Fálase

O deputado do PPdeG Raúl Santamaría láiase dos impostos que debe pagar polo premio que conseguiu no concurso televisivo Reacción en cadena como parte do equipo Mozos de Arousa. Nunha entrevista con elDiario.es considera que se ben "é certo que todos temos que contribuír" porque "se supón que os impostos son para unha boa causa", que "Facenda leve a metade dun premio dun concurso paréceme un pouco excesivo". Tras a correspondente tributación queda con máis de 400.000 euros do gañado. Na imaxe, Santamaría durante un vídeo gravado para o programa no hemiciclo do Parlamento que deu lugar a un apercibimento ao PP por parte do presidente da institución, o tamén popular Miguel Santalices: "Non sabía que non se podía e tampouco me dixeron nada dende o partido", alega.

• Santalices apercibe o PP por un vídeo do 'mozo de Arousa' no hemiciclo do Parlamento

Greenpeace planta unha cheminea de cinco metros na sede central da Xunta para "esixir que se paralice o proxecto da celulosa de Altri". En vésperas da mobilización do vindeiro domingo e "ante a falta de reposta do presidente da Xunta a reunirse coa organización", o colectivo ecoloxista bloquea os accesos a San Caetano para reclamar "unha declaración ambiental desfavorable" e animar a acudir á protesta do día 15 en Compostela. [Imaxe: © Greenpeace/Pedro Armestre]

• Un libro de Adega axita a alerta sobre Altri en vésperas doutra protesta contra a súa instalación en Palas
• Organizacións ambientais de todo o mundo esixen á Xunta e ao Goberno de España que rexeiten a fábrica de Altri

Caamaño & Ameixeiras estrean colaboración con Rodrigo Cuevas en Catro cousas. O tema, xa dispoñible en todas as plataformas, "resignifica o pasodobre, recollendo a linguaxe militar e taurino" do xénero para "apropiarse del, reinterpretalo e vestilo de ironía" na que tamén "é unha canción de amor", explican.

• ENTREVISTA | Caamaño & Ameixeiras: "As letras do disco foron creadas nos bares"
• EN VINTE | Rodrigo Cuevas: “O público quere ver a música tradicional ao mesmo nivel que outras músicas contemporáneas”

A USC e o Foro Económico de Galicia homenaxearon a Fernando González Laxe, ex-presidente da Xunta e catedrático emérito da Universidade da Coruña. No acto interviron o presidente e o director do Foro, Emilio Pérez Nieto e Santiago Lago Peñas, a catedrática María X. Rodríguez Galdo e o ex-presidente Emilio Pérez Touriño, ambos compañeiros de González Laxe na universidade.

• HEMEROTECA | Tripartito: trinta e cinco anos da primeira paréntese na Xunta

A folga nos medios públicos leva 31 xornadas impedindo a emisión do programa externalizado O Termómetro da TVG. Este venres as traballadoras e traballadores mobilizados farán un paro de 24 horas para tratar de afectar á programación completa da televisión e da Radio Galega, coincidindo co último programa contratado d'O Termómetro. A folga quedará en suspenso, pendente de reactivación á volta do Nadal, se "a dirección non dá sinais de recuperación da produción propia", manifesta o comité de folga da CRTVG. Ademais, o comité intercentros convoca unha concentración de protesta na compostelá Praza do Toural este venres ás 12h, aberta á cidadanía, "para divulgar nas rúas a grave situación que atravesan os medios públicos". 

• O PP poderá remudar o director da CRTVG só cos seus votos na primeira metade de 2025
• Unha marcha en defensa da pluralidade dos medios públicos chama a cidadanía a "liberar a CRTVG"

Falece Maximino Viaño, histórico cooperativista agrario, socio fundador de Feiraco e impulsor de Ternera Gallega. O Concello de Ames, do que era cronista oficial, declara un día de loito oficial polo pasamento de quen "dedicou boa parte da súa vida a fomentar o progreso e a mellora do campo". "Era unha persoa moi querida, coñecida e apreciada no concello de Ames. Fixo un labor moi importante tanto no eido cultural como empresarial", destaca o alcalde amesán, Blas García. [Imaxe: Concello de Ames]

• HEMEROTECA | Ames, 1936: Chegou a noite despois da luz e o progreso

Aparvar(se), cantareira, dina, emerxencia climática, fala e meu/miña, finalistas na elección da Palabra do Ano 2024. A votación organizada pola RAG e o Portal das Palabras da Fundación Barrié está aberta ata as 23:59 do Día de Nadal.

• +INFO 👉 Aparvar(se), cantareira, dina, emerxencia climática, fala e meu/miña, candidatas a ser Palabra do Ano 2024
• HEMEROTECA | Cibercarracho, palabra do ano 2023
• HEMEROTECA | 'Comadre', palabra do ano en reivindicación das redes de sororidade
• HEMEROTECA | A música imponse á pandemia: Tanxugueiras, palabra galega do ano

O Goberno de España recoñece a ilegalidade do proceso xudicial simulado polos golpistas para asasinar a Alexandre Bóveda. O líder galeguista, protagonista nun novo acto de reparación ás persoas represaliadas polo franquismo no que tamén foi recoñecido Xosé Fortes, membro da Unión Militar Democrática (UMD) que se opuxo á ditadura. Na imaxe, Amalia Bóveda, filla do economista e dirixente político represaliado, recolle o recoñecemento de mans de Pedro Sánchez. 

• AMPLIAMOS 👉 O Goberno de España anula a sentenza simulada polos golpistas para asasinar a Alexandre Bóveda
• HEMEROTECA | O Día da Galiza Mártir gaña peso institucional con Bóveda como símbolo da democracia asasinada polos golpistas
• HEMEROTECA | "Non esquecer a barbarie para non repetir os erros": o Parlamento homenaxea á fin a Bóveda e as vítimas do franquismo

O mozo que atacou a Rajoy en 2015, condenado a cinco anos de prisión por "acceder á redacción de La Voz de Galicia" en Pontevedra e "tentar matar un xornalista" en xullo de 2023. A Audiencia Provincial pontevedresa considérao autor dun delito de asasinato en grao de tentativa, doutro de datos e dun máis de resistencia á autoridade. O tribunal aplica unha "eximente incompleta de alteración psíquica e atenuante de reparación do dano" e imponlle un "psiquiátrico adecuado aos seus padecementos en réxime pechado por un período que non poderá baixar de dous anos nin exceder de cinco e que deberá cumprirse antes que a pena de prisión imposta".

A Fundación Xistral lanza a campaña M8 por ler!  de promoción da literatura galega destacando que "somos unha terra de grandes historias". No vídeo, que lembra que só o 8% dos libros vendidos en Galicia están escritos en galego, participan Manuel Rivas, Borja Iglesias, Ledicia Costas, Xosé A. Touriñán, Elena Ferro, Fillas de Cassandra ou Andrea Maceiras