Fálase

🏴󠁧󠁢󠁳󠁣󠁴󠁿🏴󠁧󠁢󠁷󠁬󠁳󠁿🇮🇪Os líderes de Escocia, Gales e Irlanda do Norte únense para reivindicaren o dereito á autodeterminación. "Por primeira vez", salientan, as tres nacións teñen "primeiros ministros comprometidos coa independencia", polo que "non hai signo máis claro de que o tempo de Westminster", en referencia ao Parlamento e ao Goberno do Reino Unido, "está chegando á súa fin" en cadanseus territorios. Por este motivo o escocés John Swinney, o galés Rhun ap Iorwerth e as irlandesas Michelle O'Neill e Mary Lou McDonald, en representación do Scottish National Party, do Plaid Cymru e do Sinn Féin, instan o Executivo británico a "prepararse, planear e facilitar mudanzas constitucionais" para cadanseus países. Na imaxe, a xuntanza deste luns en Cardiff. [Imaxe: © SNP]

• DOCUMENTO | A declaración conxunta de SNP, Playd Cymru e Sinn Féin

🚲 La Vuelta sairá de Galicia en 2027 coincidindo co Ano Santo. O evento ciclista rematou este domingo en Granada, onde o comisario do Xacobeo 2027, Marcos Gómez Román, asistiu á derradeira etapa e destacou o valor de La Vuelta como escaparate internacional que situará Galicia no punto de mira para milleiros de peregrinos e visitantes. Ata a edición de 2025, Galicia acolleu 93 saídas e 82 metas de etapa de La Vuelta, ademais de ser saída oficial da carreira en oito ocasións.

• HEMEROTECA (2025) | La Vuelta chega a Galicia entre protestas contra o equipo Israel pola invasión de Gaza 

Alerta laranxa por calor no interior da provincia de Pontevedra este domingo. O nivel dous da alerta por altas temperaturas activado pola Xunta afecta aos concellos da Agolada, O Campo Lameiro, A Caniza, Cerdedo Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.

A Coruña e Santiago farán fronte común fronte a Xunta para que "cumpra" coa zona residencial tensionada. A alcaldesa coruñesa, Inés Rey, anuncia que se reunirá o vindeiro venres coa súa homóloga santiaguesa, Goretti Sanmartín, para preparar unha estratexia conxunta de ambos municipios e pide ao Goberno galego máis datos, que di que avalan a contención do prezo na cidade. 

• O esforzo para alugar na Coruña, Vigo, Pontevedra e Santiago, por riba do recomendado
• Santiago xa é zona tensionada: freo ás subas do alugueiro e gran posuidor dende 5 pisos
• O control dos alugueiros na zona tensionada da Coruña converte Vigo na cidade máis cara para vivir

Folga indefinida por un estatuto propio para médicos no Sistema Nacional de Saúde a partir do 28 de outubro. Convocada por sindicatos de médicos e facultativos, en Galicia Simega e O'Mega, ten o obxectivo de que o Ministerio "reconsidere" a súa posición de aprobar un Estatuto Marco para todo o persoal do SNS e "abra unha negociación real que permita avanzar cara a un Estatuto Médico e Facultativo propio". [📸 Concentración diante da sede do Ministerio de Sanidade CC-BY-SA O'Mega]

• HEMEROTECA | O'Mega suspende a folga médica tras pactar co Sergas "un cambio estrutural nas relacións laborais"
• HEMEROTECA | O Sergas volve sinalar o ministerio tras a suspensión de 190.000 actos médicos polas folgas desde decembro
• HEMEROTECA | Sanidade e sindicatos do ámbito acordan un Estatuto Marco sen melloras retributivas que remata coas gardas de 24 horas

⚫️ Falece o artista ourensán Antón Pulido, primeiro director do Centro Galego de Arte Contemporánea (CGAC) e director xeral de Cultura da Xunta de Galicia nos anos noventa. Pintor, especialista na técnica do gravado e xestor cultural, finou aos 81 anos na cidade de Vigo, da que é veciño ilustre. Foi recoñecido como 'Fillo predilecto de Amoeiro' e mais como 'Vigués distinguido', e recibiu numerosas distincións na súa traxectoria artística, como o Premio da Crítica de Galicia ou o Premio Trasalba que outorga a Fundación Otero Pedrayo. A súa obra chegou a galerías de toda Europa e seguirá enchendo de cor o cruzamento vigués de Peniche co seu mural. [Na imaxe, autorretrato do pintor © Antón Pulido]

A Xunta tarda un ano en deseñar de novo as concesións de bus fracasadas no Baixo Miño e aínda terá que sacalas a concurso. Hai un ano o Goberno galego rescindiu cinco concesións no sur da provincia de Pontevedra prestadas por Lugove, pero á espera de asinar novos contratos deixou que as seguise prestando a mesma empresa, que nas últimas semanas rexistrou varias xornadas de folga. Agora a Xunta expón ao público o novo deseño de tres desas cinco novas concesións, co que o novo concurso aínda se vai demorar máis meses.

• HEMEROTECA (26/9/2025) | A Xunta rescinde 5 concesións de bus do sur de Pontevedra e xa son 8 as frustradas en toda Galicia
• Folga, concurso deserto e sancións: a Xunta atasca en 7 concesións de bus fracasadas

O Movemento Galego da Saúde Mental fixo soar 303 badaladas este xoves na praza das Praterías de Santiago de Compostela, unha badalada por cada persoa que se suicidou en 2025, no Día mundial da prevención do suicidio. 

• Os 300 suicidios anuais en Galicia, unha cifra "intolerable" para un problema "previble"
• Sanidade presenta o novo plan de saúde mental antes que os resultados da avaliación do anterior
• Medio ano sen cita en Psiquiatría do Sergas tras ingresar por risco de suicidio 

O Congreso aproba a proposición de lei para devolver a nacionalidade española á poboación saharauí que a tiña ata a ocupación marroquí do territorio. Concretamente, o texto impulsado por Sumar outorga o dereito "ás persoas nacidas no territorio do Sáhara Occidental antes do 29 de setembro de 1977" e fixa os medios para probar esa circunstancia. Saíu adiante con 168 votos a prol do PSOE, Sumar, ERC, Bildu, PNV, Podemos, BNG e Compromís; 145 abstencións de PP e Junts e os únicos votos en contra de Vox. A norma continúa agora trámite cara ao Senado dende onde, caso de ser rexeitada pola maioría absoluta do PP, volvería ao Congreso para o visto e prace definitivo. Na imaxe, mapa colonial do Sáhara Occidental e a súa contorna editado polo Estado español en 1952.

• As 'Vacacións en Paz' despídense ata o ano que vén: "O do Sáhara non é solidariedade, é un problema político"
• HEMEROTECA | Dous actos en Galicia reclaman o dereito de autodeterminación do pobo saharauí no 50 aniversario da RASD
• HEMEROTECA | O conflito recrúa no Sáhara: de gozar os veráns en Galicia a adestrarse para a guerra
• HEMEROTECA | "O pobo saharahuí non pode vivir da solidariedade, quere vivir dos recursos da súa propia terra"
• HEMEROTECA |  España volve deixar o pobo saharauí nas mans de Marrocos en plena mudanza do taboleiro internacional

🦟 A Xunta fai un chamamento á cidadanía para extremar en setembro as medidas de prevención fronte ao mosquito tigre, pois as condicións meteorolóxicas poden favorecer a súa actividade e reprodución. A presenza do mosquito tigre xa está confirmada en 10 concellos galegos: A Coruña, Bueu, Moaña, Mos, O Porriño, Ponteareas, Redondela, Soutomaior, Tomiño e Vigo. [📸 Na imaxe, reunión do Comité Técnico Interdepartamental do Mosquito Tigre CC-BY-SA Xunta de Galicia]

• O cambio climático debuxa un novo mapa das enfermidades transmitidas por mosquitos e bacterias
• HEMEROTECA | A primeira detección do 'mosquito tigre' en Galicia activa os protocolos de prevención das doenzas que transmite