Fálase

A cociñeira Lucía Freitas pregoará as festas do Apóstolo, que principian en Santiago o vindeiro día 19. Freitas "representa dunha maneira magnífica os valores" da cidade, afirma a alcaldesa, Goretti Sanmartín. Dende unha hora antes do pregón, sinalado para as 21h30, o programa festivo inclúe "unha foliada popular" ao que o consistorio convida a "todas as persoas das escolas de baile e grupos folclóricos, grupos de amigos, amigas, por xunto, por separado" sen "importar a idade, condición física ou experiencia".

• EN VINTE | PODCAST | Lucía Freitas, alta cociña e os guisos que fan chup-chup
• HEMEROTECA | "O futuro é galego, e o futuro é en feminino": sete 'superheroínas' promoven o uso cotián da lingua

Vox rompe co PP desfacendo os gobernos en coalición de Castela e León, a Comunitat Valenciana, Murcia, Aragón e Extremadura, e deixará de dar apoio parlamentario a outros gobernos liderados polo PP, como o de Baleares, polo seu desacordo coa acollida de menores migrantes que están sós. Preguntado nunha entrevista no programa de TVE La Noche en 24 horas pola decisión da dirección da formación liderada por Santiago Abascal, o presidente da Xunta sinalou que obedece a un "cálculo electoral" e celebrou que "Galicia está libre de extremismos" e que "non se ten que preocupar" do que faga Vox. 

• Menores migrantes acollidos en Galicia: poucos e co traballo como prioridade

A xuíza instrutora ordena a apertura de xuízo oral contra José Manuel Baltar, na actualidade senador do PP, por un delicto contra a seguridade viaria por presuntamente conducir un coche a 215 km/h na autovía A-52.

• HEMEROTECA | A maxistrada do Supremo que investiga a Baltar por ir a 215 por hora nun coche oficial pide quitarlle a inmunidade
• HEMEROTECA | Baltar nega ante o Supremo que conducise a 215 km/h e atribúe as acusacións a unha "campaña"

A Xunta informa de que Galicia acollerá "26 nenos, nenas e adolescentes migrantes non acompañados chegados a Canarias e Ceuta, ante a saturación dos recursos destes territorios". A conselleira de Política Social e Igualdade, Fabiola García, participou no pleno da Conferencia Sectorial de Infancia e Adolescencia no que as comunidades do PP só aceptaron recibir este ano a 400 menores —347 na Península, 40 en Canarias e 13 en Ceuta— cando na actualidade hai 6.000 nas illas Canarias, que teñen un sistema adaptado para acoller a 2.000. Pola súa banda, Vox emitiu un comunicado no que considera rotos os seus pactos co PP nos diferentes gobernos autonómicos. O partido de extrema dereita celebrará este xoves un comité executivo extraordinario. 

• 📺 Rueda diagnostica unha "avalancha" de menores migrantes e acusa o Estado de "traspasar" o "problema" ás autonomías
• Feijóo recicla o dobre discurso sobre menores migrantes e retoma a teoría do "efecto chamada"
• HEMEROTECA | A Xunta confirma a acollida de vinte menores migrantes mentres Feijóo axita a teoría dun "efecto chamada"

O PP frea a comisión de investigación sobre a prórroga da concesión da AP-9 e posterior venda da autoestrada por parte do Goberno de Aznar. A solicitude do BNG recibiu o apoio o PSdeG e decaeu cos votos do PP, que argumenta que "non existe responsabilidade xudicial ou política no ámbito galego" a respecto desas decisións e agrega que o Bloque "omite que o que está a investigar a Comisión Europea" son as "dúas prórrogas" da concesión, tanto "a concedida por Felipe González por 10 anos" como a de Aznar por 25. En realidade, a pescuda da UE refírese unicamente á prórroga de Aznar. O nacionalista Luís Bará considera que, co seu "non" a investigar este "pelotazo", os populares viran en "cómplices da maior aldraxe a Galiza no que vai de século".

• CRÓNICA | AP-9: "O que poida facer, que faga"
• HEMEROTECA | A prórroga de Aznar á AP-9 sen concurso público segue sen convencer á UE, que pide máis explicacións a España
• HEMEROTECA | A ilegalidade que a UE detecta na prórroga de Aznar a Audasa ata 2048 fai revivir a súa controvertida privatización
• HEMEROTECA | De Ence á AP-9: os fíos que unen as privatizacións estrela de Aznar en Galicia e as súas concesións prorrogadas

A Nasa destaca un novo recoñecemento á astrofísica viguesa Begoña Vila, que recibe o Título de excelencia galega en Ciencias e Medicina da Asociación de empresarios gallegos de Catalunya polas súas "cualidades humanas" e a súa "exitosa traxectoria como investigadora nos proxectos máis ambiciosos para explorar a orixe do Universo". Vila traballa como enxeñeira de sistemas no centro espacial Goddard da axencia estadounidense, participou desde o comezo no desenvolvemento do telescopio espacial James Webb e agora forma parte do equipo que traballa no que será o Nancy Grace Roman Space Telescope. [Fotografía © Nasa]

• HEMEROTECA | 17 formas de mirar o universo á busca de planetas similares á Terra: o que ve Begoña Vila no telescopio James Webb da Nasa

O presidente de Abanca, Juan Carlos Escotet, novo presidente do Deportivo da Coruña. O club coruñés anuncia a remuda na súa presidencia ao tempo que incorpora ao seu consello de administración a Marta Fernández Currás, primeira conselleira de Facenda do Goberno de Feijóo, no cargo cando a Xunta impulsou a fusión de Caixa Galicia con Caixanova, cuxa entidade resultante, Novagalicia Banco, foi despois rescatada e derivou en Abanca, que ten o control do club dende 2020, cando protagonizou o seu rescate económico. Na imaxe, logotipo de Abanca nunha camisola do Dépor, cuxo primeiro equipo feminino regresa na temporada 24-25 á Primeira División e o masculino, á Segunda tras cadanseus ascensos [© RC Deportivo]

• AMPLIAMOS 👉 A conselleira da fusión das caixas volve á escena en Galicia ao fichar pola directiva do Dépor
• HEMEROTECA | Abanca rescata o Deportivo e faise co control do club
• HEMEROTECA | Das caixas a Abanca en tres fotos
• HEMEROTECA | A Xunta despachou en cinco páxinas o aval á fusión das caixas
• HEMEROTECA | Bendita tolemia! O Dépor renace a lombos da súa afección

O xuíz da Audiencia Nacional Manuel García-Castellón arquiva a causa por terrorismo contra Tsunami Democràtic despois de que lle anulasen todo o investigado desde xullo de 2021 por un erro que cometeu na solicitude da prórroga da instrución. Neste caso figuran como investigadas dez persoas, entre elas a exsecretaria xeral de ERC, Marta Rovira. Ademais, este arquivo poderá provocar a fin da 'causa especial' tamén por terrorismo aberta contra o expresident catalán Carles Puigdemont e o deputado republicano Rubén Wagensberg, na que ten a última palabra o Tribunal Supremo. [Puigdemont no acto no que anunciou que se presentaba ás eleccións catalás © Junts] 

• HEMEROTECA | O regreso de Puigdemont e catro claves máis sobre a batalla do 12M
• HEMEROTECA | A amnistía en Catalunya deixa fóra os delitos considerados terrorismo polo dereito europeo
• HEMEROTECA | Feijóo contempla un indulto a Puigdemont tras media campaña de Rueda contra as concesións a Catalunya 
• HEMEROTECA | Rueda secunda a Feijóo e pide a Sánchez que cese a Yolanda Díaz por reunirse con Puigdemont

Nace a Asociación de tocadoras galegas Somos Pandeireteiras. A iniciativa colectiva Somos Pandeireteiras, impulsada por Mercedes Peón no ano 2021, coa participación de pandeireteiras da Asociación Cultural Rosalía de Castro (Padrón), Raigañas de Cerqueda (Malpica) e Xirifeiras (Fene) dá "un paso cara á diante" para situar as tocadoras no centro da cultura do país despois de encontros e debates. "Queremos impulsar unha iniciativa colectiva que lexitime a representación social das tocadoras e das pandeireiteiras como centro da transmisión cultural galega", asegurou Mercedes Peón, agora vicepresidenta da asociación, que presidirá Gisela Sanmartín, tocadora e directora das Xirifeiras. [Fotografía © Vanessa Rábade]

• HEMEROTECA | Somos Pandeireteiras reivindica as tocadoras como centro da transmisión cultural galega
• HEMEROTECA | Mercedes Peón move os marcos con Somos Pandeireteiras: "Precisamos recoñecernos e crear o noso relato das nosas vivencias"

O Día das Letras -17 de maio- e o Día Nacional -25 de xullo-, festivos galegos de 2025. O Consello da Xunta aproba as datas festivas do calendario laboral do ano vindeiro, que consta de 14 xornadas nas que 9 son obrigatorias por normativa estatal agás que algunha delas cadre en domingo, caso do 12 de outubro do ano vindeiro. A estes festivos engádense dous que elixe cada concello.