PP, BNG e PSdeG escriben conxuntamente ao comisario europeo de Pesca, Virginijus Sinkevičius, para instalo a "rectificar e anular o Regulamento" que pecha 87 zonas do Atlántico á pesca de fondo. Fano nunha carta asinada por Pedro Puy (PP), Ana Pontón (BNG) e Luis Álvarez (PSdeG) no que transmiten á UE o acordo unánime neste sentido acadado no Parlamento o pasado setembro.
PARO REXISTRADO | As inscricións nas oficinas de emprego aumentaron en 2.197 persoas en Galicia durante o mes de setembro (+1,55% e na media estatal, +0,60%) e quedan en 144.109, o que supón 8.945 menos que un ano antes (-5,84% e no total do Estado, -9,70%). Mentres, a afiliación media á Seguridade Social diminuíu en 5.985 persoas (-0,57%, mentres aumenta nun 0,15% na media estatal), ata os 1,049 millóns, isto é, 15.117 persoas máis que no mesmo mes de 2021 (+1,46% e na media estatal, +3,32%).
PSOE e Unidas Podemos pechan o pacto para os Orzamentos Xerais do Estado de 2023, que aproban este martes en Consello de Ministros. O acordo inclúe outras medidas alén dos orzamentos, como novos permisos para o coidado de fillas e fillos. Na imaxe [CC-BY-NC-ND Eva Ercolanese / PSOE], Pedro Sánchez e Yolanda Díaz, o pasado setembro no Senado. O detalle do investimento territorializado previsto para Galicia coñecerase cando as contas entren no Congreso para iniciar trámite parlamentario.
As campañas Treixadura-Modo Ribeiro (Axencia Nasas para o Consello Regulador da Denominación de Orixe Ribeiro); A auga en Vigo é de alta calidade (Ecovigo Publicidad para Aqualia); Abre na rede (Quattro IDCP para PuntoGal), Vai escampar (Quattro IDCP para R) e mais un traballo sobre o cambio climático do CIPF de Leixa, distinguidos na XXVIII edición dos Premios de Publicidade en Galego. Os galardóns foron entregados este luns no Parlamento, que os organiza xunto á Secretaría Xeral de Política Lingüística e o Foro Enrique Peinador.
Vítimas de Angrois reclaman fronte ao Congreso a dimisión de Ana Pastor como vicepresidenta segunda tras desvelar Praza.gal a carta coa que manobrou ante a UE na defensa da versión oficial que culpou o maquinista do accidente. "Ana Pastor foi a persoa que máis traballou desde as institucións para ocultar as causas do accidente", di a plataforma de afectados.
María Rozas será a candidata de Compostela Aberta á alcaldía de Santiago en 2023. "Dou este paso con orgullo e responsabilidade, reivindicando o traballo feito por Compostela Aberta e o noso capital humano. Porque temos claro como é o Santiago que queremos, e porque sabemos da decepción co Goberno de Bugallo tras a caída do mito dos bos xestores", di a edil, que estivo arroupada no acto polo ex-alcalde Martiño Noriega e mais por Marta Lois, ata agora voceira municipal da formación. Rozas, actualmente concelleira na oposición, foi edil de Facenda no goberno de Noriega [Imaxe: CA]
O Boletín Oficial do Estado publica hoxe a reforma do voto emigrante que suprime o sufraxio rogado e introduce outras novidades, como a descarga de papeletas por internet ou a depuración do censo. Volverán entrar en xogo case medio millón de potenciais votos en Galicia, dos que chegarían uns cen mil por elección se se rexistran taxas de participación semellantes ás previas ao voto rogado.
Lula da Silva gaña a primeira volta das eleccións presidenciais brasileiras co 48,43% dos votos e disputará a presidencia ao actual mandatario, o ultradereitista Jair Bolsonaro, que obtivo o 43,20%. Na imaxe, candidaturas con máis do 1% dos sufraxios.
O Goberno de España ultima o recurso contra o veto da pesca de fondo na UE pero rexeita solicitar a suspensión cautelar da medida. Así o asegurou o ministro de Agricultura e Pesca, Luis Planas, nunha entrevista na Cadena SER.
O Brasil celebra hoxe unhas polarizadas eleccións nas que Lula é favorito para recuperar a presidencia. O ex-presidente aspira mesmo a gañar xa na primeira volta e derrotar o ultradereitista Jair Bolsonaro.
