O Goberno de España manterá os descontos no transporte público durante o primeiro semestre de 2025. Tras un pacto con Podemos, o Executivo resolve que as bonificacións, que inclúen os abonos ferroviarios de balde, continuarán sen cambios e non será cando menos ata o vindeiro xullo cando principien as mudanzas para concentralos só nalgúns colectivos de persoas usuarias. O acordo inclúe tamén a prórroga para frear desafiuzamentos a persoas vulnerables durante todo 2025
As principais institucións galegas acollen minutos de silencio como repulsa ao asasinato machista deste mércores en Viveiro. O movemento feminista ultima mobilizacións para o serán deste venres en diversas vilas e cidades. Na imaxe, concentración deste mediodía ante a subdelegación do Goberno de España en Lugo.
O Real Decreto de comedores escolares instará a todos os centros a ofrecer froita e verdura a diario e prohibirá as bebidas azucradas para previr a obesidade infantil. O ministro de Consumo, Pablo Bustinduy, avanzou detalles da norma durante a presentación do Estudo Aladino 2023, que entre outros aspectos salienta que a obesidade entre as nenas e nenos descende, pero segue atinxindo "a máis dun terzo" da poboación escolar, cunha situación "especialmente preocupante" nas familias de menor renda, nas que "o exceso de peso infantil afecta a case á metade" das crianzas. Na imaxe, froita nun comedor escolar da Coruña, nunha fotografía de arquivo.
A eurodeputada do BNG, Ana Miranda, denunciou este mércores no pleno do Parlamento europeo as "negativas consecuencias" que terá a instalación da macrocelulosa Altri en Palas de Rei sobre o sector agrario e gandeiro galego. "Iso si que provoca malestar. O malestar de 100.000 persoas que saíron as rúas para dicir Altri Non”, subliñou.
Investigan como presunto crime machista o asasinato dunha muller en Covas (Viveiro) este mércores, segundo confirman a Praza.gal fontes próximas á investigación. A Policía segue coas pesquisas e El Progreso avanza que xa detivo ao suposto asasino, que foi trasladado ao Hospital da Mariña. De confirmarse como feminicidio, sería a vítima 46 da violencia de xénero no Estado. [📸 Turismo de Galicia]
A clientela da Caixa Rural Galega poderá retirar e ingresar cartos nas oficinas de Correos. A empresa estatal chega a un acordo co grupo do que fai parte a entidade cooperativa galega (Banco Cooperativo) para acceder ao servizo denominado Correos Cash contra a exclusión financeira presentando o documento de identidade e "os catro últimos díxitos do número de conta ou da tarxeta". Na imaxe, unha sucursal da Caixa Rural Galega en Outeiro de Rei. [CC BY-NC-SA Praza.gal]
Berlai estrea “O outro lado da porta”, unha canción de amor ao pobo palestino con Fanny & Alexander. O tema acompáñase dun videoclip artellado sobre a curtametraxe Home Sweet Home, dirixida por Omar Rammal co apoio de Amnistía Internacional na que o realizador palestino denuncia o apartheid e a sistemática vulneración de dereitos a cargo de Israel
O Parlamento aproba definitivamente os Orzamentos da Xunta para 2025, dotados con algo máis de 15.000 millóns de euros, case un 4% máis que o ano previo. Vivenda e débeda protagonizan as subas nas contas públicas do ano vindeiro, que caen en ciencia. O proxecto orzamentario recibiu os votos a prol da maioría absoluta do PP e a abstención do deputado de Democracia Ourensana; tanto BNG como PSdeG votaron en contra.
O Goberno do Estado aproba a nova licitación para Muface cunha suba da prima para as aseguradoras privadas do 33,5%, un incremento de 957 millóns de euros. A proposta atende a demanda das empresas de recibir máis cartos en función da idade das persoas atendidas.
O Son do Camiño avanza o seu cartel de 2025 con artistas e bandas como Kings of Leon, Bryan Adams, Estopa, Bad Gyal, Franz Ferdinand ou The Rapants e nomes coma o da DJ Teresa Ferreiro no seu novo espazo dedicado á música electrónica. Os primeiros abonos do festival, que se celebra en Santiago do 12 ao 14 de xuño, saen á venda este xoves.
