A Fiscalía require ao Concello da Coruña información sobre o incumprimento da Lei de Memoria ao non retirar símbolos e honras ao franquismo. Pídelle un informe sobre as actuacións realizadas ou as razóns do incumprimento legal, segundo advirte a CRMH da Coruña. O informe encargado polo Concello ao Instituto José Cornide insta a "retirar o nome da vía pública e os honores concedidos" a 14 persoas, entre eles Barrié, Alfonso Molina ou Peñamaría de Llano.
O PSdeG alerta do "bloqueo institucional do PP " no consello de administración dos medios públicos tras "sete meses sen cubrir" a vacante deixada pola anterior representante da formación neste órgano da CSAG -antiga CRTVG-, que "hoxe funciona de xeito incompleto, sen o equilibrio que lle corresponde, o que debilita aínda máis a súa escasa independencia", considera a vicesecretaria e vicevoceira parlamentaria do partido. Lara Méndez reclama, asemade, apoio ao BNG para non ser "cómplice" dun "bloqueo que non prexudica a un partido, senón a todos os galegos e galegas".
A folga no gran comercio téxtil e do calzado contra o preacordo de convenio estatal pecha as tendas das principais grandes superficies e rúas comerciais en Galicia. O persoal mobilizado, convocado por CIG e UGT, denuncia o empeoramento das condicións laborais e reclama a vixencia dos convenios provinciais fronte ao pacto asinado pola patronal ARTE, CCOO e Fetico.
O PP pacta un novo bipartito con Vox para gobernaren Estremadura e outorga á extrema dereita competencias como servizos sociais. O acordo inclúe crear unha consellería de "Desregulación" dirixida polo partido de Abascal, medidas contra menores migrantes sen compaña familiar ou accións contrarias a paliar o cambio climático, entre outras. Na imaxe, Feijóo nun mitin da campaña estremeña xunto a quen seguirá sendo presidenta autonómica, María Guardiola [© PP]
Fin da andaina do Celta na Europa League nesta tempada tras caer por 1-3 ante o SC Freiburg no partido de volta dos cuartos de final da competición nun estadio de Balaídos ateigado e entregado ao conxunto celeste. Tras o encontro a bancada viguesa agradeceu con amplitude ao plantel do equipo a súa actuación na competición europea e no conxunto da temporada. [Imaxe: © RC Celta]
Trump anuncia un cesamento do fogo de dez días entre Israel e o Líbano a partir desta noite e presume de ter resolto nove guerras en todo o mundo. "Esta será a décima, así que, mans á obra!", di o presidente dos EUA, que convidará o primeiro ministro israelí e o presidente libanés á Casa Branca. Foto: CC-BY-SA Gage Skidmore.
O Goberno de España declarará o Vello Cárcere de Lugo como Lugar de Memoria Democrática. O delegado gobernamental en Galicia, Pedro Blanco, confirma o inicio do expediente ao alcalde lucense, Miguel Fernández, que formalizara a petición o pasado 2025. Unirase así ao Pazo de Meirás, á Illa de San SImón e á cidade de Ferrol nunha declaración ao abeiro da Lei de Memoria á que tamén aspiran outros espazos significativos no noso país.
O galego Carlos Canal (Movistar) gaña a segunda etapa de O Gran Camiño. O ciclista de Xinzo de Limia impúxose no sprint dun grupo reducido na chegada en Barreiros e obtén así a súa primeira vitoria profesional. Este xoves a terceira etapa da proba unirá Carballo e Padrón (169 km). Foto: Movistar Team.
O Dépor disponse a corrixir o topónimo na denominación do club para asumir á fin a oficial, A Coruña, segundo avanzou a pasada noite o programa A Penaltis da Radio Galega. A fin da anomalía toponímica do Deportivo vén sendo impulsada pola campaña da exitosa iniciativa Aquí tamén se fala, promovida dende o instituto público Rafael Dieste con amplísimo eco en múltiplos sectores da cidade e mesmo tamén fóra dela. [Imaxe: ATSF]
Julius Johansen (UAE) gaña a crono inicial de O Gran Camiño e convértese no primeiro líder da edición 2026 da proba. O dinamarqués foi o máis forte nun esixente percorrido polas rúas da Coruña con comezo e final na Torre de Hércules e superou os lusos Rafael Reis e Nelson Oliveira. Nordhagen foi 4º a 28 segundos e Yates 6º a 40 segundos. O limiao Carlos Canal finalizou en 18ª posición. Este mércores córrese a segunda etapa, entre Vilalba e Barreiros (148.6km).
