Fálase

29N O BNG pide participar en La Revuelta. A formación nacionalista fai esta demanda a TVE porque a súa presenza pode "contribuír a achegar a política a públicos que habitualmente non seguen os formatos informativos tradicionais" e cre que é "unha oportunidade" que "non pode quedar limitada a determinadas formacións políticas, deixando fóra outras forzas que tamén contan con representación no Congreso e que representan unha parte importante da cidadanía”. O Bloque tamén solicita a TVE un debate electoral territorial entre as candidaturas galegas ao 29N. 

• A TVG prevé un só debate ás 9:30 da mañá na campaña das xerais

A Deputación Permanente do Congreso vota este xoves os decretos de vivenda cuxa caída no pleno da Cámara Alta polo "non" de PP, Vox e Junts propiciou a convocatoria das eleccións xerais. Entre as medidas en xogo, a moratoria de desafiuzamentos para familias vulnerables, o límite ás subas de arrendamentos ou a suba do IVE para pisos turísticos, entre outras.

• PP, Vox e Junts derrogan os decretos de vivenda
• Eleccións xerais o 29N: todo á vivenda

Ás 00:00 deste xoves, 11 de novembro, principia a folga xeral. Neste espazo podes repasar toda a información publicada por Praza.gal ao respecto nas últimas semanas.

• 🪧AS MOBILIZACIÓNS | Sindicatos e colectivos de vivenda levan ás rúas a folga xeral: convocatorias e horarios
• 📝 GUÍA PRÁCTICA | Teño que avisar de que vou facer folga? 11 preguntas e respostas sobre o 11N
• 📢  AS CONVOCATORIAS | Os sindicatos chaman á folga xeral por "unha vida digna" e "solucións" aos problemas da maioría social
• 🏘 AS RAZÓNS | 11N, folga xeral: "Non é de ningunha organización, é do pobo e para o pobo"
• ✍️ EDITORIAL | Ante a folga xeral do 11N

A borrasca Bruna deixará chuvias e ventos importantes en Galicia desde esta tarde. Metogalicia mantén activados os avisos amarelos nas provincias da Coruña e de Pontevedra, por chuvias de ata 15 litros por metro cadrado nunha hora, e na de Ourense por fortes refachos. Tamén na Costa da Morte e nas Rías Baixas por ondas de ata cinco metros, como advirte a Aemet. 

Rueda reúnese no Brasil coas representacións oficiais da emigración galega no mundo en plena controversia polo voto exterior e ás portas da campaña do 29N. O presidente da Xunta viaxa ao Rio de Janeiro para presidir o XIII Pleno do Consello de Comunidades Galegas, o órgano composto polo Goberno galego e as entidades inscritas no Rexistro da Galeguidade, que desta volta se reúne na Associação Recreio dos Anciãos para Asilo da Velhice Desamparada da cidade brasileira, na que Rueda tamén celebra un acto de presentación do Xacobeo 2027. Na imaxe, Rueda no Brasil na súa anterior visita oficial, en 2024. Durante a viaxe, como en anteriores ocasións, o despacho dos asuntos do presidente asúmeo o conselleiro da Presidencia, Diego Calvo.

• A Xunta suma 368.000 euros aos 1,4 millóns que gastou na nova sede de Bos Aires co voto exterior ao fondo
• Voto exterior: "Aquí xógase!"

A Confederación de Sindicatos de Inquilinas lanza unha proposta de reformas legais para "cambiar o modelo de vivenda" a dous días da folga xeral do 11N. Entre as medidas, que as vivendas baleiras, a partir da terceira, pasen ao parque público de alugueiro, prohibir os pisos turísticos nos concellos cos prezos disparados ou construír un millón de vivendas públicas para alugar a través dun imposto aos máis ricos. 

• 11N, folga xeral: "Non é de ningunha organización, é do pobo e para o pobo"

Folga nos buses urbanos da Coruña o vindeiro 16 de novembro. A representación laboral na Compañía de Tranvías convoca paro pola negociación do convenio e advirte dunha excesiva carga de traballo "mentres a empresa, a máis rendible de España, enche os petos de billetes", con récord de viaxeiros e beneficios. O beneficio neto da empresa foi de case 6,5 millóns de euros o pasado ano. A convocatoria é apoiada por UGT, CIG e GGT e rexeitada polo CSIF. 

29N O Supremo rexeita estender a suspensión do dereito a voto a fillos e fillas de persoas que obtiveron a nacionalidade ao abeiro da Lei de Memoria Democrática por "presunción" de exilio, aos que si prohibiu votar. Sobre os pais e nais destas persoas seguirá vixente a suspensión cautelar da alcumada como lei de netos, concedida por petición das formacións de extrema dereita Vox e Iustitia Europa, que agora pedían ampliala

• 90 empregados mergúllanse en 66 toneladas de papel en Bos Aires á procura de votantes da 'lei de netos'
• Besteiro lamenta que o PP celebre "tratar como galegos de segunda" ao electorado do exterior co voto suspendido
• Voto exterior: "Aquí xógase!"

Vítimas de Angrois serán recibidas este martes polo vicepresidente primeiro do Goberno de España, Carlos Cuerpo, encargado tamén da área de Transportes. Tras reunirse con afectados polo sinistro de Adamuz, agora a plataforma de Angrois pediralle que se aprenda das traxedias pasadas e que se revise a investigación técnica oficial que no seu día se fixo do accidente de Santiago, descualificada pola UE.

• De Angrois a Urda: sistemas que frean todo cando fallan e erros humanos que son cuestión de tempo
• Catro loiadas sobre Angrois que volven tras o accidente de Urda
• Tras Angrois, a UE leva anos advertindo a España da importancia do "factor humano" nos accidentes de tren

Rueda e o resto de membros do Goberno galego conclúen o seu "retiro" no hotel do antigo mosteiro de San Clodio, en Leiro, anunciando un futuro plan para "facilitar a implantación de industrias" que tramite "nun só solo naves preparadas e solucións de vivenda para os traballadores onde sexan necesarias". Segundo o Executivo, a estancia de dous días dos membros do Consello da Xunta serviu para "afondar na cooperación entre departamentos" e "fixar prioridades de futuro". Tras a conclusión do evento, o presidente dedicou gran parte do domingo a participar en actos de precampaña do PP. Rueda recuperou nesta lexislatura os "retiros" que Fraga implantara cos seus conselleiros. [Imaxe: CC BY-SA David Cabezón / Xunta]