Investigan como presunto crime machista o asasinato dunha muller en Covas (Viveiro) este mércores, segundo confirman a Praza.gal fontes próximas á investigación. A Policía segue coas pesquisas e El Progreso avanza que xa detivo ao suposto asasino, que foi trasladado ao Hospital da Mariña. De confirmarse como feminicidio, sería a vítima 46 da violencia de xénero no Estado. [📸 Turismo de Galicia]
A clientela da Caixa Rural Galega poderá retirar e ingresar cartos nas oficinas de Correos. A empresa estatal chega a un acordo co grupo do que fai parte a entidade cooperativa galega (Banco Cooperativo) para acceder ao servizo denominado Correos Cash contra a exclusión financeira presentando o documento de identidade e "os catro últimos díxitos do número de conta ou da tarxeta". Na imaxe, unha sucursal da Caixa Rural Galega en Outeiro de Rei. [CC BY-NC-SA Praza.gal]
Berlai estrea “O outro lado da porta”, unha canción de amor ao pobo palestino con Fanny & Alexander. O tema acompáñase dun videoclip artellado sobre a curtametraxe Home Sweet Home, dirixida por Omar Rammal co apoio de Amnistía Internacional na que o realizador palestino denuncia o apartheid e a sistemática vulneración de dereitos a cargo de Israel
O Parlamento aproba definitivamente os Orzamentos da Xunta para 2025, dotados con algo máis de 15.000 millóns de euros, case un 4% máis que o ano previo. Vivenda e débeda protagonizan as subas nas contas públicas do ano vindeiro, que caen en ciencia. O proxecto orzamentario recibiu os votos a prol da maioría absoluta do PP e a abstención do deputado de Democracia Ourensana; tanto BNG como PSdeG votaron en contra.
O Goberno do Estado aproba a nova licitación para Muface cunha suba da prima para as aseguradoras privadas do 33,5%, un incremento de 957 millóns de euros. A proposta atende a demanda das empresas de recibir máis cartos en función da idade das persoas atendidas.
O Son do Camiño avanza o seu cartel de 2025 con artistas e bandas como Kings of Leon, Bryan Adams, Estopa, Bad Gyal, Franz Ferdinand ou The Rapants e nomes coma o da DJ Teresa Ferreiro no seu novo espazo dedicado á música electrónica. Os primeiros abonos do festival, que se celebra en Santiago do 12 ao 14 de xuño, saen á venda este xoves.
Rueda anuncia que Xunta e Goberno de España veñen de "pechar un acordo" para a transferencia da xestión do litoral. Cando se concrete o traspaso será a primeira competencia transferida polo Estado a Galicia en 16 anos. As últimas ata o momento datan de 2008, co Goberno de coalición de PSdeG e BNG na Xunta e o do PSOE de José Luis Rodríguez Zapatero no Estado. Na imaxe, o presidente da Xunta con Pedro Sánchez o pasado setembro na Moncloa.
A Executiva do PSdeG propón celebrar o Congreso Nacional do partido os vindeiros 8 e 9 de marzo na Cidade da Cultura. Julio Torrado, voceiro da dirección que encabeza José Ramón Gómez Besteiro, sinala que coas datas escollidas pretenden reforzar a idea de que este sexa "o congreso da igualdade, concibida no seu marco máis amplo". As datas da cita congresual, na que Besteiro aspirará a continuar como secretario xeral, serán ratificadas o vindeiro sábado no Comité Nacional da formación, máximo órgano entre congresos.
Hai hoxe cinco anos a Unión Astronómica Internacional deu o nome de Rosalía de Castro á estrela anteriormente coñecida como HD 149143, unha anana amarela semellante ao noso Sol situada a 240 anos luz na constelación de Ofiúco. Ademais, acordouse que o seu exoplaneta HD 149143 b leve o nome de Riosar. Foi o resultado dun proceso aberto no que 110 países de todo o mundo puideron nomear cadansúa estrela. A proposta galega, impulsada pola Agrupación Astronómica Ío co apoio da Fundación Rosalía de Castro e a e a Asociación Cultural Alexandre Bóveda, foi a máis votada no Estado español.
Rafael Louzán, elixido presidente da Federación Española de Fútbol ao obter 90 dos 138 votos na asemblea da RFEF celebrada este luns. Sobre o ex-presidente da Deputación de Pontevedra e da Federación Galega de Fútbol pesa unha sentenza de inhabilitación por un cargo de prevaricación, que o podería apartar do cargo. Louzán vén agarrándose a que a sentenza definitiva está aínda pendente dun recurso de casación presentado ante o Tribunal Supremo, que tratará a cuestión o vindeiro 5 de febreiro. Louzán podería converterse no cuarto presidente consecutivo da RFEF en ser inhabilitado.
