Fálase

A empresa que opera os helicópteros do 061 entra en preconcurso de acredores tras anos acumulando incumprimentos e sen que a Xunta logre remudala. En abril un concurso público demorado meses polo Goberno galego quedou deserto logo de que varias empresas sospeitasen dun amaño, o que levou a prorrogar á anterior adxudicataria dos helicópteros sanitarios con base en Santiago e Ourense, Eliance, que agora declara preconcurso de acredores.

• HEMEROTECA (17/4/2026) | O 061 non logra mellorar os seus helicópteros, que seguirán en mans dunha empresa con ducias de incumprimentos
• HEMEROTECA (23/2/2026) | Varias empresas sospeitan dun concurso amañado para os helicópteros do 061, que o nega

Ábrese a sala do Museo do Pobo Galego, onde ás 16.00 horas haberá un acto de homenaxe, na que toda a cidadanía galega pode despedir a Xosé Manuel Beiras. 

• Adeus a un bo e xeneroso
• Xosé Manuel Beiras, na fronte unha estrela
• OBITUARIO | Beiras: seis décadas de encrucilladas para explicar a historia política de Galicia
• Múltiples mostras de afecto e valoración da súa figura histórica tras o pasamento de Beiras

A poeta canadense Anne Carson gaña o Premio Nobel de Literatura 2026 "pola súa obra audaz e enxeñosa que, nun diálogo lúdico coa tradición clásica, creou novas formas para a literatura contemporánea". Máis información, en Praza.gal

O Supremo anula o decreto que endurecía os criterios para crear universidades privadas e garantir proxectos de calidade. O alto tribunal tómbao ao estimar o recurso de Balears por falta de xustificación da súa tramitación urxente, pero non entra a debater o fondo do asunto. 

• O Estado aproba o decreto que atranca o camiño das universidades privadas en Galicia
• A reforma para a fin dos "chiringuitos" da universidade privada, só se a Xunta exerce as súas competencias

Falece Maricarmen, a muller de 87 anos desafiuzada do seu fogar en Madrid, que permanecía ingresada no hospital dende que tivo que marchar á forza da súa vivenda, á que non poderá volver a pesar do acordo que finalmente aceptara a empresa dona do edificio no que residía dende hai setenta anos. O seu caso provocou un movemento social pola crise da vivenda que permanece activo en manifestacións e acampadas como a que continúa no Obradoiro en Santiago, na Porta do Sol en Madrid ou na Praça Catalunya de Barcelona. 

O nulo apoio da maioría do Congreso aos decretos de vivenda propostos polo Goberno a raíz da indignación cidadá por este desafiuzamento levaron o presidente Sánchez a adiantar as eleccións xerais ao 29N. Unha indignación que levou aos sindicatos a convocar unha folga xeral para o vindeiro 11 de novembro. [📸 Fotografía de arquivo de Maricarmen © Sindicato de Inquilinas e Inquilinos de Madrid]

• CRÓNICA | "Nós preferimos ladrillo", responde Rueda á petición de Pontón e Besteiro de ir alén de construír vivendas
• HEMEROTECA | Clamor cidadán polo dereito á vivenda
• HEMEROTECA | Manifestacións e acampada no Obradoiro: a protesta pola vivenda non se detén
• DATOS | Quen aluga pisos en Galicia? 'Rendismo popular' pero cada vez maior peso das rendas altas
• HEMEROTECA | "Todas somos Maricarmen": a mecha da indignación pola vivenda volve prender nas rúas de Galicia

Ada Colau perfílase como candidata do Frente Amplio á presidencia do Goberno de España nas eleccións do 29N. A formación Más Madrid propón que a exalcaldesa de Barcelona lidere unha candidatura "coral e confederal", sendo cabeza de lista por Barcelona. Segundo esta proposta, a actual ministra de Sanidade por Sumar, Mónica García, presentaríase como líder na lista electoral de Madrid. [📸 ©Fundación Sentit Comú]

Feijóo pon en dúbida o voto por correo. O líder do PP, que presidiu esa empresa pública durante tres anos, anuncia que pedirá "medidas adicionais" á Xunta Electoral durante un acto de precampaña en Ceuta. O ex-presidente da Xunta xa alimentara as teorías da fraude no voto postal na campaña das eleccións xerais de 2023. "Non confío nos directivos de Correos", di agora. 

A folga xeral pola vivenda será o 11 de novembro, data proposta polo Sindicato de Inquilinas e aceptada por CCOO e UGT, segundo adianta El País. A CIG, sindicato maioritario en Galicia, aprobou tamén a convocatoria deste paro de 24 horas. 

• A CIG secunda a folga xeral pola vivenda e a crise de prezos
• CCOO e UGT irán á folga xeral pola crise de vivenda

Aprazada a folga médica indefinida prevista para o vindeiro 28 de outubro "ata que exista un novo goberno" no Estado "con plena capacidade para gobernar". A Unión Médica e Facultativa, que inclúe as organizacións galegas O'Mega e Simega, decide adiar o paro pero asegura que manterá as mobilizacións durante a campaña. 

Abre na Coruña o novo Espazo Cultural Manuel María para a promoción da cultura galega, impulsado pola fundación do escritor chairego. O recinto, no Orzán, acollerá concertos, cursos e diversas actividades culturais. O vindeiro 16 de outubro celebrase neste local o concerto De Manuel María a Begoña Caamaño, coa actuación de Uxía, Santi Cribeiro e Sérgio Tannus.

• Manuel María: o dereito á dignidade e á enteireza