Fálase

Falece Marta Souto, directora xeral para o Deporte no Goberno de coalición de PSdeG e BNG entre 2007 e 2009 dentro da Consellería de Cultura, que dirixía o Bloque e da que fora delegada provincial. Souto, de 60 anos, foi responsable do Servizo de Normalización Lingüística do Concello de Vigo, unha das fundadoras da Coordinadora de Traballadores e Traballadoras de Normalización Lingüística (CTNL). Moi querida no ámbito do deporte de Vigo e da súa contorna, foi unha forte impulsora do deporte feminino e das seleccións galegas. Na imaxe, nunha intervención pública na súa etapa na Xunta.

Profesionais dos medios de comunicación públicos levan a folga ata o Parlamento, instalando unha 'capela ardente' mentres se celebraba a comisión de control á CRTVG no interior do Pazo do Hórreo. No sexto día da folga, xa indefinida, volveron interromper a emisión en directo na TVG e insisten en denunciar a "inacción ante a morte programada" da CRTVG. Este venres lembraron programas "desaparecidos" como 'Alalá', 'Miraxes', 'A Revista', 'Sala 5', 'Estudio 3', 'Convivir' ou 'Atmosféricos', que –segundo os manifestantes concentrados diante da Cámara– "a cidadanía galega debería chorar e intentar recuperar". [📸 CC-BY-SA Comité Intercentros CRTVG Montaxe: Praza.gal]

• Folga indefinida na CRTVG: un "punto de inflexión" para o persoal, que reclama máis apoio social
• A folga na CRTVG volve interromper a emisión ao vivo e o comité acusa a dirección de tentar "rebentala"
• O comité de folga da CRTVG insta a rachar coa "espiral de silencio que impera no sistema mediático galego"

As galegas Verónica Bolón e Cristina Blanco, da Universidade da Coruña, e Beatriz Pelaz, da Universidade de Santiago, entre as galardoadas nos Premios Nacionais de Investigación para Mozos e Mozas, que entrega o Ministerio de Ciencia, Innovación e Universidades, o recoñecemento máis importante de España no ámbito da investigación científica. 

Bolón, galardoada na modalidade María Andresa Casamayor, é profesora Titular da UDC no Departamento de Ciencias da Computación e Tecnoloxías da Información e investigadora no CITIC. Blanco, que recibe o premio na modalidade María Moliner, é investigadora Distinguida Sénior na Facultade de Socioloxía. Pelaz, que o recibe na modalidade Felisa Martín Bravo, é profesora e investigadora do Centro Singular en Química Biolóxica e Materiais Moleculares (CiQUS) da USC

A Xunta autoriza ambientalmente aumentar a balsa de lodos de Alcoa. Así o vén de comunicar a conselleira de Economía e Industria, María Jesús Lorenzana, que di que é "vital para que a planta poida continuar coa súa actividade".

• HEMEROTECA | A balsa de lodos de Alcoa, de cen metros de altura, está case chea e a empresa pide permiso para elevala outros catro metros

O persoal do Concello de Ourense vai á folga xeral. A asemblea celebrada o pasado serán acordou por unanimidade convocar paros xerais nos servizos municipais ourensáns para o 31 de outubro e o 4 de novembro, alén de continuar coas concentracións que xa tiñan programadas para este mes por, entre outros motivos, a política de persoal do Goberno de Jácome. "Estamos a vivir unha situación ditatorial onde a imposición, a chantaxe, as humillacións e o desprezo cara os empregados e empregadas son constantes e cotiás", afirman. O alcalde, pola súa banda, atribúelles a intención de "ampliar a cinco días a ponte de novembro" e "deixar sen persoal o cemiterio o Día de Todos os Santos". Na imaxe, concentración na Praza Maior, ante a casa do Concello [Imaxe: PSdeG Ourense]

• HEMEROTECA | Rueda deixa a moción de censura en Ourense en mans dos seus edís e afea "liñas vermellas" do BNG co PP
• HEMEROTECA | O xulgado anula o cesamento do interventor de Ourense e ve probado acoso laboral de Jácome
• HEMEROTECA | O acordo PP-PSdeG e a promesa de Rueda que romperon os populares para volver pactar con Jácome

O Concello de Neda retirou este mércores a Cruz dos Caídos construída en 1939 en homenaxe ás tropas franquistas. A retirada, en cumprimento da Lei de Memoria Democrática, agardou á chegada dun informe elaborado polos historiadores Xosé Manuel Suárez, Bernardo Maiz e Eliseo Fernández, que acredita que se trata dun monumento de exaltación da sublevación militar e da ditadura franquista.

Renfe mellora unha das 11 conexións diarias Galicia-Madrid substituíndo un tren Alvia por un AVE con máis capacidade e menos tempo de viaxe. Coa mudanza pasa a haber a diario 5 servizos AVE (3 con trens Avril que conectan coa Galicia atlántica e 2 que rematan en Ourense), 5 Alvia e 1 Avlo de baixo custo.

A presidenta da Comisión Europea aposta por estender o modelo de centros de deportación de migrantes en países fóra da UE implantado pola ultradereitista Meloni dende Italia. Unha quincena de Estados apoian a iniciativa de Von der Leyen, pero outros coma o Goberno de España rexéitano. O pasado setembro o ex-presidente Feijóo eloxiou a política migratoria da primeira ministra italiana e o presidente Rueda secundouno. [Imaxe: © Comisión Europea]

• HEMEROTECA | O que me gusta de Meloni e traballar dez horas diarias
• HEMEROTECA | "O que me gusta de Meloni é que ten unha política migratoria, as medidas concretas non entro a enxuizalas", di Rueda
• HEMEROTECA | Frío, soidade e ganas de traballar: os días ao sol que non quenta de Mamadou, Amadou e Abudu
• HEMEROTECA | Menores migrantes acollidos en Galicia: poucos e co traballo como prioridade

O xurado popular para o xuízo do crime de Samuel Luiz comezará este mércores a avaliar os feitos que sucederon na madrugada do 3 de xullo de 2021 e as defensas das cinco persoas acusadas. A Audiencia Provincial da Coruña acolleu este martes o inicio do xuízo, que se demorará un mes, no que participan a Fiscalía, a familia da vítima como acusación particular, a Asociación pola Liberdade Afectiva e Sexual ALAS A Coruña como acusación popular e as defensas. [📸Mobilización en repulsa polo asasinato de Samuel Luiz, o 5 de xullo de 2021 © Concello da Coruña]

• HEMEROTECA | "Crueldade extrema" e "fonda animadversión á homosexualidade": a Fiscalía pide de 22 a 27 anos polo asasinato de Samuel Luiz
• HEMEROTECA | Probas de ADN "implican directamente" os dous principais agresores de Samuel Luiz
• HEMEROTECA | Memoria fronte ao odio contra as persoas LGBTI no aniversario do asasinato de Samuel Luiz

PuntoGal reivindica no Parlamento o papel do dominio como "carné de identidade" galego en internet no seu décimo aniversario. Unha representación da entidade xestora do dominio galego encabezada polo seu presidente, Manuel González, visitou este martes a Cámara, onde foi recibida polo presidente da institución, Miguel Santalices, e representantes de todos os grupos. González subliñou a vontade de PuntoGal para "xerar beneficios que, aínda que modestos, son necesarios para o fomento das tecnoloxías en Galicia e da normalización da nosa lingua". Neste sentido, advertiu dos "preocupantes" datos divulgados polo IGE sobre "a deriva do uso social do galego", que "non deben servir só para a reflexión senón para desencadear un conxunto de actuacións inmediatas dos poderes públicos". [Imaxe: © PuntoGal]

• O .gal fai dez anos: un dominio galego non só "bonito", tamén "útil" e que busca medrar no eido empresarial