicio dos traballos da Axencia Española de Supervisión da Intelixencia Artificial (AESIA) na Casa da Veeduría, sede provisional da institución ata o acondicionamento do edificio da Terraza. Vídeo de RTVE divulgado polo ministro a través das redes sociais.

• O PSdeG alegará contra a concesión pedida pola parella de Feijóo dun terreo público en Moaña
• A parella de Feijóo pide unha concesión ata 2037 do acceso á praia do seu chalé en Moaña
• Costas quere recuperar para uso público o acceso á praia do chalé da parella de Feijóo en Moaña
• HEMEROTECA | A Xunta ratifica o "non" a intervir nos alugueiros coa lei de vivenda da man dos demais gobernos do PP

Caamaño & Ameixeiras celebran San Valentín cun remix verbeneiro de Catro Cousas, a súa colaboración con Rodrigo Cuevas: "Non facemos pachanga, pero se a fixésemos non seriamos a Panorama, seriamos como un dúo de remolque, coma os dúos dos restaurantes", explican sobre este "autoremix" da peza na que se internaron no mundo do pasosobre tradicional xogando a "a resignificar a linguaxe militar e taurina asociada a este xénero". "Camela, os ritmos gravados con casiotones, os teclistas da cabra, os pasodobres toureiros. Todos estes referentes serviron de inspiración para o remix", agregan para unha peza "que se fixa tamén en Modern Talking tocando unha canción de Paco España, en Quim Barreiros e en Rosinha falando con segundas intencións".

• ENTREVISTA | Caamaño & Ameixeiras: "As letras do disco foron creadas nos bares"
• CRÍTICA | Caamaño & Ameixeiras : Quitar o aire
• EN VINTE | Rodrigo Cuevas: “O público quere ver a música tradicional ao mesmo nivel que outras músicas contemporáneas”
• HEMEROTECA | "As verbenas son un 'pegamento social' que conecta a xente coas súas aldeas e os seus barrios"

Trump ratifica que estende a súa guerra comercial á Unión Europea con novos aranceis que xustifica coa existencia de tributos coma o IVE. O presidente estadounidense mantén que imporá "aranceis recíprocos" a cada Estado da UE nas vindeiras semanas ou meses. [Imaxe: © Casa Branca (whitehouse.gov)]

• Trump desprega a súa axenda ultra dende o inicio: "Perforar e perforar", leis tránsfobas e blindar as fronteiras
• EDITORIAL | O segundo mandato de Donald Trump e Galicia
• HEMEROTECA | "As fracturas na UE veranse agravadas con Trump, dando pulo ao populismo ultraconservador"

Sanidade admite posibles "fisuras" en protocolos fronte a agresións a sanitarios e anuncia un plan con medidas. A Fiscalía insta a denunciar e comprométese a traballar para que as infraccións se formalicen de xeito "rápido". Foto: CC BY-NC-SA CIG

• O apuñalamento dun enfermeiro no CHUAC abre o debate sobre a seguridade do persoal sanitario

Un detido e varios médicos do Sergas investigados tras desmantelar a Garda Civil unha rede de tráfico de medicamentos en Cangas e Vigo. "O que máis nos preocupa é a presunta implicación de médicos", di Abel Losada, subdelegado do Goberno de España en Pontevedra. 

• AMPLIAMOS 👉 Médicos do Sergas e farmacias, investigados nunha operación contra o tráfico de ansiolíticos