Fálase

O PP retorna á presidencia da Deputación de Pontevedra dous mandatos despois. Luis López vén de ser elixido presidente da institución pontevedresa grazas á maioría absoluta lograda polos populares na institución cos resultados das pasadas eleccións municipais e despois de dúas presidencias consecutivas da socialista Carmela Silva en coalición co BNG. O popular asegura que se dispón a despregar "unha acción de goberno pensada para os concellos e polos concellos". Na imaxe, López ergue o bastón de mando na sesión constitutiva da corporación, celebrada esta mañá no Pazo Provincial. [Imaxe: CC BY-SA Xunta]

• HEMEROTECA | O PP fai que 16 persoas renuncien a ser edís en Rodeiro para que o delegado da Xunta en Pontevedra presid a a Deputación
• HEMEROTECA | A esquerda retén as deputacións da Coruña e Lugo e perde a de Pontevedra mentres Baltar queda sen absoluta en Ourense

Unha conferencia organizada pola eurodeputada do BNG, Ana Miranda, analiza este xoves na sede do Parlamento Europeo en Bruxelas a seguridade ferroviaria na UE dez anos despois do accidente de Angrois. Baixo o título O accidente de Angrois, 10 anos despois: Temos avances en seguridade ferroviaria?, a conferencia contará con relatores como o director executivo da Axencia Ferroviaria Europea, Josef Doppelbauer, o director de Transporte Terrestre da Dirección Xeral de Mobilidade e Transporte, Kristian Schmidt, e representantes das vítimas, entre eles o presidente da Plataforma Víctimas Alvia 04155, Jesús Domínguez. Na imaxe [CC BY-SA Praza.gal], participantes na conferencia, este mércores no hemiciclo da Eurocámara en Bruxelas con Ana Miranda. O máis destacado, este venres en Praza.gal.

• A Fiscalía retira a acusación contra o cargo de Adif e mantén a petición de catro anos de cadea para o maquinista de Angrois
• Eurodeputados de sete países, incluída a galega Ana Miranda, interésanse por eivas ferroviarias como as que a UE investiga tras Angrois
• HEMEROTECA | A Comisión Europea insiste: “España non levou a cabo unha investigación totalmente independente” do accidente de Angrois

23X | O CIS estima que Pedro Sánchez poderá revalidar a presidencia do Goberno de España para o PSOE tras o 23X á fronte dunha maioría de esquerda malia poder ser o PP a primeira forza do Congreso con ata 140 escanos. Os populares serían os máis votados co 31,4%, practicamente nun empate técnico co PSOE (31,2%). Sumar debutaría no Congreso como terceira forza co 16,4% por diante de Vox, co 10,6%. O BNG lograría o 1% dos votos sobre o total estatal (hai catro anos tivo o 0,5%), segundo o barómetro. Para as circunscricións galegas, o inquérito indica que o PP pode ter entre 8 e 12 escanos, o PSdeG entre 7 e 10, o BNG 2 ou 3 e Sumar, 2. 

• AMPLIAMOS 👉 O CIS apunta a unha maioría de esquerda o 23X, con igualdade en Galicia entre PP e PSdeG, 2-3 escanos para BNG e 2 para Sumar
• HEMEROTECA | Así votou Galicia nas xerais de 2019

O avogado propietario do despacho coruñés dP Abogados, o lucense Xaime da Pena, confirma que pagou 40.000 euros pola propaganda da organización Desokupa -na imaxe- contra o Goberno do PSOE e Unidas Podemos en vésperas das eleccións xerais. Ratifícao en resposta ao xornal El Progreso, onde encadra a operación nunha acción de "marketing" e por ser "colega" do propietario da plataforma. Nega ser de ultradereita, se ben admite que "pode ser" que acabe sendo candidato de Vox.

• HEMEROTECA | Rueda axita en campaña dende a Xunta o medo á ocupación ilegal de vivendas
• HEMEROTECA | O PP promete para os concellos oficinas 'antiocupacións' como a que pagou na Xunta, con 30 consultas nun ano
• HEMEROTECA | As ocupacións, "principal demanda" da Xunta ao Estado en vivenda malia admitir que non manexa "cifras exactas"

Xa está en vigor a fin da emerxencia sanitaria pola COVID e o decaemento de todas as restricións que ficaban, nomeadamente a obriga de portar máscara en centros sanitarios. Tras a súa aprobación deste martes no Consello de Ministros, o Boletín Oficial do Estado publicou na mañá deste mércores a orde que o fai oficial, que deixa como recomendacións o uso de máscaras en "ámbitos de especial vulnerabilidade". Na imaxe, unha traballadora do Sergas no hospital de Ourense, durante a pandemia [CC BY-SA Sergas]

• HEMEROTECA | Toda a información da pandemia do coronavirus publicada en Praza.gal

Luz verde definitivo do Parlamento cos votos do PP á lei do litoral da Xunta, coa que pretende xestionar concesións de terreos público na costa sen que o Estado lle transfira as competencias e que, segundo o propio Goberno galego, non vai ter "especial transcendencia económico-social".

• A Xunta di agora que a súa lei do litoral non vai ter "especial transcendencia económico-social"
• Os novos hoteis na costa que quere a Xunta serán privados pero apoiaraos con fondos de recuperación da UE
• A ocupación privada da costa e a subvención ao transporte en coche privado toman a axenda política malia á crise climática
• A Xunta considera "esencial para o desenvolvemento sustentable" impulsar unha rede de hoteis no litoral

O PP propón a Luis Menor como presidente da Deputación de Ourense. A xunta directiva provincial do partido en Ourense estivo este martes presidida polo presidente do PPdeG, Alfonso Rueda, e contou coa participación da secretaria xeral, Paula Prado. O alcalde do Pereiro de Aguiar, e número dous na lista do PP por Ourense ao Senado o 23X, será previsiblemente o substituto de José Manuel Baltar na institución. "Luis Menor é un home traballador e dialogante, cun currículum formidable e que destaca na palabra máxica da Deputación: a cooperación", sinalou Manuel Baltar. [Imaxe: CC BY-SA PPdeG]

• Baltar reaparece para advertir de que "non marcha" tras afirmar Rueda que tamén deixará o liderado do PP de Ourense
• HEMEROTECA | A dinastía Baltar declina e inxecta na dereita galega doses de incerteza descoñecidas dende Fraga

O Parlamento aproba por unanimidade o deseño dun plan galego para a prevención e acompañamento das persoas vítimas de violencias lgbtifóbicas no segundo aniversario do asasinato de Samuel Luiz. A proposta do BNG na Cámara promoverá ademais un plan de formación completo das e dos profesionais que interveñen nos procesos de "detección, denuncia, acompañamento e restauración" das vítimas destas violencias.

A moción defendida pola deputada nacionalista Iria Carreira tamén incluía desenvolver un plan galego de "educación sexo-afectiva de calidade dentro da ensinanza obrigatoria", que foi rexeitado polo PP. Centos de persoas lembraron a Samuel Luiz este luns en Riazor convocadas pola asociación Alas da Coruña [na imaxe, © Alas A Coruña].

• Día do Orgullo e de preocupación pola lexitimación dos discursos de odio: "O 23X xogámonos moito"
• HEMEROTECA | Milleiros de persoas lembraron a Samuel Luiz nas cidades galegas nun Día do Orgullo LGBTI de reivindicación 

23X | O PP asegura que se Feijóo goberna en España vai "asegurar a independencia e a obxectividade nos medios de comunicación públicos". Os populares inclúen esta promesa no seu programa electoral, presentado este martes, tras reiteradas críticas do ex-presidente galego a RTVE. Mentres, en Galicia, as protestas de persoal da CRTVG duran xa máis de cinco anos e as esixencias de cumprimento da lei de medios públicos van paralelas a diversos procesos xudiciais á corporación pública e á súa dirección por demandas de traballadores que, cando menos nun caso, xa culminaron nunha condena por represalias.

• AMPLIAMOS 👉 O PP promete recortar o dereito ao aborto, "revisar" a eutanasia e a fin da lei de memoria se Feijóo goberna en España
• A CRTVG sofre para convencer a xuíza de que non traslada persoal por represalias un ano despois da primeira condena
• A xustiza investiga a dirección da CRTVG por posible acoso laboral a unha traballadora
• Cinco anos de Defende A Galega: máis conflito e menos medo na loita contra a "manipulación" na CRTVG

O Consello de Ministros aproba a fin da obrigatoriedade do uso da máscara en centros sanitarios e sociosanitarios e noutros establecementos como farmacias, a derradeira das restricións pola COVID-19 que aínda estaban vixentes. Decidiuno ao decretar, 1.207 días despois, a fin da emerxencia sanitaria activada pola pandemia. O ministro de Sanidade, José Miñones, sinala que nos espazos sanitarios o uso da máscara seguirá sendo "recomendable", pero non obrigatorio. A medida estará en vigor dende a súa publicación no BOE, previsiblemente este mércores ou xoves. Na imaxe, interior dun hospital do Sergas.

• HEMEROTECA | Toda a información da pandemia do coronavirus publicada en Praza.gal