Fálase

Marta Lois, nova decana da Facultade de Ciencias Políticas da Universidade de Santiago. A que fora candidata de Sumar nas eleccións galegas, deputada por esta formación no Congreso e, previamente, edil no goberno de Santiago por Compostela Aberta, é doutora en Ciencia Política e profesora do departamento de Ciencia Política e Socioloxía. Dirixirá o centro xunto a José Caamaño, Amparo Novo e Alba Alonso tras gañar a súa candidatura á liderada pola profesora Erika Jaráiz por 20 votos fronte a 10. [Imaxe: © USC]

Catro anos de prisión para o responsable do almacén pirotécnico ilegal que estoupou en Tui en 2018 e matou dúas persoas. A condena por dous delitos de homicidio imprudente, 28 de lesións por imprudencia e outros tres pola ilegalidade das instalacións é resultado dun acordo de conformidade da Fiscalía co acusado, que pediu "perdón" ao exercer o seu dereito á última palabra: "Outra cousa non podo facer", agregou.

• HEMEROTECA | O propietario da pirotecnia de Tui, ao cárcere tras o achado de novos depósitos ilegais de explosivos
• HEMEROTECA | Dúas persoas falecidas e unha trintena feridas no estoupido do almacén de pirotecnia en Tui

Inaugurada a instalación ribeirense dende a que Ana Peleteiro preparará os vindeiros campionatos mundiais de pista cuberta e ao aire libre e mais o seguinte europeo indoor. O alcalde de Ribeira, Luís Pérez Barral, e o conselleiro da Presidencia, Diego Calvo, abriron hoxe oficialmente o módulo de atletismo cuberto do complexo deportivo da Fieiteira, onde adestrarán deportistas "como a nosa deportista olímpica Ana Peleteiro, a lle quen quero agradecer a súa aposta por Ribeira pero tamén contribuirá a que o clubs como os de Atletismo ou Taekwondo Natural Sport poidan desenvolver as súas actividades nun espazo axeitado", destaca o rexedor sobre a instalación, cofinanciada por ambas institucións. Na imaxe [©Concello de Ribeira], Peleteiro saúda a deportistas de Ribeira xunto ao alcalde e o secretario xeral para o Deporte.

Marilar Aleixandre recolle o premio Porteiro Garea da USC polo seu labor a prol do galego na universidade: "Escribir en galego vivindo en Galicia é un acto político de resistencia e tamén un acto de amor", reivindica a escritora e profesora ad Honorem da institución académica compostelá. [Imaxe: ©Santi Alvite / USC]

• HEMEROTECA | 'As malas mulleres' de Marilar Aleixandre gañan un Premio Nacional de Narrativa ata agora inzado de homes
• HEMEROTECA | Marilar Aleixandre ingresa na RAG cun chamado a "termar da paisaxe"
• HEMEROTECA | "É moi importante que haxa máis mulleres nas institucións, mais tamén que haxa mulleres feministas"

Persoal da CRTVG convoca catro xornadas de folga "contra a externalización da programación" e advirte cun paro indefinido. O Comité Intercentros anuncia que as asembleas de profesionais veñen de dar o seu visto e prace ao calendario de mobilizacións "contra o desmantelamento", principiando polos paros convocados para os días 7, 9, 11 e 14 de outubro de 11:30 a 13:00, cadrando coa emisión do novo programa O Termómetro, coproducido por empresas privadas e substituto da produción propia A Revista. 

• AMPLIAMOS 👉 "Máxima tensión" nunha CRTVG con persoal a camiñar cara á folga indefinida
• Galicia non terá a autoridade audiovisual independente que esixe a UE
• Concurso público para dirixir a CRTVG: en marcha a lei popular por uns medios públicos "ao servizo do pobo"
• A nova lei galega de medios públicos xa figura entre os riscos para a liberdade de prensa en Europa

O PP consegue a alcaldía de Mondariz tras a dimisión do goberno local liderado por Alternativa por Mondariz (AxM). O grupo popular quedara segundo nas pasadas eleccións, mentres que AxM logrou a maioría con cinco escanos, pero acusou dificultades para aprobar uns orzamentos. Pablo Barcia (PP) foi escollido como rexedor no pleno deste xoves [na imaxe CC-BY-SA PPdeG Pontevedra].

Javier Gómez Noya anuncia a súa retirada do tríatlon profesional tras 26 anos e un amplísimo palmarés. O ferrolán logrou fitos como cinco campionatos do mundo en distancia olímpica, unha medalla de prata nos Xogos Olímpicos de 2012 ou tres campionatos do Ironman.

• HEMEROTECA | Gómez Noya engade outro galardón a unha carreira de lenda
• HEMEROTECA | "Éxitos como o de Gómez Noya axudan a cambiar a mentalidade dos galegos"
• HEMEROTECA | Gómez Noya entra no Olimpo cunha medalla de prata

A xuíza de Angrois amplía o prazo para recorrer a sentenza que condenou ao mesmo nivel o maquinista e un cargo de Adif. A sentenza foi feita pública o 26 de xullo e varias partes pediron aclaracións e despois ampliación do prazo para recorrer. Agora a maxistrada fixa un prazo de 30 días que só comezará a contar cando todas as partes reciban as aclaracións solicitadas, o que o xulgado comunicará ao resto de partes implicadas. 

• HEMEROTECA | Condenada a verdade oficial do accidente de Angrois

Feijóo suxire "traballar nove horas e media catro días á semana" como fórmula para rebaixar a xornada laboral, no canto de minguar o total de horas co mesmo salario. O ex-presidente da Xunta e actual líder do PP mantén, nunha entrevista en Telecinco, que en calquera caso "o primeiro é recuperar a produtividade da economía española" e "o segundo", lograr unha "rebaixa" de baixas laborais.

• HEMEROTECA | Non só tentar conciliar: o "dereito ao tempo" entra na axenda das eleccións europeas
• HEMEROTECA | Galicia bate marcas en excedencias para coidar crianzas malia a alta demanda e gratuidade nas escolas infantís
• HEMEROTECA | O traballo na hostalaría segue por riba das 40 horas semanais malia unha década de diminución

Tres navieiras de Cíes serán sancionadas por non aclarar a Competencia por que os seus prezos son similares. Tras seren denunciadas varias empresas en 2016 por fixar os mesmos prezos, Competencia perdooulles unha multa a cambio do seu compromiso de mellorar os seus procedementos comerciais, pero agora tras constatar o incumprimento de tres delas (Naviera Mar de Ons, Naviera Illa de Ons e Naviera de las Rías Gallegas) e ábrelles un expediente sancionador por unha infracción moi grave. 

• HEMEROTECA (9/4/2024) | Navieiras de Cíes aínda incumpren condicións impostas por Competencia tras seren denunciadas en 2016
• HEMEROTECA (11/8/2017) | Sospeitas sobre a venda de billetes irregulares acrecentan o conflito pola masificación das Cíes