Fálase

MEDALLAS CASTELAO 2024 | A Xunta concede a Medalla Castelao ás Leilía; á Asociación Solidariedade Galega co Pobo Saharauí a través de Maite Isla; ao xogador de squash Borja Golán; a Amancio López Seijas, presidente do grupo hoteleiro Hotusa e organizador do Foro La Toja, e mais á Asociación de Médicos Gallegos (Asomega). Os galardóns entréganse cadrando co aniversario do regreso a Galicia dos restos de Castelao en 1984 e tamén do plebiscito do primeiro Estatuto galego, en 1936. Na imaxe, acto de entrega dos galardóns en 2023.

• HEMEROTECA | "Galicia non quere favores, quere un goberno propio": aniversario do primeiro Estatuto
• HEMEROTECA | "Castelao é unha liña recta. Eticamente non hai nada que reprocharlle"

Inés Rey remodela o goberno da Coruña e asigna un distrito da cidade a cada edil. Nereida Canosa asume a área de Benestar Social, ata agora dirixida por Yoya Neira, nova concelleira de Medio Ambiente, cuxa ata agora titular, Noemí Díaz, pasa a Infraestruturas e Mobilidade. Gonzalo Castro suma á concellaría de Cultura as competencias de Turismo, que ata agora xestionaba Diana Cabanas, que agrega Emprego á súa área de Comercio e Mercados. José Manuel Lage, edil de Economía, terá tamén a coordinación de "proxectos estratéxicos" pero xa non a de Planificación Urbana. "Podémonos sentir orgullosos polo que ten avanzado a cidade nestes cinco anos, mais considero que como goberno aínda temos marxe de mellora en termos de xestión, eficacia e cercanía", sinala a rexedora na presentación das mudanzas, que eliminan a estrutura de tres grandes áreas para coordinar as concellarías. [Imaxe: © Concello da Coruña]

• HEMEROTECA | O goberno local da Coruña estará dividido en tres grandes áreas: economía, benestar e promoción da cidade

O Concello de Santiago suspende durante un máximo dun ano as licenzas para novas tendas de souvenirs e outros negocios turísticos, así como transformar baixos en vivendas na cidade histórica. O goberno local vén de anunciar a aprobación da medida como primeiro paso para modificar a normativa urbanística co obxectivo de "fomentar o comercio de proximidade e fixar poboación", en verbas da alcaldesa, Goretti Sanmartín, no marco dun acto para facer balance do primeiro ano de mandato municipal. Da suspensión fican fóra comercios de proximidade ou locais xa dedicados á hostalería, entre outros usos. Máis información, hoxe en Praza.gal.

• AMPLIAMOS 👉 O goberno de Santiago frea as tendas de recordos para dar aire ao comercio tradicional
• Sen 'indulto' aos centos de pisos turísticos irregulares en Santiago: "É unha aposta polo interese xeral"
• HEMEROTECA | "Dereito a gozar e obriga de coidar": Santiago pide "boas prácticas" ao turismo nunha "alfaia delicada"

Mergulladores e voluntarios retiran máis de dúas toneladas de residuos no porto da Coruña. Un cento de persoas participaron este domingo na acción organizada polo Festival Mar de Mares, onde se recolleron pneumáticos, plásticos, latas, redes ou vidro.

[Foto: Festival Mar de Mares]

Nin Ence na Ría ni Altri na Ulloa. A Asociación pola Defensa da Ría e a plataforma Ulloa Viva convocan unha marcha conxunta contra as celulosas este domingo, desde as 12.00 h, en Pontevedra.

• AMPLIACIÓN: Pontevedra berra “celulosas fóra” de Galicia nunha marcha conxunta contra Ence e Altri
• Ence salienta vantaxes ambientais da planta de reciclaxe que promove nas Pontes en pleno debate sobre o impacto de Altri 
   
• A fábrica de Altri en Palas prevé consumir tanta auga como Ence e o 20% do eucalipto que se corta en Galicia.

Pontón pide a Sánchez que execute o acordo de investidura: “Non é tempo de escusas, é tempo de cumprir con Galiza”, subliña no Consello Nacional . A portavoz nacional, Ana Pontón, destacou que o 9X pecha un ciclo electoral que consolida ao BNG como unha forza política á alza que está no mellor momento da súa historia e que, en contra de todas  as voces “agoireiras interesadas”, as urnas volveron dicir que non ten teito. 

• O BNG impera na esquerda alén PSdeG dez anos despois de xermolar as mareas 
• "Se Galiza tivo relevancia en Europa nestes anos foi por levar o BNG os temas galegos"

Nigrán multará con ata 200.0000 euros a quen faga fochancas en Praia América para as fogueiras de San Xoán. Despregarase un dispositivo de vixilancia sen precedentes no areal co obxectivo de impedir a degradación do ecosistema, segundo informa o Concello.

• HEMEROTECA | Os operarios tardan catro horas en retirar as 60 toneladas de lixo que a celebración do San Xoán deixou nas praias de Nigrán
• HEMEROTECA | Panxón amañece sen lixo: o 95% das 20 toneladas xeradas na noite de San Xoán foi depositado pola xente nos colectores

O Festival Agrocuir da Ulloa e a Fundación Uxío Novoneyra, destacados polo Ministerio de Cultura como prácticas dinamizadoras a nivel cultural e social no rural. O informe Claves e impactos de la cultura en el medio rural. El valor de lo intangible  salienta vinte proxectos de todo o Estado, entre eles os dous galegos

Rueda descualifica as taxas turísticas como "castigo" ao turismo ou "tiros no pé" mentres Santiago agarda que a Xunta lle permita aplicala . Así se pronunciou durante unha xornada organizada polo grupo hoteleiro Hotusa en Madrid baixo o lema La industria de la felicidad, na que compartiu coloquio co presidente de Asturias, Adrián Barbón. Territorios con alta actividade turística como Catalunya e Balears ou a cidade do Porto teñen en vigor taxas turísticas sen que conste unha repercusión negativa para o sector [Imaxe: CC BY-SA Xunta]

• HEMEROTECA | O Concello de Santiago fixa a renovación do transporte urbano e a taxa turística como retos deste 2024 
• HEMEROTECA | A Xunta ábrese á implantación dunha taxa turística en Santiago que o PP sempre rexeitara
• HEMEROTECA | O pleno de Santiago aproba pedir á Xunta implantar unha taxa turística coa abstención do PP

De Ninghures, A Pedreira, Flow do Toxo, Alarido, Santi Araújo ou Rocío Saiz, no cartel do Atardecer no Gaiás para este verán. A Cidade da Cultura vén de divulgar a programación completa da súa edición de 2024, que principia en xullo e se estende a finais de agosto.