Está a piques de comezar no Pazo de Congresos de Santiago a XVIII Asemblea Nacional do BNG baixo o lema ‘Coa túa forza, Galiza gaña’. Ás 10.30 a portavoz nacional, Ana Pontón, dará o discurso de apertura, e ás 18.30 a asemblea pecharase co discurso de clausura. As e os militantes da formación nacionalista escollerán entre tres candidaturas para dar forma aos novos Consello e Executiva Nacional, ademais de valorar o relatorio político presentado polo Consello saínte.
Este domingo péchase o Culturgal cunha intensa xornada na que destacan a presenza de Manuel Rivas, a presentación de A gran final. Contos e contas do fútbol galego, a estrea da cuarta e última entrega do espectáculo A nena e o grilo, o camiño das cores e o acto Somos pandereteiras, coa vista posta no vindeiro Día das Letras, no que Bouba pandereteiras, Ana Romaní, María Reimóndez, Susana S. Arins, Andrea Nunes Brións e Mercedes Peón conversarán con Selina Otero.
Este sábado máis de 700 persoas gozaron da Ultranoite Cultureta de Chévere, nunha xornada que tamén tivo a música de Caamaño&Ameixeiras e Pava, a poesía de Olga Novo ou a proxección de As Neves e a representación de Reconversión
O 1 de decembro de 1834, hai hoxe 190 anos, Domingo Fontán entregou a Carta Xeométrica de Galicia, primeiro mapa topográfico do Estado español realizado con métodos científicos. Fontán traballou durante 17 anos na Carta, percorrendo o país a pé ou a cabalo para realizar persoalmente milleiros de medicións. O resultado foi un mapa tan exacto que foi empregado nas décadas seguintes para trazar estradas e vías do ferrocarril. Velaquí unha ducia de curiosidades ao redor de Fontán e da súa obra.
Está a rematar na Praza de Praterías de Santiago a manifestación "en defensa dunha CRTVG pública e plural" convocada polo persoal dos medios públicos para demandar a aposta pola "produción propia" e unha televisión e radio públicas "independentes" e "ao servizo da cidadanía".
A Coruña aproba o exame de avaliación da FIFA para ser unha das sedes do Mundial 2030. A candidatura do estadio de Riazor obtivo, iso si, a nota máis baixa de todas as cidades europeas, con 3,4 puntos sobre 5 e supera unicamente a de Asunción (Paraguai). As cualificacións máis baixas para a cidade herculina corresponden a aloxamento (2,9) e conectividade internacional (1,7)
A edición 2024 do Culturgal botou a andar este venres no Pazo da Cultura de Pontevedra, onde ata o domingo se verá o mellor da produción artística do país cunha variada programación con ofertas para todos os públicos. Actividades infantís, proxeccións, teatro, presentacións literarias, debates, e concertos.
Aprobada polo Consello de Ministros a ampliación das bonificacións nas peaxes da AP-9 para viaxeiros frecuentes. A novidade, que formou parte do acordado entre PSOE e BNG, é que co actual modelo de desconto do 50% para quen faga o mesmo traxecto de ida e volta dende os mesmos puntos quen ademais sume 20 viaxes ao mes, ese desconto chegue ao 75%: o 50% actual –con independencia do número de viaxes– e a metade da viaxe de ida. [📸 Ministerio de Transportes]
Rafael Louzán perfílase como vindeiro presidente da Federación Española de Fútbol entre dúbidas da compatibilidade do cargo coa condena por inhabilitación que lle ratificou a Audiencia de Pontevedra en 2022 por un caso da súa etapa como presidente da Deputación e ten recorrida ante o Supremo. O ex-líder provincial do PP pontevedrés vén defendendo que ao tratarse dunha sentenza que polo momento non é firme, pode aspirar ao posto igual que exerce a presidencia da Federación Galega de Fútbol dende hai unha década. [Imaxe: © FGF]
O Congreso aproba o nomeamento de José Pablo López como presidente do Consello de Administración de RTVE. En segunda votación, e con 178 apoios, sae adiante esta designación que non acadou a maioría de dous terzos da Cámara necesarios na primeira volta. Congreso e Senado aprobaron tamén este mes a designación de once e catro conselleiros da radio e televisión públicas, respectivamente. [📸 RTVE]
Bluesky xa está en galego. Cadrando coa popularización desta rede social nas últimas semanas, o impulso da comunidade volve ser clave para a extensión do noso idioma en internet. A interface en galego vén de ser incorporada canda a última actualización da plataforma e está dispoñible en versión web e na aplicación de Android. Os impulsores da iniciativa Bluesky en galego avanzan a próxima chegada da tradución tamén para iOS. Foi posible grazas ao impulso de Carlos Vieito, Alexandre Espinosa e Xurxo GP: "O activismo pola lingua está máis vivo ca nunca", sinalan para lembrar que a chegada do galego ao antigo Twitter tamén foi grazas ao impulso da comunidade de persoas usuarias.
