Fálase

Cinco persoas serán xulgadas polo asasinato de Samuel Luiz na Coruña en 2021. O xulgado que investigou o caso finaliza a instrución considerando que hai "indicios dabondo" para sentar no banco a estas cinco persoas, en dúas das cales aprecia ademais "agravante de discriminación por condición sexual", segundo informa o TSXG. Outro dos imputados será tamén xulgado por roubo con violencia. Tres dos acusados están en prisión provisional e así continuarán e os outros dous, en liberdade. Os outros dous implicados no asasinato, menores no momento dos feitos, xa están a cumprir condena. Na imaxe, [CC BY-SA Praza.gal], lembranzas para Samuel no lugar onde o mataron.

• HEMEROTECA | "Crueldade extrema" e "fonda animadversión á homosexualidade": a Fiscalía pide de 22 a 27 anos polo asasinato de Samuel Luiz
• HEMEROTECA | VINTE | A Coruña queer. Historias da mocidade LGTBI no primeiro ano sen Samuel

O pleno de Santiago aproba solicitar á Xunta declarar o concello como "zona de mercado residencial tensionado", o que permitiría intervir para limitar os prezos do alugueiro o abeiro da lei estatal de vivenda. A iniciativa, formulada polo PSdeG local, recibiu o apoio das dúas forzas que conforman o goberno, BNG e CA, xa que o gabinete de Goretti Sanmartín xa tiña "intensión de solicitar esta declaración" malia aos "obstáculos" do Goberno galego, resaltan. O pasado outubro, tras recibir unha solicitude neste sentido do Concello da Coruña, a Xunta desbotou atendela.

• Escalada de prezos de alugueiro e compra e pisos turísticos: a vivenda convértese nun dos problemas de Galicia e entra en campaña
• A vivenda protexida remata outra lexislatura galega en mínimos malia ao impulso dos fondos da UE
• HEMEROTECA | A Xunta di que podería limitar os alugueiros no 30% dos concellos pero rexéitao e culpa á "inconcreción" da lei estatal

"Benvido a illa da estabilidade, un paraíso onde a calma e a beleza conviven en harmonía. Un sitio seguro onde a xente ten sentidiño fronte outros sitios de España onde o barullo é protagonista. Illa de estabilidade é o destino ideal para o teu voto. Viaxa cara un futuro cheo de posibilidades. Reserva a túa viaxe o 18 de febreiro". A Xunta Electoral considera que o PP vulnerou a lei electoral co vídeo difundido polas redes sociais no que se insire este texto por consideralo "publicidade ou propaganda electoral" previa ás datas oficiais da campaña. A XEG estima a denuncia do PSdeG e ordena a retirada das redes sociais do citado vídeo, pero non aprecia motivos suficientes para sancionar o PP.

• "Non debemos 'rasgarnos' as vestiduras": o que di a Xunta tras incumprir Rueda a lei electoral desde o atril de presidente

18F | O PP limítase a evidenciar que Rueda acudirá ao debate electoral da CRTVG (5 de febreiro) e evita confirmar a súa presenza no de RTVE (14 de febreiro), onde xa aceptaron participar Ana Pontón (BNG) e José Ramón Gómez Besteiro (PSdeG). O actual presidente e candidato popular non acudirá ao convocado pola Cadena SER e a secretaria xeral e xefa de campaña da formación, Paula Prado, di que "o partido" estará en todos os encontros, non así o cabeza de cartel. Na campaña das pasadas eleccións xerais, Feijóo ausentouse do debate ao que o convocara RTVE, mentres si acudiran PSOE, Sumar e Vox.

• Máis ganas de cambio e confianza na alternativa: os datos do CIS impulsan a chamada á mobilización da esquerda
• HEMEROTECA | O PP accede a un só debate 'a catro' na TVG e esquiva que Rueda vaia a encontros cara a cara
• DATOS | A activación do voto urbano de esquerdas que adoita absterse nas Galegas, clave do 18F

Rescatados con vida os tres tripulantes dunha embarcación pesqueira envorcada a sete millas de Porto do Son. Desde o Centro de Coordinación de Salvamento (CCS) de Fisterra inciden en que a alerta rápida salva vidas. Un dos mariñeiros avisou desde o seu teléfono móbil o 112, os tres caeron o mar e lograron manterse agarrados o barco. Foron rescatados pola embarcación Salvamar Regulus e mais polo pesqueiro Prajo Primero, que faenaba nas inmediacións. [Foto: Salvamento Marítimo]

O Sergas axusta o uso da máscara: só será obrigatoria nos servizos de urxencias desde o martes. A Xunta emitirá mañá, luns, unha instrución que se fará efectiva o día 30, para que o uso xeral da máscara deixe de ser obrigatorio nos centros sanitarios, limitando o seu uso aos servizos de urxencias, aos PACs e aos servizos nos que haxa pacientes inmunodeprimidos.

• O Sergas recomenda o uso xeral de máscara en todos os centros sanitarios ante o pico de gripe

A Xunta Electoral estima unha denuncia do PSdeG contra Rueda. E resolve que o presidente da Xunta incorreu na prohibición do artigo 50 da LOREX con declaracións como “o meu obxectivo como candidato é ter esa maioría que me permita seguir gobernando...”, na rolda de prensa tras o Consello de Goberno do 18 de xaneiro.

•  Nin o ministro debe ser rei mago nin Rueda publicitar bolsas para a mocidade: así vai a campaña sucia segundo a Xunta Electoral

Pontón impulsará a intervención pública de Alcoa para garantir o emprego e a actividade. A candidata nacionalista alertou en Lugo de que a proposta da dirección da empresa é reactivar as cubas na planta mariñá pero “coa ameza de que se acaban os fondos e que, polo tanto, iso vai acelerar o peche".

[Foto: Ana Pontón en Lugo. BNG]

• Alcoa repite táctica: ameaza de peche e demanda de axuda pública antes das eleccións 
   

Ecoloxistas en Acción fai un chamado ao esforzo dos voluntarios ante a inacción da Xunta para limpar as praias. As brigadas de limpeza organizadas pola asociación estiveron recollendo 'pellets' e outros lixos plásticos na praia da Lanzada, no concello do Grove. 

• A crise dos 'pellets' evidencia a ausencia dun dispositivo estable para liberar o litoral galego de plásticos
• O pobo vence a "inacción": así se recollen os 'pellets' en Muros
• Os plásticos devolven o foco á grave crise nas rías: "Hai máis 'pellets' que marisco"
   

As mulleres galegas de entre 35 e 64 anos usan internet máis que os homes. As mulleres son tamén as que máis usan internet en formularios e tramitacións online da Administración electrónica, así como para participar en redes sociais, educación e actividades relacionadas coa saúde. Son datos do informe 'Mulleres en dixital: o uso das TIC desde unha perspectiva de xénero', que acaba de publicar o Observatorio da Sociedade da Información e a modernización de Galicia da Xunta (OSIMGA.

• HEMEROTECA | Mulleres na ciencia e na tecnoloxía