A Federación Galega de Fútbol confirma que o partido da selección absoluta masculina contra Panamá se disputará en Balaídos. O encontro está previsto para o vindeiro 31 de maio. A Irmandiña xa xogara no estadio vigués en 2007 contra Camerún, partido que finalizara cun empate a 1 gol. [Imaxe: FGF]
O TSXG ratifica a absolución do ex-alcalde de Baiona do PSOE por quitarse cinco multas pero di que deberían tramitarse de novo. A xustiza considera que o socialista Carlos Gómez non prevaricou pero que "asinar 'sen ler' as resolucións non pode ter" para quen incumpriu a normativa de tráfico un resultado máis favorable e di que "podería ou debería" revisarse a tramitación administrativa das sancións.
A Fiscalía de Madrid solicita o arquivo da denuncia contra Begoña Gómez presentada por Manos Limpias, segundo adianta o diario El País. A entidade de ultradereita xa recoñeceu na mañá deste xoves que poden estar baseados en datos falsos. [Fotografía de arquivo © Pool Moncloa]
Pedro Sánchez di meditar a súa dimisión ante o "acoso" á súa muller, á que un xulgado vén de abrir dilixencias previas por suposta corrupción tras unha denuncia da organización ultradereitista Manos Limpias. "Cancelarei a miña axenda pública uns días para poder reflexionar e decidir que camiño tomar", di nunha carta aberta á cidadanía. Na imaxe, de Pool Moncloa/Fernando Calvo, Sánchez coa súa muller, Begoña Gómez.
A Plataforma Ulloa Viva convoca a primeira manifestación contra Altri. Será o 26 de maio en Palas de Rei. A entidade agradece o apoio amosado nas últimas semanas por cidadanía e entidades sociais de toda Galicia e convoca á poboación a rexeitar o proxecto na propia comarca.
O Senado autoriza o Supremo a xulgar a Baltar por conducir o coche oficial da Deputación de Ourense a 215 por hora cando era presidente. Cos votos a prol do PP, que ten maioría absoluta, nesta Cámara, a decisión supón suspender o aforamento do agora senador por designación do Parlamento de Galicia, o que permite á xuíza do caso enviar a Baltar a xuízo por un delito contra a seguridade viaria.
A vicepresidenta Teresa Ribera, cabeza de cartel do PSOE para as eleccións europeas do 9 de xuño. Os socialistas confirman a candidatura da ministra para a Transición Ecolóxica e destacan que é responsable de "fitos" como "a solución ibérica" no mercado eléctrico, "a primeira lei de cambio climático ou o liderado na UE para aprobar na COP29 o acordo que pon fin aos combustibles fósiles". No horizonte, a posibilidade de que Ribera opte a un posto de relevancia na vindeira Comisión Europea. Na imaxe, Ribera con Pedro Sánchez no peche da campaña do PSOE para as eleccións xerais do pasado 2023 [CC BY-NC-ND PSOE]
Un estudo de Esade constata un pagamento xeneralizado de cotas no ensino privado-concertado, en todo o Estado aínda que por causas dispares. O traballo non ofrece datos específicos de Galicia, onde segundo outro estudo máis do 80% destes centros cobra cotas malia ser ilegal.
O Diario Oficial de Galicia publica este mércores a nova estrutura orgánica da Xunta e os nomeamentos e cesamentos aprobados no Consello deste luns, que aínda irán seguidos dalgún nomeamento máis a vindeira semana, segundo avanzou o presidente Rueda.
O Parlamento pide cos votos do PP e DO que o Goberno de España "suprimir a obrigatoriedade de rexistro das explotacións avícolas para autoconsumo", fixada por un decreto de hai tres anos. No transcurso do debate, o deputado do PP Silvestre José Balseiros -na imaxe- sentenciou que "non é fácil de entender" que "nun país no que se liberan presos etarras e violadores e non se condena os que atentaron contra a unidade de España haxa que rexistrar as galiñas". BNG e PSdeG abstivéronse e lembraron, entre outros aspectos, que esta obriga deriva dunha norma europea e reprochan que o Goberno do PP non centrase os seus esforzos en informar a poboación afectada.
