Fálase

EPA | A poboación ocupada en Galicia ascende ata os 1,16 millóns de persoas, 23.800 máis que no segundo trimestre e 16.000 máis que un ano antes, o que supón a cifra máis elevada dende comezos de 2009, segundo os datos da Enquisa de Poboación Activa que veñen de ser publicados. No último trimestre a poboación en situación de desemprego caeu en Galicia ata as 112.500 persoas, isto é, 7.300 menos que no trimestre previo e 6.200 menos que un ano antes. O total de poboación no paro é o máis baixo dende a fin do verán de 2008. Máis información, hoxe en Praza.gal.

O conselleiro Calvo afirma que a Xunta reactivará a petición ao Estado para traspasar as competencias sobre meteoroloxía o que permitiría, por exemplo, que as alertas dependesen de MeteoGalicia e non da Axencia Estatal de Meteoroloxía (Aemet). Este fora un dos traspasos pendentes que xa comezara a negociar o Goberno de coalición PSdeG-BNG (2005-2009) e que os populares dixeran asumir en 2009 tras regresar á Xunta, se ben anos despois optaran por desbotalo. O anuncio prodúcese nun contexto no que o Goberno galego suma xa 16 anos sen obter novas competencias e mentres tamén, previsiblemente, nesta lexislatura acabarán sendo transferidas as da xestión do litoral tras recibir o aval do Constitucional ao respecto. Na imaxe, Calvo e outros cargos da Consellería de Presidencia, este xoves presentando no Parlamento os orzamentos do departamento. [CC-BY-SA Xunta]

• Comisión de transferencias: dos "traspasiños" á lei do litoral
• HEMEROTECA | O PP volve prometer os mesmos 15 traspasos de competencias tras quince anos sen lograr ningún
• HEMEROTECA (2014) | O PP dá por "esgotados" os traspasos de competencias á Xunta tras cinco anos en branco

Íñigo Errejón, voceiro de Sumar no Congreso, dimite dos seus cargos e abandona a política entre acusacións por violencias machistas. Na carta na que anunciou a decisión afirma que chegou "ao límite da contradición entre o personaxe e a persoa". Sumar indica que ten aberto "un proceso para obter información" ao respecto e, paralelamente á aceptación da dimisión, agregan que aspiran a "unha sociedade e unha política feminista" e "iso require un compromiso firme en todos os ámbitos" [Imaxe: © Congreso]

Antón Riveiro Coello, Maggie O’Farrell e Alejandro Zambra gañan a XXVIII Premio Literario San Clemente, organizado polo IES Plurilingüe Rosalía de Castro de Santiago coa colaboración da Xunta. Hotel Carioca, de Antón Riveiro Coello (Galaxia) acadou o galardón na modalidade de novela en galego; Literatura infantil, de Alejandro Zambra (Anagrama), gañou na categoría en lingua castelán, e El retrato de casada, de Maggie O’Farrell (Libros del Asteroide) foi distinguida como novela internacional.

O Parlamento condena a agresión homófoba que causou o asasinato de Samuel Luiz e expresa o seu rexeitamento ante calquera forma de violencia e odio motivada pola orientación sexual ou a identidade de xénero. A Cámara acorda unha declaración institucional na que insta a "erradicar a LGTBIfobia e calquera forma de discriminación e odio, mediante políticas educativas, campañas de sensibilización e o apoio ás vítimas"; e traslada o seu apoio e solidariedade á familia e amizades do rapaz asasinado na Coruña en 2021, un xuízo que está a ter lugar agora.

• "Estaba cheo de sangue, non podía defenderse": a agonía de Samuel contada polos homes que o axudaron
• "Foi unha cazaría": os primeiros acusados detallan como morreu Samuel pero desmárcanse do crime
• A orientación e identidade sexual xa é a motivación discriminatoria máis común entre os delitos de odio

O PP considera que o Goberno de España pretende "o control absoluto" e a "censura" de RTVE ao rebaixar o limiar para elixir o Consello de Administración ao mesmo nivel que o vai situar a Xunta para a dirección xeral da CRTVG: maioría absoluta do Congreso se non se acadan previamente os dous terzos. "Tentan tomar e ocupar as institucións", di Miguel Tellado. [Imaxe: © Congreso]

• AMPLIAMOS 👉 O Goberno de España baixa a maioría para elixir cargos en RTVE ao nivel que porá a Xunta na CRTVG
• A desconexión gobernamental da CRTVG, desactivada tras trece anos no conxelador
• HEMEROTECA | A secretaria de Medios da Xunta de Feijóo fiscaliza agora a RTVE con máis dun milleiro de preguntas
• HEMEROTECA | Feijóo exixe a Sánchez "despolitizar" RTVE tras pedir o persoal da CRTVG auxilio por anos de "manipulación"

O Goberno de España rebaixa as maiorías para elixir o Consello de Administración de RTVE, cuxos membros poderán ser nomeados por maioría absoluta do Congreso se en primeira votación non se logra a maioría reforzada de dous terzos. O novo consello, indica o ministro Óscar López, terá 15 membros (agora son 10), 11 elixidos polo Congreso e 4, polo Senado (agora son 6 e 4). Substituír a maioría reforzada pola absoluta para evitar "bloqueos" é unha das intencións expresadas pola Xunta e o PP na reforma que ten en marcha na CRTVG, nomeadamente para elixir a dirección xeral. A diferenza entre ambas corporacións é que, coa actual composición dos parlamentos, os socios do Goberno de España seguirán obrigados a pactar con outros grupos o consello de RTVE e, na Cámara galega, abondará cos votos do PP para nomear a dirección xeral dos medios públicos. [Imaxe: © RTVE]

• AMPLIAMOS 👉O Goberno de España baixa a maioría para elixir cargos en RTVE ao nivel que porá a Xunta na CRTVG
• A desconexión gobernamental da CRTVG, desactivada tras trece anos no conxelador
• HEMEROTECA | A secretaria de Medios da Xunta de Feijóo fiscaliza agora a RTVE con máis dun milleiro de preguntas
• HEMEROTECA | Feijóo exixe a Sánchez "despolitizar" RTVE tras pedir o persoal da CRTVG auxilio por anos de "manipulación"

Santiago acolle entre o luns e o xoves a European Conference on Artificial Intelligence (ECAI 2024), un evento organizado polo Centro Singular de Investigación en Tecnoloxías Intelixentes da USC (CiTIUS) que debate os principais avances rexistrados neste campo de investigación. No encontro, no que participan máis de 1.600 persoas, abordarase o deseño de políticas de investigación en IA éticas e fiables para Europa.

Feijóo lamenta que moitos mozos "opten por converterse en funcionarios sen vocación pública" para non "fracasar fóra da administración" e apela a ser "emprendedores". O ex-presidente e actual líder do PP logrou en 1991, cando xa era alto cargo, a condición de funcionario do corpo superior da Administración Xeral da Xunta, no que comezou a exercer con 24 anos inicialmente como interino, período no que foi membro da Asociación de Funcionarios Interinos e Contratados Administrativos (Afica), coa que chegou a mobilizarse contra o Goberno tripartito (PSdeG-PNG-CG) en 1988 -na imaxe, recuperada pola CIG en 2012 nun boletín no que tamén destacaba que o daquela presidente non chegara a tomar posesión da praza-.

Xunta e PP cancelan a asistencia dos seus cargos á celebración do 'Día do Veciño' que organiza a Federación de Asociacións de Veciños de Lugo porque a entidade incluíu o ministro de Transportes, Óscar Puente, entre a vintena de persoas homenaxeadas nesta edición. A dirección provincial do partido anunciou a primeiras horas da mañá que os seus representantes orgánicos non acudirían e, unhas tres horas despois, a Xunta suspendeu a presenza da conselleira do Medio Rural, María José Gómez, -que tamén ía ser premiada no acto- e do seu delegado en Lugo, Javier Arias. Na imaxe, presentación dos actos, que si contarán con presenza institucional do ámbito local e estatal.

• HEMEROTECA | Puente, Calvo... De quen son estes colapsos no transporte?
• HEMEROTECA | Cando Feijóo prometeu pagar o AVE a Lugo