Tanxugueiras, clasificadas con Terra para a final do Benidorm Fest, da que o vindeiro sábado sairá a representación de RTVE en Eurovisión. As pandeireteiras levaron 38 puntos do xurado (50% do total), 25 puntos do voto demoscópico (25%) e 30 puntos do voto da audiencia (25%). Podes volver ver a súa actuación nesta ligazón [Imaxe da retransmisión de RTVE]
A Xunta suprime o veto aos encontros de non conviventes de madrugada, que aínda permanecía do xoves ao remate da semana, e estende o horario de apertura de bares e restaurantes (ata a 1h entre semana, ata a 1:30 nas fins de semana) e de pubs e discotecas (ata as 4h entre semana, ata as 5h nas fins de semana). Sanidade avanza ademais que as barras dos locais hostaleiros poderán volver ser utilizadas e os concertos e espectáculos co público en pé pódense volver celebrar.
O Ministerio de Transportes saca a exposición pública o primeiro treito da autovía da Mariña (A-74), 9,2 quilómetros entre Foz e Burela que custarán 126 millóns de euros. Os treitos inicial e final desa nova autovía, entre a A-8 e Foz e entre Burela e San Cibrao, están en fases previas de tramitación, mentres que a continuidade desta autovía estatal desde San Cibrao ata Ferrol, competencia da Xunta, foi rebaixada a arranxos da estrada actual. O trámite hoxe realizado foi avanzado o pasado venres pola ministra de Transportes.
O Consello de Ministros aproba a revalorización das pensións con efectos retroactivos a 1 de xaneiro deste ano. A suba é do 2,5% (atendendo á inflación media ata o pasado novembro) para as pensións contributivas e do 3% para as mínimas e non contributivas. Segundo os datos do Ministerio de Seguridade Social, a pensión media de xubilación en Galicia a 1 de xaneiro de 2022 é de 1.053,71 euros mensuais e no total estatal, de 1.245,90 [Foto: CC BY-SA Ana Varela / Xunta]
A xornalista Ana Romaní, recoñecida co Premio de Honra Dolores Ben, que este ano entrega por primeira vez a AGAPI (Asociación Galega de Produtoras Independentes). Dolores Ben , finada no ano 2020, foi presidenta da AGAPI entre 2007 e 2019. Ademais da obra literaria de Ana Romaní e do seu traballo diario na Radio Galega, a asociación destaca o seu labor como "activista a prol dos medios públicos, da liberdade informativa e da defensa da cultura". Romaní ingresou na RAG no ano 2019 e un ano antes recibiu o premio Nacional de Periodismo Cultural.
Os concellos de Vigo e Pontevedra ordenan a retirada dunha campaña antiabortista instalada nalgunhas marquesiñas desas cidades. O de Vigo asegura nun comunicado que “ordenou a retirada inmediata” da campaña “tan pronto tivo coñecemento da mesma, que cualifica de “propaganda sexista contraria aos dereitos constitucionais”. O de Pontevedra, segundo informa PontevedraViva, esixiu á empresa concesionaria dos espazos publicitarios a “inmediata” retirada dun material que cualifica como “noxento”. [Imaxe: Marea de Vigo]
O PSdeG atribúe ás "diferentes condicións laborais que ten o Sergas" que "máis do 80% dos MIR que se forman en medicina de familia e comunitaria" en Galicia acaben traballando fóra. Feijóo, di o voceiro parlamentario socialista, Luis Álvarez, busca no Goberno de España "un responsable externo ao que responsabilizar da súa propia falla de capacidade para resolver os problemas" da Atención Primaria.
A Igrexa dá en admitir que rexistrou ao seu nome un milleiro de bens que non eran seus ao abeiro dunha reforma do Goberno de Aznar e, tras negociar co actual Goberno de España, declárase disposta a devolvelos. Coas controvertidas inmatriculacións, a institución católica inscribira case 35.000 bens, uns 7.000 deles en Galicia dos que máis da metade eran terreos e edificios de uso non relixioso. Na imaxe, Pedro Sánchez este luns co presidente da Conferencia Episcopal Española, Juan José Omella. Tras a xuntanza, emitiron un comunicado conxunto ao respecto.
O Obradoiro gaña ao Breogán no derbi da ACB por 100-83. [Imaxe: @OBRADOIROCAB]
A militancia do PSdeG de Ourense reelixe como secretario provincial a Rafael Rodríguez Villarino, portavoz municipal na capital. Impúxose co 57% dos votos fronte ao 42% de Alfredo García, alcalde de Valdeorras. Tras os acordos acadados entre as candidaturas presentadas en Pontevedra e Lugo para que nesas provincias sexan David Regades e José Tomé os responsables provinciais, resta por coñecerse a secretaría na Coruña, onde as primarias son o próximo domingo e compiten as candidaturas de Bernardo Fernández e Noa Díaz.
