A Plataforma Ulloa Viva convoca a primeira manifestación contra Altri. Será o 26 de maio en Palas de Rei. A entidade agradece o apoio amosado nas últimas semanas por cidadanía e entidades sociais de toda Galicia e convoca á poboación a rexeitar o proxecto na propia comarca.
O Senado autoriza o Supremo a xulgar a Baltar por conducir o coche oficial da Deputación de Ourense a 215 por hora cando era presidente. Cos votos a prol do PP, que ten maioría absoluta, nesta Cámara, a decisión supón suspender o aforamento do agora senador por designación do Parlamento de Galicia, o que permite á xuíza do caso enviar a Baltar a xuízo por un delito contra a seguridade viaria.
A vicepresidenta Teresa Ribera, cabeza de cartel do PSOE para as eleccións europeas do 9 de xuño. Os socialistas confirman a candidatura da ministra para a Transición Ecolóxica e destacan que é responsable de "fitos" como "a solución ibérica" no mercado eléctrico, "a primeira lei de cambio climático ou o liderado na UE para aprobar na COP29 o acordo que pon fin aos combustibles fósiles". No horizonte, a posibilidade de que Ribera opte a un posto de relevancia na vindeira Comisión Europea. Na imaxe, Ribera con Pedro Sánchez no peche da campaña do PSOE para as eleccións xerais do pasado 2023 [CC BY-NC-ND PSOE]
Un estudo de Esade constata un pagamento xeneralizado de cotas no ensino privado-concertado, en todo o Estado aínda que por causas dispares. O traballo non ofrece datos específicos de Galicia, onde segundo outro estudo máis do 80% destes centros cobra cotas malia ser ilegal.
O Diario Oficial de Galicia publica este mércores a nova estrutura orgánica da Xunta e os nomeamentos e cesamentos aprobados no Consello deste luns, que aínda irán seguidos dalgún nomeamento máis a vindeira semana, segundo avanzou o presidente Rueda.
O Parlamento pide cos votos do PP e DO que o Goberno de España "suprimir a obrigatoriedade de rexistro das explotacións avícolas para autoconsumo", fixada por un decreto de hai tres anos. No transcurso do debate, o deputado do PP Silvestre José Balseiros -na imaxe- sentenciou que "non é fácil de entender" que "nun país no que se liberan presos etarras e violadores e non se condena os que atentaron contra a unidade de España haxa que rexistrar as galiñas". BNG e PSdeG abstivéronse e lembraron, entre outros aspectos, que esta obriga deriva dunha norma europea e reprochan que o Goberno do PP non centrase os seus esforzos en informar a poboación afectada.
O Dépor celebra na Praza de María Pita o ascenso do equipo á máxima categoría do fútbol feminino, a Liga F. Na celebración, a alcaldesa Inés Rey destacou que “hoxe o orgullo da Coruña volve ser o orgullo das súas talentosas mulleres”, lembrando o camiño aberto hai un século por Irene González Basanta.
"Non foron unhas declaracións afortunadas", di Rueda da afirmación da nova conselleira de Medio Rural, María José Gómez, de que os incendios intencionados van "no ADN de Galicia". BNG e PSdeG pediron o pasado venres "prudencia" e "desculpas" e o presidente asegura que xa o comentou coa conselleira pero insiste en que "hai unha enorme intencionalidade, outra cousa é que se poida demostrar".
O PP oficializa o nomeamento como un dos seus vicevoceiros parlamentario do ex-conselleiro de Sanidade Julio García Comesaña, substituíndo á agora conselleira de Vivenda e Infraestruturas, María Martínez Allegue. As outras dúas vicevoceiras da formación son Paula Prado e Cristina Sanz.
Feijóo atribúe a Pedro Sánchez o éxito de EH-Bildu nas eleccións vascas. O líder do PP liga o presidente do Goberno de España cos resultados da formación abertzale considerando que "cando Sánchez chegou á política nacional", en referencia ao seu acceso á secretaría xeral do PSOE, "Bildu tiña 18 escanos" e agora "obtén 27". En realidade, na primeira ocasión en que o actual presidente liderou o PSOE (2014), había dous anos que EH Bildu tiña 21 escanos. En 2016 a coalición abertzale descendeu a 18, en 2020 ascendeu a 21 e este pasado domingo, a 27. Na fotografía, un mitin de EH Bildu, a pasada semana [Imaxe: EH Bildu]
