O galego Eduardo Soutullo, Premio Nacional de Música 2023. O Ministerio de Cultura e Deporte recoñece o compositor vigués "polo unánime recoñecemento internacional da súa música, especialmente a súa produción orquestral". O guitarrista Juan Manuel Cañizares foi o outro galardoado. Foto: CC-BY-SA Musicology Spain.
A Comunidade de Montes de Tameiga presenta máis de 4.000 alegacións na Xunta "contra a declaración de Interese Autonómico ao proxecto do presidente do Celta para construír un centro comercial e de ocio nos montes comunais de Mos". Xunto a representantes de PSdeG e BNG, asociacións como Ecoloxistas en Acción e veciñanza de Mos, o portavoz da Comunidade de Montes rexistrou na delegación do Goberno galego en Vigo estas peticións contrarias á "reclasificación de terreos clasificados como 'solo rústico' polo vixente PXOM de Mos". [Imaxe: Ecoloxistas en Acción]
O paro rexistrado aumenta en Galicia un 0,2% no mes de agosto. A nivel estatal, a cifra total de parados é de 2.702.700, a máis baixa nun mes de agosto desde 2008, segundo destaca o Ministerio de Traballo.
Dende as 8 da mañá deste luns queda cortado o tráfico na autovía A-55 á altura de Tui, en dirección a Portugal. O Ministerio de Transportes sinala que o tráfico será desviado polo sentido oposto (en dirección a Vigo), habilitándose dous carrís cun dobre sentido de circulación. Está previsto que as obras de saneamento na zona se prolonguen ata finais de setembro.
Alberto Pazos Couñago é o novo portavoz do PP no Parlamento, tras a marcha de Pedro Puy ao Congreso. O deputado por Pontevedra ten as condicións para execer o cargo coa "ambición e a visión de conxunto que require", segundo salientan desde o seu grupo parlamentario.
As tres universidades públicas galegas estudarán a realidade da conciliación e a corresponsabilidade no país. A Mesa de Coidados do Consello Galego das Mulleres promove este proxecto, que conta co apoio da Xunta, para obter coñecemento científico e especializado nesta materia.
A Universidade de Santiago abordará a temática da corresponsabilidade desde o punto de vista da saúde mental das persoas coidadoras. Na Universidade de Vigo a investigación versará sobre o ámbito normativo no eido dos coidados e na implantación de actuacións favorables por empresas e institucións. E a Universidade da Coruña encargarase de analizar o aspecto sociolóxico desta realidade. [Imaxe © Ana Varela/Xunta]
Máis de 500 raios detectados este sábado en toda Galicia. A medición de Meteogalicia ata as 16.00 horas indica un total de 538. Os raios van acompañados de chuvascos treboentos que continuarán nas vindeiras horas, con maior probabilidade no sur e leste do país. A previsión é semellante para o domingo, no que seguirá activada a alerta de nivel amarelo por vento do nordés con forza 7 no noroeste da Coruña.
O Goberno de España non poderá suspender de forma inmediata a Luis Rubiales como presidente da federación estatal de fútbol. O Tribunal Administrativo do Deporte (TAD) abre un expediente sancionador a Rubiales por falta "grave", que só permite a súa inhabilitación durante dous anos, e non de "moi grave" como reclamaba o Executivo. O ministro de Cultura e Deporte, Miquel Iceta, incide en que o sucedido merece a cualificación de "moi grave", por iso desde o Goberno reclamarán agora ao TAD que "proceda a suspendelo temporalmente nas súas funcións" como llo permite a lei do deporte. [Imaxe © RFEF]
O presidente da Xunta di que traslada a Feijóo "a urxencia" de que o futuro Goberno de España "materialice os compromisos pendentes" con Galicia "que o actual foi incapaz de cumprir". Cita cuestións de infraestruturas como "os acordos da AP-9", a conexión ferroviaria con Lugo e Ferrol ou os trens Avril , medidas para poder formar máis médicos e mais a transferencia da xestión do litoral, entre outras. "A maioría dos galegos non son nacionalistas nin independentistas nin necesitan selo para que a nosa terra avance", asevera Rueda, que recibe os parabéns do candidato do PP á investidura como presidente do Estado. [Imaxe de arquivo CC-BY-SA Xunta]
Paula Carballeira, Premio Nacional de Literatura Dramática 2023 pola obra As alumnas (Editorial Galaxia), outorgado polo Ministerio de Cultura. O xurado destaca a obra da galega "por ser un eloxio do maxisterio que ensina sobre a dúbida e o debate. Polos seus valores dramáticos, a riqueza de matices e pola recuperación dunha muller referente para o ensino galego, símbolo da educación moderna, igualitaria e transformadora que propoñía a II República". A dramaturga e narradora oral "propón ao público un texto que homenaxea a todos os mestres e ao modelo de escola laica, libre e dunha pedagoxía avanzada", engade a resolución do xurado.
