Julius Johansen (UAE) gaña a crono inicial de O Gran Camiño e convértese no primeiro líder da edición 2026 da proba. O dinamarqués foi o máis forte nun esixente percorrido polas rúas da Coruña con comezo e final na Torre de Hércules e superou os lusos Rafael Reis e Nelson Oliveira. Nordhagen foi 4º a 28 segundos e Yates 6º a 40 segundos. O limiao Carlos Canal finalizou en 18ª posición. Este mércores córrese a segunda etapa, entre Vilalba e Barreiros (148.6km).
José Precedo gaña o XXII Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración do Concello de Pontevedra. Precedo recibirá o premio en Pontevedra o vindeiro sábado 9 de maio, nun acto que se celebrará na Casa Consistorial. Precedo, xornalista galego de eldiario.es, defendeu o dereito ao segredo xornalístico ante o Tribunal Supremo no caso que afectou ao Fiscal Xeral Álvaro García Ortiz.
Adif encarga un novo apeadeiro na liña convencional Vilagarcía-Padrón en Valga, concello no que non había ningunha parada. Quere habilitarse unha instalación básica cun custo máximo de dous millóns de euros que estaría rematada en arredor de tres anos. [Imaxe: @oscar_puente]
Pedro Sánchez confirma que o Consello de Ministros aproba hoxe o Real Decreto da regularización de persoas migrantes: "É, ante todo, un acto de normalización e de xustiza coa nosa propia historia", defende o presidente do Goberno de España nunha carta aberta divulgada a través das redes sociais, na que salienta que o proceso implica "que quen forma parte xa da nosa vida cotiá o faga en igualdade de condicións" con "dereitos e obrigas". Calcúlase que unhas 8.000 persoas en Galicia se poden beneficiar dunha regularización que, alén do Goberno de España, ten un amplo apoio de organizacións políticas, sindicais, sociais e mesmo da Igrexa católica fronte ao rexeitamento do PP e Vox, entre outros. Na imaxe, un barrio da Coruña con ampla presenza de poboación de orixe estranxeira.
O xuíz Peinado pecha a instrución e envía a xuízo por catro delitos a Begoña Gómez, esposa de Pedro Sánchez. O procesamento neste controvertido caso chega mentres Gómez se atopa acompañando o presidente do Goberno de España na súa viaxe oficial á China. Anteriores fitos da súa instrución cadraran tamén con eventos de proxección internacional do xefe do Executivo español. Na imaxe, Pedro Sánchez e Begoña Gómez tras aterraren en Beijing [© Pool Moncloa/Borja Puig de la Bellacasa]
Fin da era Orban en Hungría coa ampla vitoria de Péter Magyar, o candidato conservador que concentrou o voto de oposición ao ata agora primeiro ministro, referente da internacional reaccionaria e con aval explícito dos gobernos dos EUA e Rusia. Na imaxe, Orban e Magyar, nunha imaxe de arquivo.
Numerosas mobilizacións en Galicia apoian a saída da Flotilla solidaria con Gaza. Diversas localidades galegas están a celebrar, entre o 11 e o 13 de abril, accións de apoio pola partida da Global Sumud Flotilla. 100 barcos con centos de participantes procedentes de máis de 100 países navegarán coa finalidade de chegar a Gaza, romper o bloqueo ilegal e garantir a axuda vital á poboación civil mediante a apertura dun corredor humanitario, segundo informa Global Sumud Galiza.
[Foto BNG: concentración en Vigo]
Familias do IES Brión alertan de “graves problemas” de altas temperaturas dentro das aulas. A ANPA Pedra Viada explica que hai tempo que puxo en coñecemento da Consellería de Educación e do Concello de Brión o asunto pero seguen sen tomarse medidas. “Cando chamemos dende Urxencias mentres acompañamos a un dos alumnos que teña sofrido un problema de saúde como consecuencia da calor, haberá alguén que descolgue o teléfono e ofreza unha solución?”, cuestionan desde a ANPA.
[Foto: arquivo]
A misión Artemis II da NASA regresa á Terra logo da primeira viaxe á Lúa en máis de 50 anos. Artemis II puxo fin este venres con éxito a súa misión de levar novamente ao ser humano á órbita lunar por primeira vez desde 1972, coa saída da cápsula Orión dos seus catro astronautas, en aparente bo estado e no medio dos aplausos desde o centro de control en Houston logo de dez días.
[Foto: NASA]
Activada a alerta laranxa por temporal costeiro en todo o litoral galego. O fenómeno meteorolóxico adverso estará activo desde media tarde deste sábado no noroeste e no oeste da provincia da Coruña e desde a medianoite no suroeste da Coruña e no litoral de Lugo e de Pontevedra, agardándose mar combinada de noroeste con ondas que poden acadar os seis metros, segundo Aemet.
A Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva federada e do programa Xogade no mar nos concellos afectados, que poden consultarse na web Deporte Galego. A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
[Foto: Xunta]
