O orgullo combativo toma as rúas galegas contra o odio. "Con Franco non viviamos mellor", “que si, que temos raiba, pero non temos medo” ou “o corpo non binario é revolucionario” foron algunhas das consignas que se puideron ler e escoitar este sábado nas manifestacións do Orgullo, celebradas en Ferrol, Vigo e Pontevedra. Nesta xornada de domingo as reivindicacións do colectivo LGTB+ continuarán en Santiago, A Coruña, Ourense e Lugo.
Morre unha muller na residencia de Bóveda logo de ser agredida por outra usuaria. Unha interna da residencia para persoas con grandes discapacidades físicas de Bóveda (Lugo) morreu nos pasados días a consecuencia dunha agresión presuntamente cometida por outra usuaria do centro. A Garda Civil investiga o caso e o Xulgado de Instrución de Monforte ten aberto un procedemento para esclarecer os feitos. A Consellería de Política Social e Igualdade sinalou que mantivo contacto co centro e co alcalde de Bóveda desde o primeiro momento para solicitar toda a información dispoñible
O proxecto de SAIC en Ferrol prevé crear mil postos de emprego directo, cun impacto no conxunto de Galicia de 2.000 empregos en total. Dos mil postos de traballo directos, 460 estarán relacionados coas operacións loxísticas e 540 coas produtivas. A Secretaría Xeral de Industria e Desenvolvemento Enerxético somete a información pública o proxecto e o estudo de impacto ambiental do complexo industrial para a produción e distribución de vehículos eléctricos e híbridos, como recolle o DOG deste venres. Na imaxe, plano das instalacións que a compañía chinesa prevé erguer no porto exterior de Ferrol, incluído na documentación exposta.
Comisións Obreiras ratifica que abandona as negociacións do diálogo social coa Xunta: "Pretendía empregalo como foto de fachada mentres utiliza as baixas médicas para satisfacer os intereses da patronal", salienta a secretaria xeral do sindicato no marco do seu Consello Nacional -na imaxe-, que aprobou por unanimidade a decisión. O Goberno galego, lamentan, "baleirou de contido este espazo ata convertelo nun escaparate de propaganda" e Comisións, agrega, só valorará regresar a "unha mesa entre iguais e con respecto mutuo". Só UGT permanece nesas conversas, ás que a CIG xa non se sumara de inicio.
A alcaldesa da Coruña propón recuperar a bandeira da cidade. Nun vídeo divulgado a través das redes sociais, Inés Rey sinala que "as branquiazuis cores de Galicia foron antes as da Coruña" ata que "hai 135 anos, unha variación da nosa bandeira marítima creou a actual bandeira do país, da que nos sentimos orgullosos". "Iso -agrega- deixounos" sen a bandeira "propia da nosa capital". "Sen saír da mesma raíz, e se a recuperamos?", suxire.
A Xunta fai oficiais as condicións do seu 'bono comedor escolar': 150 euros por curso para familias que en 2024 ingresasen un máximo de 6.000 euros per cápita ao ano e crianzas de Infantil, Primaria ou Especial en colexios públicos ou concertados e que no curso 25-26 xa fosen usuarias dun comedor non xestionado "directa ou indirectamente" polo Goberno galego.
A Mocidade Galega pola Memoria levou a cabo unha protesta na inauguración da mostra que no Museo de Pontevedra acolle A derradeira leición do mestre, a obra na que Castelao denunciou a represión franquista e o asasinato de Alexandre Bóveda. Integrantes da entidade despregaron carteis reivindicativos e subliñaron que "a memoria histórica non pode limitarse á exhibición de símbolos ou obras artísticas, senón que debe traducirse en compromisos efectivos coa verdade, a xustiza e a reparación das vítimas da represión franquista".
Nas últimas 24 horas caeron en Galicia preto de catro mil raios, especialmente durante a tarde e noite do mércores e na madrugada deste xoves. As treboadas, que afectaron a boa parte do territorio viñeron acompañadas de chuvias e de fortes sarabiadas, con pedrazo de gran tamaño.
O Goberno israelí carga contra o Concello de Oleiros pola queima no San Xoán dunha figura que representaba a Trump e Netanyahu montados nun mísil na praia de Bastiagueiro. "Oleiros manda ao inferno" aos "dous criminais máis vergoñentos e indecentes do noso tempo", reivindica o goberno municipal, que resalta que o acto virou "nunha nova denuncia do masacre" que os mandatarios "están a causar por todo o mundo, ignorando leis e dereitos internacionais e humanos". A embaixada de Israel en España transmite a súa "condena" ao consistorio oleirense por, din, "promover demostracións inaceptables". "A responsabilidade das autoridades é parar a instigación ao odio, non fomentalo", sosteñen. [Imaxe: © Concello de Oleiros]
Pedro Sánchez comparece ante o Congreso para abordar os casos de corrupción e procesos xudiciais que atinxen o PSOE e o Goberno de España. O presidente do Executivo e líder socialista principia advertindo de que "non debe haber impunidade" para as prácticas corruptas e instando a distinguir entre casos coma o que vén de propiciar a condena de Ábalos das pescudas contra as súa familia.
