Fálase

O PP propón a Luis Menor como presidente da Deputación de Ourense. A xunta directiva provincial do partido en Ourense estivo este martes presidida polo presidente do PPdeG, Alfonso Rueda, e contou coa participación da secretaria xeral, Paula Prado. O alcalde do Pereiro de Aguiar, e número dous na lista do PP por Ourense ao Senado o 23X, será previsiblemente o substituto de José Manuel Baltar na institución. "Luis Menor é un home traballador e dialogante, cun currículum formidable e que destaca na palabra máxica da Deputación: a cooperación", sinalou Manuel Baltar. [Imaxe: CC BY-SA PPdeG]

• Baltar reaparece para advertir de que "non marcha" tras afirmar Rueda que tamén deixará o liderado do PP de Ourense
• HEMEROTECA | A dinastía Baltar declina e inxecta na dereita galega doses de incerteza descoñecidas dende Fraga

O Parlamento aproba por unanimidade o deseño dun plan galego para a prevención e acompañamento das persoas vítimas de violencias lgbtifóbicas no segundo aniversario do asasinato de Samuel Luiz. A proposta do BNG na Cámara promoverá ademais un plan de formación completo das e dos profesionais que interveñen nos procesos de "detección, denuncia, acompañamento e restauración" das vítimas destas violencias.

A moción defendida pola deputada nacionalista Iria Carreira tamén incluía desenvolver un plan galego de "educación sexo-afectiva de calidade dentro da ensinanza obrigatoria", que foi rexeitado polo PP. Centos de persoas lembraron a Samuel Luiz este luns en Riazor convocadas pola asociación Alas da Coruña [na imaxe, © Alas A Coruña].

• Día do Orgullo e de preocupación pola lexitimación dos discursos de odio: "O 23X xogámonos moito"
• HEMEROTECA | Milleiros de persoas lembraron a Samuel Luiz nas cidades galegas nun Día do Orgullo LGBTI de reivindicación 

23X | O PP asegura que se Feijóo goberna en España vai "asegurar a independencia e a obxectividade nos medios de comunicación públicos". Os populares inclúen esta promesa no seu programa electoral, presentado este martes, tras reiteradas críticas do ex-presidente galego a RTVE. Mentres, en Galicia, as protestas de persoal da CRTVG duran xa máis de cinco anos e as esixencias de cumprimento da lei de medios públicos van paralelas a diversos procesos xudiciais á corporación pública e á súa dirección por demandas de traballadores que, cando menos nun caso, xa culminaron nunha condena por represalias.

• AMPLIAMOS 👉 O PP promete recortar o dereito ao aborto, "revisar" a eutanasia e a fin da lei de memoria se Feijóo goberna en España
• A CRTVG sofre para convencer a xuíza de que non traslada persoal por represalias un ano despois da primeira condena
• A xustiza investiga a dirección da CRTVG por posible acoso laboral a unha traballadora
• Cinco anos de Defende A Galega: máis conflito e menos medo na loita contra a "manipulación" na CRTVG

O Consello de Ministros aproba a fin da obrigatoriedade do uso da máscara en centros sanitarios e sociosanitarios e noutros establecementos como farmacias, a derradeira das restricións pola COVID-19 que aínda estaban vixentes. Decidiuno ao decretar, 1.207 días despois, a fin da emerxencia sanitaria activada pola pandemia. O ministro de Sanidade, José Miñones, sinala que nos espazos sanitarios o uso da máscara seguirá sendo "recomendable", pero non obrigatorio. A medida estará en vigor dende a súa publicación no BOE, previsiblemente este mércores ou xoves. Na imaxe, interior dun hospital do Sergas.

• HEMEROTECA | Toda a información da pandemia do coronavirus publicada en Praza.gal

PARO REXISTRADO | As inscricións nas oficinas de emprego diminuíron en 5.410 persoas durante o mes de xuño en Galicia (-4,02%, fronte ao -1,84% na media estatal) e quedan en 129.024, o que supoñen 11.908 menos que un ano antes (-8,45% en Galicia, -6,66% na media). A afiliación media á Seguridade Social aumentou no mesmo mes en 8.145 persoas (+0,77% e, na media, +0,26%) e chega aos 1,067 millóns, a cifra máis alta dende 2008 e que supón 18.707 máis que no mesmo mes do ano anterior, un avance interanual en Galicia do 1,78%, por baixo da media estatal do 2,56%. 

• AMPLIAMOS 👉 O paro descende en máis de cinco mil persoas en Galicia e o número de empregos é o maior en 15 anos

23X | Un bufete de avogados con sede na Coruña, dP Abogados, asina a propaganda da organización Desokupa contra o Goberno do PSOE e Unidas Podemos a escasos días do inicio da campaña das eleccións xerais. O despacho de avogacía inclúe o seu logotipo nunha lona de grandes dimensións nunha céntrica rúa madrileña na que Desokupa asegura que chegará "á Moncloa" tras o 23X e o seu responsable gábase da iniciativa nas redes sociais. Imaxe difundida pola devandita plataforma, que vén apoiando abertamente á extrema dereita.

• HEMEROTECA | Rueda axita en campaña dende a Xunta o medo á ocupación ilegal de vivendas
• HEMEROTECA | O PP promete para os concellos oficinas 'antiocupacións' como a que pagou na Xunta, con 30 consultas nun ano
• HEMEROTECA | As ocupacións, "principal demanda" da Xunta ao Estado en vivenda malia admitir que non manexa "cifras exactas"

O AI Song Contest 2023 celebrarase o 4 de novembro na Coruña. A organización avanza que o evento "integrará un congreso académico e un programa de televisión en directo ao estilo de Eurovisión". Tras botar a andar nos Países Baixos e Bélxica, a cuarta edición do certame chega a Galicia despois de que a a canción galega "AI-LALELO" do equipo PAMP!, quedase segunda o pasado 2022. Este martes coñeceranse os detalles da nova edición do AI Song Contest , que ao celebrarse na Coruña, sinalan, "recoñece o uso social da IA que fixo a candidatura de Galicia a prol das culturas minorizadas". Máis información, este martes en Praza.gal.

• Chega a foliada 4.0 con 'AI-LALELO': "a intelixencia artificial pode axudar á música tradicional galega"
• 'AI-LALELO' obtén o segundo posto no Eurovisión das cancións compostas por intelixencia artificial malia gañar o voto do público

23X | Feijóo defende como "lóxico" que o PP forme goberno bipartito con Vox se precisa o "si" do partido da extrema dereita na investidura. Afírmao en resposta a unha entrevista en El Mundo e vén de pronunciarse en sentido semellante en Telecinco para o programa de Ana Rosa Quintana, presentadora e empresaria recentemente galardoada pola Xunta cuns premios do Xacobeo destinados, segundo o Goberno galego, a "incentivar" as persoas que os recibiron a "seguir condutas exemplares para os intereses públicos".

• PP e Vox pactan en varias autonomías a desprotección da lingua propia que Feijóo aplicou xa en Galicia
• A Xunta gastou cando menos 50.000 euros na gala do Xacobeo que premiou a Ana Rosa Quintana e oculta o procedemento de elección
• HEMEROTECA (2019) | Feijóo considera o pacto con Vox "homologable a calquera goberno europeo"

O PP apunta a que o sobresoldo que paga a Feijóo é para sufragar o alugueiro do chalé no que vive en Madrid, onde o ex-presidente ten outra vivenda en propiedade. Este luns, infoLibre informa sobre "o misterio das dúas vivendas de Feijóo en Madrid". O agora líder do PP leva un ano como senador en representación do Parlamento de Galicia, aínda que el mesmo fixo público que está censado en Madrid, circunscrición pola que agora concorre ás eleccións xerais. Como senador, vén percibindo os 2.037,07 euros mensuais adicionais ao salario base (3.173,83) para "cubrir gastos" representar unha circunscrición de fóra de Madrid. Na imaxe, Feijóo nun encontro con xornalistas acompañado por Mar Sánchez, unha das súas principais asesoras, ex-secretaria de Medios da Xunta e actual número 10 do PP por Madrid ao Congreso.

• HEMEROTECA | Feijóo pecha o seu ano de senador polo Parlamento galego con cinco iniciativas, ningunha sobre Galicia
• HEMEROTECA | Feijóo, senador por Galicia "censándose en Madrid"

🏳️‍🌈Unha concorrida manifestación volveu sacar este sábado o "orgullo crítico" ás rúas de Vigo no marco dos actos reivindicativos, pero tamén festivos, na semana do Orgullo LGBTIQ+ [Imaxe: BNG Vigo]

• Día do Orgullo e de preocupación pola lexitimación dos discursos de odio: "O 23X xogámonos moito"