Fálase

A Xunta remuda os xerentes das Áreas Sanitarias de Santiago, Ferrol e Ourense. A Consellería de Sanidade vén de nomear a Ángel Facio Villanueva (na foto) novo xerente da área Sanitaria de Santiago de Compostela e Barbanza. Substitúe no cargo a Eloína Núñez Masid. Este sábado a Xunta tamén nomeou a Fernanda López Crecente como xerente da área sanitaria de Ferrol, posto ocupado ata o de agora por Ángel Facio; e novo xerente da área sanitaria de Ourense, Verín e O Barco de Valdeorras a José Santiago Camba Bouzas.

• AMPLIACIÓN: Sanidade prescinde de Eloína Núñez e Felix Rubial nas xerencias de Santiago e Ourense
• Do colapso da Atención Primaria á falta de médicos en Urxencias: o que ten por resolver o novo conselleiro de Sanidade
• Axitación na sanidade ourensá: "Traballamos ao 200%"

O Básquet Coruña ascende á ACB e o Breogán continuará nela. O equipo coruñés logra o ascenso á máxima categoría do baloncesto masculino mesmo antes da fin do seu partido en Melilla, que ganou 74-80, por mor da vitoria do Lleida en Menorca (105-70) na xornada final da liga regular da LEB Ouro. O conxunto lucense, pola súa banda, consegue a permanencia matemática tras imporse ao Andorra por 97-92. O vindeiro domingo o Obradoiro pugnará por seguir tamén na ACB, para o que precisa vencer ao Joventut e que o Granada perda ante o Gran Canaria [Imaxes divulgadas por Leyma Básquet Coruña e Río Breogán este serán]

A Asemblea Xeral da ONU aproba por amplísima maioría outorgar a Palestina máis dereitos de participación e pedir ao Consello de Seguridade que "reconsidere" a súa integración plena na organización. O resultado foi de 143 votos a prol -entre eles, o do Goberno de España- fronte a 9 en contra -entre eles, os EUA, Israel, Hungría ou Arxentina- e 25 abstencións. Durante a sesión, o embaixador israelí equiparou a decisión con "promover o establecemento dun estado terrorista" e pasou por unha trituradora de papel unha copia da Carta das Nacións Unidas [Imaxe: © ONU]

• As universidades galegas comezan a mobilizarse en solidariedade con Palestina
• A solidariedade galega con Palestina non cesa, agora cunha campaña viral que leva a protesta ao espazo público
• "A resistencia en Gaza é o único que queda porque non teñen armas, nin exército, nin apoio político ou económico"
• "De Gaza non se pode escapar, está pechada a cal e canto por Israel"

"Compromiso político" de Inés Rey e Alfonso Rueda para pactaren a ordenación e usos futuros dos terreos portuarios da Coruña. Nunha xuntanza en San Caetano, a alcaldesa coruñesa e o presidente da Xunta anunciaron o que denominan unha "nova etapa de colaboración para avanzar na apertura do porto á cidade" que pasa por dar por "superados" os convenios de 2004. Esa nova xeira, din, comezará a concretarse este mesmo mes de maio nunha xuntanza de todas as Administracións implicadas (Xunta, Estado e Concello). [Imaxe: David Cabezón / Xunta]

• HEMEROTECA | O Concello da Coruña rexeita agora a compra dos terreos dos peiraos xa que o Porto pode pagar por si mesmo a súa débeda 
• HEMEROTECA | 20 anos despois do Prestige, o tráfico de petroleiros comeza a abandonar o porto interior da Coruña
• HEMEROTECA | A Coruña volve pasear polos seus peiraos: uso público para terreos públicos á espera dunha solución para San Diego
• HEMEROTECA | O Estado rexeita de vez condonar a débeda do Porto da Coruña nun cumio que enterra os convenios de 2004

Concello de Santiago e Ministerio de Economía acordan un cambio de usos nos antigos terreos do colexio Peleteiro, en pleno Ensanche da cidade, para "priorizar o seu uso residencial", segundo confirman ambas institucións tras un encontro entre ambas encabezado pola alcaldesa, Goretti Sanmartín, e mais o ministro, Carlos Cuerpo. As mudanzas na operación, pendente dende hai varios mandatos na capital galega, "pasarían por reducir o uso comercial e demais usos terciarios e incrementar o uso residencial, incluíndo vivenda protexida", sinala o Goberno local. 

O acordo co Ministerio é preciso porque o futuro dos terreos depende da Sareb, o banco malo, que ata agora contemplaba para a parcela, entre outros aspectos, un centro comercial e apartamentos turísticos. Sanmartín vén fixando o desbloqueo desta operación como "un dos obxectivos do mandato". Imaxes do encontro divulgadas polo Ministerio de Economía.

106 persoas presentan a súa candidatura para dirixir a Axencia Española de Supervisión de Inteligencia Artificial (AESIA), cuxa sede estará na Coruña. Un grupo de persoas expertas conformado por Jordi Torres, experto en arquitecturas de computación de alto rendemento; Claudio Feijóo, especialista en economía dixital; Nuria Oliver, investigadora en modelos computacionais de comportamento humano; e mais o filosofo político Daniel Innerarity formularán á Secretaría de Estado de Dixitalización e Intelixencia Artificial as súas avaliacións para o nomeamento, que se concretará durante o mes de maio. O resto do persoal da AESIA será seleccionado durante o mes de xuño. Na imaxe, o edificio da Terraza, que acollerá a sede da AESIA.

• O galego procura a súa normalización na Intelixencia Artificial da man dunha "histórica" lei europea
• HEMEROTECA | A Coruña consegue para Galicia a sede da Axencia estatal de Intelixencia artificial

"E o mar", a nova homenaxe d'A Banda da Loba a Luísa Villalta. Con este poema feito canción queren reivindicar a cara máis social da autora destacada no Día das Letras, "que formou parte do movemento Nunca Máis ou escribiu posicionándose do lado do pobo palestino nesta guerra que semella non ter fin". No videoclip unha muller que viviu de nena a catástrofe do Prestige volve ás praias, esta vez para recoller 'pellets'.

Pontón anima á participación na mobilización convocada por Queremos Galego para o Día das Letras. Nun encontro co presidente d'A Mesa pola Normalización Lingüística, Marcos Maceira, a portavoz nacional do BNG chamou á mobilización "fronte ás políticas desgaleguizadoras do PP" para reclamar medidas como a derrogación do "decreto da vergoña" aínda vixente ou o cumprimento íntegro do Plan Xeral de Normalización da Lingua Galega, aprobado por unanimidade hai agora vinte anos.

• Queremos Galego chama a manifestarse o 17 de maio para reclamar a aplicación do Plan de Normalización aprobado hai 20 anos

Feijóo anuncia que a semana que vén irá ver unha tourada a praza de Las Ventas (Madrid) para "defender a liberdade cultural". O ex-presidente da Xunta e actual líder do PP indica a través das redes sociais que non é "un gran entendido no mundo dos touros" pero ten " claro" que a "defensa da cultura non depender do gusto de ningún gobernante", di tras a supresión dun premio de tauromaquia polo Ministerio de Cultura. Durante a súa etapa como presidente, Feijóo asistiu en varias ocasións ás touradas na praza de Pontevedra, algunha delas acompañado polo actual presidente, Alfonso Rueda. Na imaxe, unha tourada na Coruña antes da súa desaparición por falta de subvencións públicas.

• HEMEROTECA | "As touradas son unha actividade anacrónica que mancha a imaxe de Pontevedra"
• HEMEROTECA | A Xunta evita prohibir as catro touradas que quedan en Galicia

Os Premios Feroz 2025 e 2026 entregaranse en Pontevedra. O alcalde da cidade, Miguel Anxo Fernández Lores, vén de anuncialo xunto a María Guerra, presidenta da Asociación de Informadores Cinematográficos de España, organizadora dos galardóns, nos que compiten películas, series e obras audiovisuais de non ficción. É "un gran día para Pontevedra e Galicia", celebra o rexedor, que concreta que a entrega do ano vindeiro se celebrará o 25 de xaneiro nunha gala coa asistencia de máis de mil persoas. 

• AMPLIAMOS 👉 Pontevedra vestirase de gala para acoller os Premios Feroz en 2025 e 2026